TSAMBA LAKUYAMBA LA JUWAU

1 Tikukunemberani bza ule omwe alipo kuyambira pa ciyambi, omwe ambabweresa mafala yakupasa moyo, omwembo tamubva na kumuwona na maso yathu, ticimunyang’anisisa na kumukhuya na manja yathu, 2 (inde, moyo udazimbulidwa kwa ifepano ndipo ifepano tauwona ndipo tikuucitira umboni na kuudziwisa kwa imwepo. Moyo wakusaya kumala umweyu, udacokera kwa Baba ndipo udawonesedwa kwa ifepano), 3 ifepano tikukudziwisanimbo bzomwe tidabva na kuwona, kuti imwepo mukhale wakuphatana na ife ninga momwe ifepano tiriri wakuphatana na Baba pabodzi na Mwana wace Jezu Kristu. 4 Ndipo tikunemba bzimwebzi kuti cikondweso cathu cikhale cakukwana.

5 Mafala yomwe tidabva kwa iye yomwe tikukuuzani ni aya: Mulungu ni ceza, ndipo kwa iye kulibe mdima ne na pang’onopo. 6 Ifepano tikalewa kuti: “Ndife wakuphatana na iye,” koma tikapitiriza kufamba mu mdima, ndiye kuti tikunama ndipo tikuteweza lini cadidi. 7 Tsono tikafamba pa ceza ninga momwe iye aliri pa ceza, tin’dzakhala wakuphatana ndipo mulopa wa Jezu, omwe ni Mwana wace, un’dzacenesa pikado zathu.

8 Ifepano tikalewa kuti: “Tiribe pikado ife,” tikubzinamiza tekha ndipo tiribe cadidi. 9 Tikazimbula pikado zathu, iye an’dzatilekerera thangwe ngwakukhulupirika na wakulungama ndipo an’dzaticenesa ku bzicito bzathu bzentse bzakuipa. 10 Tikalewa kuti: “Timbacita lini pikado ife,” timbakhala ninga tikulewa kuti Mulungu ngwakunama ndipo timbakhulupira lini fala lace.

2 Wana wangu wakufunidwa, ndikukunemberani bzinthu bzimwebzi kuti muleke kucita pikado. Tsono munthu akacita pikado, ifepano tina mthandizi omwe ni Jezu Kristu munthu wakulungama omwe ali pabodzi na Baba. 2 Iye ni ntsembe yakumpsinkha pikado zathu, yomwe idacitisa kuti tibverane pomwe na Mulungu, sikuti yakumpsinkha pikado zathu zokha basi, koma na za wanthu pa dziko lentse la pantsi. 3 Tikapitiriza kubvera malamulo yace, bzin’dzawoneka padeca kuti timbamudziwa. 4 Ule omwe anilewa kuti: “Ine nimbamudziwa,” koma akasaya kubvera malamulo yace, munthu umweyo ngwakunama ndipo iye ambalewa lini cadidi. 5 Tsono munthu omwe ambabvera fala lace, ambalatiza padeca kuti iye ambafuna Mulungu. Na bzimwebzi, ifepano timbadziwa kuti ndife wakuphatana naye. 6 Ule omwe anilewa kuti akupitiriza kukhala wakuphatana naye, an’funika kucita bzinthu ninga momwe Jezu akhacitira.*

7 Abale wangu wakufunidwa, ndikukunemberani lini lamulo lipsa, koma lamulo lakale-kale lomwe imwepo mumbalidziwa kuyambira paciyambi. Lamulo lakale-kale limweri ni fala lomwe imwepo mudalibva. 8 Tsono napo bziri tenepo, ndikukunemberani lamulo lipsa lomwe Jezu adaliteweza ndipo imwepo mumbalitewezambo, thangwe mdima ukumala ndipo ceza cacadidi cayamba kale kubvunika.

9 Ule omwe anilewa kuti ali pa ceza koma akuwenga m’bale wace, munthu umweyo akali mu mdima. 10 Ule omwe ambafuna m’bale wace ndiye kuti akupitiriza kukhala pa ceza, ndipo kwa iye palibe mwala omwe ungamukhukhumudwise. 11 Tsono ule omwe aniwenga m’bale wace, munthu umweyo ali pa mdima ndipo akufamba pa mdima; iye akudziwa lini komwe akuyenda thangwe mdima wafunga maso yace.

12 Ndikunembera imwe wana wangu wakufunidwa, pakuti pikado zanu zalekereredwa thangwe ra dzina lace. 13 Ndikunembera imwepo azipai, thangwe mwafika pakudziwa ule omwe alipo kuyambira paciyambi. Ndikunembera imwepo maswaka, thangwe mwakunda Sathani.* Ndikunembera imwepo wanamwe, thangwe mwafika pakudziwa Mulungu Baba wathu. 14 Ndikunembera imwepo azipai, thangwe mwafika pakudziwa ule omwe alipo kuyambira paciyambi. Ndikunembera imwepo maswaka, thangwe ndimwe wamphanvu, pakuti Fala la Mulungu liri mwa imwepo ndipo mwakunda Sathani.

15 Lekani kufuna dziko ayai bzinthu bza m’dziko. Penu munthu an’funa dziko, ndiye kuti lufoyi la Baba liri lini mwa iye; 16 thangwe bzinthu bzentse bzomwe bziri m’dziko, ninga cikhumbo ca thupi, cikhumbo ca maso na kubziwonesera pa bzinthu bzomwe munthu anabzo, bzimbacokera lini kwa Baba, koma kudziko. 17 Kuthumizira bzimwebzi, dziko lin’dzamala pabodzi na bzinthu bzace bzentse bzomwe wanthu ambabzifuna, tsono ule omwe ambacita bzomwe Mulungu ambafuna, an’dzakhala mpaka kale-kale.

18 Wana wangu wakufunidwa, ino ni nthawe yakumalizira. Ndipo ninga momwe mudabvera kuti akubwera anyakulamba Kristu, napo tsapano, alipo azinji anyakulamba Kristu, ndipopa tikudziwa kuti ino ni nthawe yakumalizira. 19 Iwo adacoka pakati pathu thangwe akhali lini m’thimu lathu. Pakuti angadakhala kuti akhali m’thimu lathu, iwo angadapitiriza kukhala nafe. Tsono iwo adacoka kuti bziwoneke padeca kuti ni wentse lini omwe akhali m’thimu lathu. 20 Imwepo mudadzozedwa na ule omwe ngwakucena, ndipo mwentsenemwe mukudziwa cadidi. 21 Ndikukunemberani, sikuti thangwe rakuti mumbadziwa lini cadidi, koma thangwe rakuti mukucidziwa nakuti kunama kuli-kwentse kumbacokera lini m’cadidi.

22 Kodi mbani omwe angakhale nyakunama kuposa ule omwe ambagaza kuti Jezu ni Kristu? Umweyo ni nyakulamba Kristu, ule omwe ambalamba Baba na Mwana. 23 Munthu ali-wentse omwe anilamba Mwanayo, angakhale lini pa uxamwali na Baba. Tsono ule omwe ambadziwa Mwana ambadziwambo Baba. 24 Tsono kwa imwepo, bzinthu bzomwe mudabva kuyambira paciyambi, bzin’funika kupitiriza kukhala mu mtima mwanu. Penu bzomwe mudabvabzo kuyambira paciyambi bzin’pitiriza kukhala mu mtima mwanu, imwepo mun’dzapitirizambo kukhala wakuphatana na Mwana pabodzi na Baba. 25 Kuthumizira bzimwebzi iye adalewa kuti an’dzatipasa moyo wakusaya kumala.

26 Ndikukunemberani bzinthu bzimwebzi thangwe wanthu winango akufuna kukupumpsani. 27 Pakuti Mulungu adakudzozani na mzimu wace wakucena, mzimuyo ukupitiriza kukhala mwa imwepo ndipo pan’funika lini kuti munthu munango akupfunziseni. Tsono Mulungu adaphatisa basa mzimu umweyu kuti ukupfunziseni bzinthu bzentse ndipo mzimuyo ngwacadidi sikuti wakunama. Tenepo, pitirizani kukhala wakuphatana na iye ninga momwe mzimuyo udakupfunzisirani. 28 Tenepo, wana wangu wakufunidwamwe, pitirizani kukhala wakuphatana na iye, kuti akadzawonesedwa, tidzakwanise kulewalewa na citsimikizo nakuti tileke kudzacoka pamaso pace na manyazi pa nthawe yakuwonekera kwace. 29 Penu mumbadziwa kuti iye ngwakulungama, ndiye kuti mumbadziwambo kuti ule omwe ambacita cirungamo adabadwa mwa iye.

3 Onani lufoyi likulu lomwe Baba adalilatiza kwa ifepano, mwa kutipasa mwayi wakucemeredwa wana wa Mulungu. Ndipo ndifedi wana wace. Tsono dziko limbatidziwa lini, thangwe iro liribe kufika pa kumudziwa iye. 2 Wakufunidwa abale, tsapano ndife wana wa Mulungu, tsono bzikanati kuzimbulidwa kuti tin’dzakhala yani. Tikudziwa kuti iye akadzawonekera, ifepano tin’dzakhala ninga iye, thangwe tin’dzamuwona ninga momwe iye aliri. 3 Ndipo ali-wentse omwe ana cidikhiro cimweci mwa iye, ambabzicenesa ninga momwe iye aliri wakucena.

4 Ali-wentse omwe ambacita pikado ambakhalambo akuphonyera lamulo. Thangwe pikado ni kuphonyera lamulo. 5 Imwepo mun’dziwambo kuti iye adabwera* kuti adzacose pikado zathu ndipo iye alibe pikado. 6 Munthu ali-wentse omwe ambapitiriza kukhala wakuphatana na iye ambacita lini pikado; munthu omwe ambacita pikado ambamudziwa lini ndipo ne ambamukhulupira lini. 7 Wanamwe, lekani kubvuma kuti munthu akupumpseni; munthu omwe ambacita bzinthu bzakulungama, ngwakulungama, ninga momwe iye aliri wakulungama. 8 Munthu omwe ambacita pikado ali kumbali* ya Dyabu, thangwe Dyabu akucita pikado kuyambira paciyambi. Thangwe ra bzimwebzi, Mwana wa Mulungu adawonekera kuti apfudze mabasa ya Dyabu.

9 Munthu ali-wentse omwe ni mwana wa Mulungu ambapitiriza lini kucita pikado, thangwe mzimu Wace wakucena* umbapitiriza kukhala mwa munthu umweyu ndipo iye ambacita lini pikado thangwe ni mwana wa Mulungu. 10 Wana wa Mulungu na wana wa Dyabu ambadziwika mu njira iyi: Munthu ule omwe ambacita lini bzinthu bzacirungamo, alibe kucokera kwa Mulungu ndipo mpsibodzi-bodzimbo na munthu ule omwe ambafuna lini m’bale wace. 11 Pakuti yamweya ni mafala yomwe mudabva kuyambira paciyambi, yakuti timbafunane; 12 tin’funika lini kukhala ninga Kaini, omwe ni mwana wa Dyabu* ndipo adapha m’bale wace. Tsono thangwe ranyi iye adapha m’bale waceyo? Thangwe mabasa yace yakhali yakuipa, koma mabasa ya m’bale waceyo yakhali yakulungama.

13 Abale, dziko likambakuwengani lekani kudabwa. 14 Ifepano tikudziwa kuti tikhadafa, tsono pano tina moyo thangwe timbafuna abale. Ule omwe ambafuna lini m’bale wace ndiye kuti akali wakufa. 15 Pakuti munthu ali-wentse omwe ambawenga m’bale wace ngwakupha, ndipo imwepo mukudziwa kuti munthu wakupha an’dzatambira lini moyo wakusaya kumala. 16 Thangwe ra bzimwebzi, ifepano tadziwa lufoyi pakuti iye adapereka moyo wace thangwe ra ife, ndipo ifepanombo tin’funika kupereka moyo wathu thangwe ra abale wathu. 17 Tsono penu munthu anabzo bzinthu bzentse bzakuti asamalire nabzo moyo wace, ndipo akuwona m’bale wace akufuna thandizo, koma ne kumubvera ntsisi, kodi munthu umweyu ambafuna Mulungu? 18 Wana wangu wakufunidwa, ifepano tin’funika kumbafunana, sikuti na mafala yokha ayai na pa mulomo pokha, koma tin’funika kumbalatizana lufoyi lacadidi m’bzicito bzathu.

19 Mwa njira imweyi tin’dzadziwa kuti tidacokera m’cadidi ndipo tin’dzaderekhesa mitima yathu pamaso pace. 20 Ndipo napo mitima yathu icitipasa mulandu, Mulungu ni mkulu kuposa mitima yathuyo ndipo iye ambadziwa bzinthu bzentse. 21 Abale wakufunidwa, penu mtima wathu un’tipasa lini mulandu ndiye kuti tin’khala na ufulu bwakulewalewa na Mulungu. 22 Ndipo cinthu ciri-centse comwe tingamukumbire iye an’dzatipasa, thangwe timbabvera malamulo yace, ndipo timbacita bzinthu bzomwe bzimbamudekera. 23 Kulewa cadidi, lamulo lace ndakuti tikhale na cikhulupiro m’dzina la Mwana wace Jezu Kristu nakuti timbafunane mwakubverana na lamulo lomwe iye adatipasa. 24 Kuthumizira bzimwebzi, ule omwe ambabvera malamulo yace, ambapitiriza kukhala wakuphatana na iye ndipo iyembo ambakhala wakuphatana naye. Ndipo thangwe ra mzimu omwe iye adatipasa, tikudziwa kuti iye an’dzapitiriza kukhala wakuphatana nafe.

4 Wakufunidwa abale, lekani kumbandokhulupira mafala yali-yentse yakufuliziridwa, koma mbawonani penu mafalayo yakucokeradi kwa Mulungu, thangwe apolofeta azinji wakunama apita m’dziko.

2 Imwepo mungakwanise kudziwa penu mafala yakufuliziridwayo yakucokera kwa Mulungu mwa njira iyi: Penu mafala yakufuliziridwayo yakulatiza padeca kuti Jezu Kristu adabwera ninga munthu, ndiye kuti yacokera kwa Mulungu. 3 Tsono penu mafala yakufuliziridwayo yakulewa lini padeca kuti Jezu adabwera ninga munthu, yakucokera lini kwa Mulungu. Kuthumizira bzimwebzi, yamweya ni mafala yakufuliziridwa na anyakulamba Kristu yomwe mudabva kuti yangadabwera ndipo tsapano yamwazika m’dziko.

4 Wanamwe, imwepo mudacokera kwa Mulungu ndipo mudakunda apolofeta wakunama, thangwe Mulungu omwe ngwakuphatana na imwepo ni mkulu kuposa Dyabu omwe ngwakuphatana na dziko. 5 Iwo adacokera m’dziko, ndipopa ambalewalewa bzinthu bzakucokera m’dziko ndipo dzikolo limbawatetekera. 6 Ife ndife wakucokera kwa Mulungu ndipo ule omwe ambadziwa Mulungu ambatibvesera. Tsono ule omwe alibe kucokera kwa Mulungu ambatibvesera lini. Na bzimwebzi, timbakwanisa kuzindikira mafala yakufuliziridwa yacadidi na mafala yakufuliziridwa yakunama.

7 Abale wakufunidwa, mbatipitirizeni kumbafunana, thangwe lufoyi limbacokera kwa Mulungu, ndipo munthu ali-wentse omwe ana lufoyi ni mwana wa Mulungu ndipo ambamudziwa Mulunguyo. 8 Munthu ali-wentse omwe alibe lufoyi ambamudziwa lini Mulungu, thangwe Mulungu ni lufoyi. 9 Mulungu adalatiza lufoyi lace kwa ifepano mwa kutumiza pa dziko la pantsi Mwana wace m’bodzi yekha, kuti mwa iye tikwanise kugumana moyo wakusaya kumala. 10 Mulungu adatumiza Mwana wace ninga ntsembe yakumpsinkha pikado zathu ndipo iye adacita bzimwebzi thangwe adatifuna, sikuti ife kufuna iye.

11 Wakufunidwa abale, penu Mulungu adatifuna mwa njira imweyi, ifepano tin’funikambo kumbafunana. 12 Palibe munthu omwe adawona kale Mulungu. Tikapitiriza kumbafunana, Mulungu an’pitirizambo kukhala nafe ndipo lufoyi lace limbacitisidwa kukhala lakulungama pakati pathu. 13 Na bzimwebzi, ifepano tikudziwa kuti tikupitiriza kukhala wakuphatana na iye ndipo iyembo ngwakuphatana na ife, thangwe iye adatipasa mzimu wace. 14 Kuthumizira bzimwebzi, ifepano tidawona tekha ndipo tikucitira umboni kuti Baba adatuma Mwana wace kuti adzapulumuse dziko. 15 Ali-wentse omwe ambadziwa kuti Jezu ni Mwana wa Mulungu, Mulunguyo an’dzapitiriza kukhala wakuphatana na iye ndipo iyembo an’dzakhala wakuphatana na Mulungu. 16 Ndipo ifepano timbadziwa lufoyi lomwe Mulungu analo kwa ife ndipo timbakhulupira lufoyi limweri.

Mulungu ni lufoyi, ndipo ule omwe an’pitiriza kulatiza lufoyi, an’pitirizambo kukhala wakuphatana na Mulungu ndipo Mulunguyo an’dzapitirizambo kukhala wakuphatana na iye. 17 Mwa njira imweyi, lufoyi lidalatizidwa mwakulungama pakati pathu, kuti tidzakwanise kulewalewa mwakutsimikiza pa ntsiku yakutongedwa. Pakuti ninga momwe Jezu Kristu aliri, ifepanombo tiri tenepo m’dzikoli. 18 Munthu omwe ambafuna Mulungu alibe mantha, pakuti lufoyi lakulungama limbaticitisa kukhala wakusaya mantha, thangwe penu munthu ana mantha, manthayo yambamuphingiza.* Kulewa cadidi, lufoyi la munthu omwe ana mantha ndakusaya kulungama. 19 Ifepano timbalatiza lufoyi thangwe iye ndiye omwe adayamba kutifuna.

20 Penu munthu an’lewa kuti: “Nimbafuna Mulungu,” koma ambawenga m’bale wace, munthu umweyo ngwakunama. Pakuti ule omwe ambafuna lini m’bale wace omwe ambamuwona, angakwanise lini kufuna Mulungu omwe ambamuwona lini. 21 Ndipo iye adatipasa lamulo iri: Ule omwe ambafuna Mulungu, an’funikambo kumbafuna m’bale wace.

5 Munthu ali-wentse omwe ambakhulupira kuti Jezu ni Kristu, munthu umweyo ni mwana wa Mulungu, ndipo munthu ali-wentse omwe ambafuna Mulungu ambafunambo wana wa Mulunguyo. 2 Tikambafuna Mulungu na kucita bzomwe malamulo yace yambalewa, timbafunambo wana wa Mulunguyo. 3 Pakuti kufuna Mulungu kumbathandauza kubvera malamulo yace, ndipo malamulo yaceyo njakulemera lini. 4 Thangwe munthu ali-wentse omwe ni mwana wa Mulungu, ambakunda dziko. Ndipo na cikhulupiro cathu tidakunda dziko.

5 Kodi ni mbani omwe angakunde dziko? Ni ule lini omwe ambakhulupira kuti Jezu ni Mwana wa Mulungu? 6 Jezu Kristu adabwera na madzi na mulopa, iye alibe kundobwera na madzi yokha, koma adabwera na madzi na mulopa. Ndipo mzimu ndiwo omwe ukucitira umboni, thangwe mzimuyo ni cadidi. 7 Pakuti pana bzinthu bzitatu bzomwe bzikucitira umboni. 8 Mzimu wakucena, madzi na mulopa, ndipo bzinthu bzitatubzi bzimbapereka umboni bwakubverana.

9 Ifepano tabvuma umboni bwa wanthu, tsono umboni bwa Mulungu n’bukulu kwene-kwene. Pakuti Mulunguyo akupereka yekha umboni pakulewa bza Mwana wace. 10 Munthu omwe ambakhulupira Mwana wa Mulungu, ambalatiza kuti ana bzinthu bzomwe Mulungu adamupfunzisa mu mtima mwace. Munthu omwe ambakhulupira lini Mulungu, akucitisa Mulunguyo kukhala wakunama, thangwe iye alibe kukhulupira umboni bomwe Mulungu adapereka pakulewa bza Mwana wace. 11 Umboni bomwe Mulungu adatipasa ni moyo wakusaya kumala, ndipo moyo umweyu umbabwera na Mwana wace. 12 Ule omwe an’bvuma Mwanayu, anawo moyo wakusaya kumala, tsono ule omwe an’lamba Mwana wa Mulungu alibembo moyoyo.

13 Ndikukunemberani bzinthu bzimwebzi imwepo omwe mumbakhulupira m’dzina la Mwana wa Mulungu kuti mudziwe kuti muna moyo wakusaya kumala. 14 Ndipo ifepano tina citsimikizo mwa iye cakuti* bziribe basa bzomwe tikumbirebzo, tikakumbira mwakubverana na kufuna kwace, iye an’dzatibva. 15 Ndipo tikadziwa kuti iye ambatibva pa cinthu ciri-centse comwe tikumbireco, timbadziwambo kuti tin’dzatambira bzomwe takumbirabzo, thangwe takumbira iye.

16 Munthu akawona m’bale wace akucita pikado yomwe ingamubweresere lini infa, akumbire kwa Mulungu ndipo Mulunguyo an’dzamupasa moyo. Inde an’dzapasa moyo wale omwe ambacita pikado zakusaya kubweresa infa. Tsono iripo pikado yomwe imbabweresa infa. Tenepo, ndikulewa lini bza pikado ya mtundu umweyu yomwe mun’funika kuipempherera. 17 Bzicito bzentse bzakusaya kulungama ni pikado, tsono iripo pikado yomwe imbabweresa lini infa.

18 Tin’dziwa kuti munthu ali-wentse omwe adabadwa mwa Mulungu ambacita lini pikado, thangwe iye ambanyang’aniridwa na Mwana wa Mulungu* ndipo nyakuipayo ambakwanisa lini kumuphata.* 19 Timbadziwa kuti ifepano tidacokera kwa Mulungu, tsono dziko lentse liri m’manja mwa nyakuipayo. 20 Tsono ifepano timbadziwa kuti Mwana wa Mulungu adabwera acitipasa nzeru* kuti tidziwe Mulungu wacadidi. Ndipo ifepano ndife wakuphatana na ule omwe ngwacadidi, mwa kuphatisa basa Mwana wace Jezu Kristu. Umweyu ni Mulungu wacadidi na moyo wakusaya kumala. 21 Wanamwe, tcenkhani kunamata bzifanikiso.