TSAMBA LACIWIRI LA JUWAU

1 Ine ndine wacikulire* ule, ndipo ndikunembera iwepo. Ndikunembera iwepo mkazi wakusankhulidwa na Mulungu pabodzi na wana wako. Kulewa cadidi, inepano nimbakufunani, tsono sikuti ine ndekha koma mumbafunidwambo na wentse omwe ambadziwa mapfunziso yacadidi. 2 Timbakufunani thangwe ra cadidi comwe cikupitiriza kukhala mu mtima mwathu ndipo cin’dzapitiriza mpaka kale-kale. 3 Mulungu Baba wakudzulu na Mwana wace Jezu Kristu, an’dzatipasa bzipfunziso bzimwebzi bzacadidi na lufoyi. Iwo an’dzatipasa kudeka mtima kukulu, an’dzatilatiza ntsisi ndipo an’dzatipasambo mtendere.

4 Ndikukondwa kwene-kwene kudziwa kuti wana wanu winango akufamba m’cadidi, mwakubverana na lamulo lomwe tidatambira kucokera kwa Baba. 5 Tsapano mkaziwe, ndikukumbira kuti timbafunane. (Ndikunembera iwepo, sikuti lamulo lipsa koma lamulo lomwe tinalo kuyambira paciyambi.) 6 Ndipo lufoyi limbathandauza ibzi: Tipitirize kufamba mwakubverana na malamulo yace. Iri ni lamulo lomwe mudalibva kuyambira paciyambi: Mbalatizani lufoyi nthawe zentse. 7 Pakuti anyakupumpsa azinji apita m’dziko, wale omwe ambazindikira lini kuti Jezu Kristu adabwera ninga munthu. Iwo mbanyakupumpsa ndipo ambalamba Kristu.

8 Khalani tceru kuti muleke kuluza bzinthu bzentse bzomwe tidabziphatira basa, m’mbuto mwace, mudzatambire bzisimbo bzentse bzomwe Mulungu adakukonzerani. 9 Munthu ali-wentse omwe ambateweza lini bzipfunziso bza Kristu ndipo ambapfunzisa bzakusiyana na bzimwebzi ambabvumidwa lini na Mulungu. Ndipo ule omwe an’pitiriza kuteweza mapfunziso ya Kristu, umweyo ngwakubvumidwa na Baba pabodzi na Mwana. 10 Munthu ali-wentse akabwera kwa imwepo acipfunzisa cipfunziso cakusiyana na comwe Kristu adapfunzisa, lekani kumutambira kumui kwanu ne kumusana naye. 11 Pakuti ule omwe anim’musa akugawana naye mabasa yace yakuipa.

12 Napo kuti ndina bzinthu bzizinji kuti ndikunembereni, nin’funa lini kucita kunemba patsamba na tinta, koma ndikufuna kukuzungirani kuti ndidzalewelewe namwe maso na maso, kuti cikondweso canu cikhale cakudzala.

13 Wana wa mpfumakazi yako yakusankhulidwa akupereka kulimba.