TSAMBA LACIWIRI LA PEDRU

1 Ine Simau Pedru, mtumiki na mpostolo wa Jezu Kristu, ndikunembera imwe omwe mudatambira mapfunziso yakufunika ya cadidi ninga ife.* Tentse tidatambira cipfunzisoci thangwe Mulungu na Jezu Kristu Mpulumusi wathu mbakulungama.

2 Kudeka mtima kukulu na mtendere bzithumizirike kwa imwepo, mwakukhala na cidziwiso cacadidi ca Mulungu na ca Jezu Kristu Mbuya wathu. 3 Thangwe ra mphanvu zikulu za Mulungu, ifepano tidatambira bzinthu bzakufunikira kuti tikhale na moyo wakubzipereka. Tidatambira* bzinthu bzimwebzi, thangwe timbamudziwa bwino Mulungu. Iye adaticemera thangwe rakuti ni Mulungu mkulu na wantsisi. 4 Na bzimwebzi, Mulungu watipasa mafala yakufunika na yabwino, kuti thangwe ra mafalayo, imwepo mukhale na makhalidwe ninga ya Mulungu, kuti mupulumuke ku makhalidwe yakuipa ya m’dzikoli yomwe yakuyambisidwa na bzikhumbo bzakuipa.

5 Na thangwe limweri, citani bzentse bzomwe mungakwanise, kuti pa cikhulupiro canu, muthumizire makhalidwe yabwino, pa makhalidwe yanu yabwino, cidziwiso, 6 pa cidziwiso canu, kubziretsa, pa kubziretsa kwanu, kupirira, pa kupirira kwanu, kubzipereka kwa Mulungu, 7 pa kubzipereka kwanu kwa Mulungu, lufoyi la paubale, pa lufoyi lanu la paubale, funani wanthu wentse. 8 Pakuti bzinthu bzimwebzi bzikakhala mwa imwepo bzicitaikira, bzin’dzakukhotcererani kuti muleke kudjedjera ayai kuleka kubala bzisapo, mwakubverana na cidziwiso caico cakucokera kwa Mbuya wathu Jezu Kristu.

9 Pakuti munthu omwe alibe bzinthu bzimwebzi ni zimola, ambafunga maso yace kuti aleke kuwona ceza, ndipo iye ambayebwa kuti adacenesedwa ku pikado zomwe adacita m’mbuyomu. 10 Tenepo abale, citani ciri-centse kuti mupitirize kukhala wakukhulupirika ninga anyakucemeredwa na wakusankhulidwa na Mulungu, thangwe mukapitiriza kucita bzinthu bzimwebzi, imwepo cipo mucidzagwa. 11 Mukacita bzimwebzi, imwepo mun’dzasimbidwa ndipo mun’dzapita mu Umambo bwakusaya kumala bwa Mbuya na Mpulumusi wathu Jezu Kristu.

12 Na thangwe limweri, nthawe zentse nimbafuna kukukumbusani bzinthu bzimwebzi, napo kuti mumbabzidziwa kale ndipo ndimwe wakukhazikika m’cadidi comwe munaco. 13 Tsono, ndawona kuti bziri bwino kupitiriza kukukumbusani, pomwe ndikana thupiri, lomwe liri ninga tendi. 14 Pakuti ndikudziwa kuti thupiri lin’cosedwa tsapanopapa, ninga momwe Jezu Kristu Mbuya wathu adanditsimikizirira. 15 Nthawe zentse, nin’cita ciri-centse comwe ningakwanise, kuti ndikayenda, imwepo mukwanise kumbakumbukira* mwekha bzinthu bzimwebzi.

16 Pomwe tidakudziwisani bza mphanvu na kuwonekera kwa Mbuya wathu Jezu Kristu, ifepano tiribe kukuuzani nkhani zakunama zakucita kunembedwa na nzeru za wanthu, koma tidacita bzimwebzi thangwe ndife mboni zakuwona na maso ulemerero bwace. 17 Pakuti Mulungu Baba wace adamupasa ulemu na ulemerero, pomwe padabveka mafala kwa iye ya ulemerero bukulu yakuti: “Uyu ndiye Mwana wangu wakufunidwa, omwe nimbakomedwa naye.” 18 Inde, ifepano tidabva mafala yamweya kucokera kudzulu, pomwe tikhanaye pabodzi pa phiri lakucena.

19 Ndipopa, tina citsimikizo centse cakuti ciri-centse comwe Mulungu anilewa cin’dzakwanisika, tenepo khalani tceru pa bzinthu bzentsenebzi, mafala yamweya yan’funika kukhala mu mtima mwanu, ninga mbvuniko omwe ukubvunika pa mdima. Pitirizani kucita bzimwebzi mpaka kuwonekera kwa nyenyezi ya madandakweca. 20 Cakuyamba, dziwani kuti palibe polofesiya iri-yentse m’Bzinembo, yomwe idanembedwa kucokera mu nzeru za munthu. 21 Pakuti polofesiya iribe kulewedwa thangwe ra kufuna kwa munthu, koma wanthu ndiwo omwe adalewalewa mafala ya Mulungu, mwakutsogoleredwa na mzimu wakucena.

2 Tenepo, pan’dzawoneka apolofeta wakunama pakati pa wanthu, ndipo pan’dzawonekambo apfunzisi wakunama pakati panu. Iwo an’dzapfunzisa bzipfunziso bzakunama mwakabisira, bzomwe bzin’dzadzonga cikhulupiro canu. Ndipo iwo an’dzalamba munthu* omwe adawalombola, acibzicitisa okha kuti apfudzidwe mwakamfulumize. 2 Kuthumizira bzimwebzi, azinji an’dzatewera makhalidwe yawo yakupasa manyazi,* ndipo bzimwebzi bzin’dzacitisa kuti, wanthu winango adzalewe kuipa bzipfunziso bzacadidi.* 3 Ndipo thangwe ra kusirira kwawo kwa ntcanje, iwo an’dzakupumpsani na nkhani zakunama, tsono kutongedwa kwawo komwe kudakhazikisidwa kale-kale kun’cedwa lini, ndipo nthawe yakupfudzidwa kwawo in’dzafika.

4 Kulewa cadidi, Mulungu alibe kulekerera anjo omwe adaphonya, koma iye adawalanga mwakuwathusa mu Tartaro* ndipo adawamanga na makorenti,* aciwaikha mu mdima wakuti bwerani mudzawone, pakudikhirira kudzatongedwa. 5 Iye alibe kulekerera dziko lakale lire ndipo adalilanga, tsono, iye adapulumusa Nowa mpalizi wacirungamo pabodzi na wanthu winango 7, pomwe adabweresa cigumula ca madzi, acipfudza wanthu wentse wakuipa. 6 Ndipo iye adalangambo mizinda ya Sodoma na Gomora, mwa kuinyekesa mpaka kukhala dotha. Na bzimwebzi iye adalatiza wanthu wakuipa bzomwe bzin’dzacitika kutsogolo. 7 Iye adapulumusa Loti, munthu wakulungama omwe akhasunama thangwe ra makhalidwe yakupasa manyazi* ya wanthu wakusaya kubvera malamulo. 8 Pakuti ntsiku na ntsiku, munthu wakulungamayu akhabonera mu mtima mwace, thangwe ra bzinthu bzakuipa bzomwe akhawona na kubva pa nthawe yomwe akhakhala pakati pa wanthu wakuipa. 9 Bzimwebzi bzikulatiza kuti Yahova ambadziwa momwe angapulumusire wanthu wakukhulupirika pa mabvuto, ndipo wanthu wakusaya kulungama, akukoyedwa kuti adzapfudzidwe* pa ntsiku ya kutonga, 10 maka-maka wale omwe ambafuna kugonana na wanthu winango na cakulinga cakuti awapswipize na wale omwe ambanyoza utongi.

Iwo alibe mantha, ambafuna kucita bzakufuna bzawo bzokha basi, ndipo ambagopa lini kulewa kuipa wanthu omwe mbakulemekezeka pamaso pa Mulungu. 11 Napo anjo mbamphanvu kwene-kwene kuposa iwo, anjowo ambawalewa lini mafala yakuipa thangwe ambalemekeza Yahova. 12 Tsono wanthu amwewa, omwe ali ninga bzirombo bzakusaya nzeru, bzomwe bzimbacita bzinthu mwakusaya kukumbuka, ndipo bzimbabadwa kuti bziphatidwe bzicipfudzidwa, ambalewa kuipa bzinthu bzomwe ambabzidziwa lini. Iwo an’dzapfudzidwa thangwe ra bzicito bzawo bzakuipa. 13 Iwo an’dzalangidwa thangwe ra bzakuipa bzomwe adacita.

Iwo ambawona ninga mpsakukondwesa kucita bzinthu bzakuthupi napo yacikhala masikati. Iwo ni mathotho na bzinthu bzakupswipiza pakati panu, ndipo ambakomedwa na bzipfunziso bzawo bzakunama, pomwe akudya namwe pabodzi pa phwando. 14 Maso yawo yadadzala na upombo ayai uputa, ambakwanisa lini kusiya kucita pikado ndipo iwo ambapumpswa wale omwe mbakutepa. Mitima yawo idadzala na ntcanje* ndipo iwo ni wanthu wakutembereredwa. 15 Iwo adasiya njira yakulungama acitaika. Iwo adatewera njira ya Balamu mwana wa Bewori omwe adacita bzakuipa thangwe akhafunisisa kutambira mabaibai. 16 Tsono iye adatsimulidwa thangwe ra kusaya kubvera lamulo. Bulu, cirombo comwe cimbalewalewa lini, cidalewalewa ninga munthu, cicitazisa mpolofetayo kucita bzinthu bzakusaya nzeru bzomwe akhafuna.

17 Iwo ni micera yakusaya madzi na pfulere* lomwe limbatengeka-tengeka na conzi camphanvu ndipo wanthu amwewa akoyedwera ku mdima wadzawoneni. 18 Mafala yomwe iwo ambalewa, yambakhala ninga njakufunika, koma njakusaya basa. Iwo ambacita bzinthu bzakupasa manyazi,* ndipo ambacitisa wanthu kukhala pomwe na bzikhumbo bzakuipa, bzomwe akhadabzisiya. 19 Apfunzisi wakunamawa, ambalewa kuti an’dzawapasa ufulu, pomwe iwo ni akapolo wa pikado, pakuti munthu akakundidwa, iye ambadzakhala kapolo wa munthu omwe wamukundayo. 20 Kulewa cadidi, penu iwo pambuyo pa kusiya bzinthu bzakupswipiza bza m’dzikoli thangwe ra kukhala na cidziwiso caico ca Mbuya na Mpulumusi wathu Jezu Kristu, acibwerera pomwe ku bzicito bzawo bzakuipa, acibvuma kutsogoleredwa nabzo, ambadzakhala wakuipa kwene-kwene kuposa momwe akhaliri pakuyamba. 21 Bzikhali bwino kwa iwo kusaya kuidziwa bwino njira ya cirungamo, kuposa kuti pambuyo pa kuidziwa, acisiya kubvera malamulo yakucena yomwe adatambira. 22 Kwa iwo yadakwanisika mafala yakuti: “Mbwaya idabwerera ku masanzi yace, ndipo nkhumba yomwe ikhadasambikidwa yabwerera pomwe kukaganda m’matope.”

3 Abale wakufunidwa, iri ni tsamba laciwiri lomwe ndikukunemberani ninga momwe ndidakunemberani tsamba lakuyamba lire, ndikukulimbikisani kuti muphatise basa luso lanu la kukumbuka bwino, mwa kukukumbusani bzomwe mumbadziwa kale, 2 kuti mukumbukire bzomwe bzidalewedwa* na apolofeta wakucena, na malamulo ya Mbuya na Mpulumusi mwakuphatisa basa apostolo wanu. 3 Cakuyamba dziwani kuti mu ntsiku zakumalizira, kun’dzawoneka wanthu wakusinjirira omwe an’dzalewa mafala yakusinjirira. Iwo an’dzacita bzinthu mwakubverana na kufuna kwawo 4 acimbati: “Iye adalewa kuti an’dzabwera, tsono ali kuponi? Thangwe kuyambira mu ntsiku zomwe makolo yathu yakale yadafa, bzinthu bzentse bzikupitiriza ndendende ninga momwe bzikhaliri paciyambi ca cirengedwe.”

5 Ndipo iwo ambapulumbudza utowa cadidi cakuti kudzulu kulipo kuyambira kale-kale ndipo dziko la pantsi lidakhazikisidwa mwa mphanvu kunja na pakati pa madzi mwa fala la Mulungu; 6 ndipo mwakuphatisa basa bzimwebzi, dziko la pa nthawe imweyire lidapfudzidwa, pomwe lidamizidwa na madzi. 7 Tsono, mwa fala libodzi-bodziri, kudzulu na dziko la pantsi bzomwe bziripo ntsiku zino, bzakoyedwera moto pa ntsiku yakutongedwa na kupfudzidwa kwa wanthu wakuipa.

8 Tsono abale wakufunidwa, lekani kuyebwa kuti ntsiku ibodzi kwa Yahova iri ninga magole 1000 ndipo magole 1000 yali ninga ntsiku ibodzi. 9 Yahova akucedwa lini kukwanirisa bzomwe adalewa ninga momwe wanthu winango ambawonera kuti akucedwa, koma iye akupirira namwe, thangwe an’funa lini kuti munthu ali-wentse adzapfudzidwe, koma an’funa kuti wanthu wentse akungule. 10 Tsono ntsiku ya Yahova in’dzabwera ninga mbava, pomwe kudzulu kun’dzanyembereka na kugunda kwa mphanvu, ndipo bzinthu bza kudzulu bzin’dzapsa kwene-kwene bzicisungunuka, ndipo dziko na mabasa yace bzin’dzawonekera padeca.

11 Pakuti bzinthu bzentsenebzi bzin’dzasungunuka mwa njira imweyi, kumbukirani mtundu wa munthu omwe mun’funika kukhala. Mun’funika kukhala wanthu wa makhalidwe yakucena, mucimbacita bzinthu bzomwe bzin’latiza kuti ndimwe wanthu wakubzipereka kwa Mulungu, 12 pomwe mukudikhira na kukumbukira* bza kubwera kwa ntsiku ya Yahova, pomwe kudzulu kun’dzapfudzidwa na moto, ndipo bzinthu bza kudzulu na bza pa dziko la pantsi bzin’dzasungunuka thangwe ra kutentha kwene-kwene. 13 Tsono, pana kudzulu kupsa na dziko la pantsi lipsa bzomwe tikudikhirira mwakubverana na bzomwe iye adalewa, ndipo m’mwemo mun’dzakhala cirungamo.

14 Tenepo, abale wangu wakufunidwa, pakuti mukudikhirira bzinthu bzimwebzi, citani ciri-centse comwe mungakwanise kuti mukhale wakucena pamaso pa Mulungu, wakusaya mathangwe na wa mtendere. 15 Kuthumizira bzimwebzi, onani kupirira kwa Mbuya wathu ninga cipulumuso, ninga momwe m’bale wathu wakufunidwa Paulo adakunemberanimbo mwakubverana na nzeru zomwe adapasidwa. 16 Iye adafotokoza bzimwebzi ninga momwe adacitira m’matsamba yace yentse. Tsono m’matsamba yaceyo mukhana bzinthu bzinango bzakunesa kubvesesa bzomwe wanthu wakusaya kupfunzisidwa na wakutepa m’cikhulupiro* akubzicinja ninga momwe ambacitira na Bzinembo bzinango. Bzimwebzi bzin’dzawacitisa kuti apfudzidwe.

17 Tenepo abale wakufunidwamwe, pakuti mukudziwiratu bzimwebzi, cenjerani kuti muleke kutengeka na bzakuphonya bza wanthu wakusaya kubvera malamulo, kugopera kuti mungatazire kukhala wakulimba ndipo mungagwe. 18 Koma pitirizani kutambira kudeka mtima kukulu na kumudziwa Mbuya na Mpulumusi wathu Jezu Kristu. Kwa iye kukhale ulemerero lero mpaka kale-kale. Ameni.