APOKALIPSE

1 Jezu Kristu adatumiza anjo wace kwa mtumiki wace Juwau kuti akamulatize bzinthu bzomwe bzin’funika kucitika mwakamfulumize kutsogolo, 2 omwe adacitira umboni fala lakuperekedwa na Mulungu, na umboni bwakuperekedwa na Jezu Kristu, inde, umboni bwa bzinthu bzentse bzomwe iye adawona. 3 An’kondwa mbale omwe aniwerenga mwakukuwa na wale omwe an’tetekera mafala ya m’polofesiyayi aciteweza bzinthu bzomwe bzidanembedwa m’mwemo, pakuti nthawe yakuikhidwiratu iri pafupi.

4 Ndine Juwau, ndikunembera magwere 7 ya m’cigawo ca Aziya kuti:

Mukhale na kudeka mtima kukulu na mtendere wakucokera kwa “Ule omwe alipo, omwe akhalipo na omwe akubwera” na kwa mizimu 7 yomwe iri patsogolo pa mpando wace wa Umambo, 5 na wakucokera kwa Jezu Kristu, “Mboni Yakukhulupirika,” “wakuyamba kubadwa kucokera kwa anyakufa” na “Mtongi wa amambo wa pa dziko la pantsi.”

Kwa ule omwe ambatifuna ndipo adatitsudzula ku pikado zathu na mulopa wace caiye. 6 Ndipo iye adatiikha kukhala amambo na antsembe kwa Mulungu wace na Baba, inde, kwa iye kukhale ulemerero na mphanvu mpaka kale-kale. Ameni.

7 Onani! Iye akubwera m’mitambo ndipo munthu ali-wentse an’dzamuwona, na wale omwe adamulasa na dipa; ndipo madzinza yentse ya pa dziko la pantsi yan’dzabzimenya pankhombe na msunamo thangwe ra iye. Inde, bzimwebzi bzin’dzacitikadi. Ameni.

8 “Ine ndine Alfa na Omega,”* walewa tenepo Yahova Mulungu, “Ule omwe alipo, omwe akhalipo na omwe akubwera, Wamphanvu-zentse.”

9 Ine Juwau, m’bale wanu na mwanzanu m’matsautso, mu umambo na kupirira mwakubverana na Jezu, ndikhali pa ntsuwa yakucemeredwa Patimo thangwe ra kupalizira mafala ya Mulungu na kucitira umboni bza Jezu. 10 Mwakutsogoleredwa na mzimu wakucena, ndidafika pa ntsiku ya Mbuya, ndipo m’mbuyo mwangu ndidabva fala lamphanvu ninga kulira kwa cimbututu, 11 lomwe lidati: “Bzomwe uwonebzo, nemba mu mpukutu ndipo ubzitumize ku magwere 7: Ku Efezo, Ejimirna, Pergamo, Tiyatira, Sarde, Filadelfiya na Laudiseya.”

12 Ndidazungunuka kuti ndiwone mbani omwe akhalewalewa nande, pomwe ndidazungunukapo, ndidawona bzakuikhira kandiyero bzinomwe bza oro, 13 ndipo pakati pa bzakuikhira kandiyerobzo pakhana munthu omwe akhali ninga Mwana wa munthu. Iye akhadabvala bzakubvala bzitali-bzitali bzomwe bzikhafika mpaka m’minyendo, ndipo akhadamanga bande la oro m’cifuwa mwace. 14 Kuthumizira bzimwebzi, tsisi la mu msolo mwace likhadacena ninga ukuse bwa bira mcena, ndipo likhadacenambo ninga pfulere ndipo maso yace yakhali ninga cirambi-rambi ca moto. 15 Ndipo minyendo yace ikhali ninga prata yabwino ikasungunusidwa pa moto, ndipo fala lace likhali ninga kuunga kwa madzi mazinji. 16 Ndipo boko lace lamadidi likhana nyenyezi 7, ndipo pa mulomo pace pakhana xipada itali yakuthwa kwentse-kwentse, nkhope yace ikhayetima ninga dzuwa likagaka kwene-kwene. 17 Pomwe ndidamuwona, inepano ndidagwa m’minyendo mwace ninga kuti ndafa.

Ndipo iye adandiphata na boko lace lamadidi acindiuza kuti: “Leka kugopa, inepano ndine Wakuyamba na Wakumalizira 18 na wamoyo. Ndikhadafa koma tsapano ndina moyo wakusaya kumala, ndipo ndina bzavi bza infa na bza Thenje.* 19 Tenepo, nemba bzomwe wawonabzi, bzomwe bzikucitika tsapanopa na bzomwe bzin’dzacitika bzimwebzi bzikamala. 20 Ici ni cintsintsi cakupambulika ca nyenyezi 7 zomwe wawona ku boko langu lamadidi na bzakuikhira kandiyero 7 bza oro: Nyenyezi 7 zikuimira anjo wa magwere 7 ndipo bzakuikhira kandiyero 7 bzikuimira magwere 7.

2 “Kwa anjo wa ku gwere la ku Efezo nemba kuti: Ibzi ndibzo bzomwe akulewa ule omwe ana nyenyezi 7 m’boko lace lamadidi omwe akufamba pakati pa bzakuikhira kandiyero 7 bza oro: 2 ‘Inepano nimbadziwa bzicito bzako, mabasa yako ya nyongo na kupirira kwako ndipo umbalekerera lini wanthu wakuipa, koma umbayeza wale omwe ambabziti ni apostolo pomwe ni apostolo lini, ndipo umbazindikira kuti iwo mbanyakunama. 3 Iwepo walatizambo kupirira ndipo wagumana na mabvuto mazinji thangwe ra dzina langu, koma ulibe kubwerera m’mbuyo. 4 Tsono, pana cinthu comwe ndiribe kukomedwa naco kwa iwepo, wasiya lufoyi lomwe ukhanalo pakuyamba.

5 “‘Tenepo, kumbukira bzomwe ukhacita ukanati kugwa, ndipo kungula, uciyamba pomwe kucita bzomwe ukhacita pakuyamba. Ukasaya kukungula, inepano nin’dzabwera kwa iwepo ndipo nin’dzacosa cakuikhira kandiyero cako pa mbuto yace. 6 Koma pana cinthu comwe iwepo umbacita bwino: Iwepo umbawenga mabasa ya kathimu ka Nikolau, ndipo inepano nimbakawengambo. 7 Ule omwe ana makutu, abve bzomwe mzimu ukulewa m’magwere kuti: Ule omwe an’kunda pa nkhondo nin’dzamubvumiza kudya muti wamoyo, omwe uli m’paraizo wa Mulungu.’

8 “‘Tenepo kwa anjo wa ku gwere la Ejimirna nemba kuti: Ibzi ni bzinthu bzomwe akulewa ‘Wakuyamba na Wakumalizira,’ ule omwe adafa acikhala pomwe na moyo: 9 ‘Ndikudziwa matsautso yako na kusauka kwako, koma ndiwe wakudala. Nimbadziwa kunyozedwa komwe umbacitidwa na wale omwe ambabziti ni Adjuda uko ndiwo lini koma ni nyumba yakunamatira* ya Sathani. 10 Leka kugopa mabvuto yomwe ugumane nayo. Dyabu an’dzapitiriza kuikha winango wa imwepo m’kawoko kuti muyezedwe kwene-kwene, ndipo imwepo mun’dzazunzidwa kwa ntsiku 10. Khala wakukhulupirika mpaka infa ndipo nin’dzakupasa mabaibai* ya moyo. 11 Ule omwe ana makutu abve bzomwe mzimu ukulewa m’magwere kuti: Ule omwe an’kunda an’dzabonera lini pa infa yaciwiri.’

12 “Kwa anjo wa gwere la Pergamo nemba kuti: Ibzi ni bzomwe ule omwe ana xipada itali yakuthwa kwentse-kwentse akulewa: 13 ‘Inepano nimbadziwa komwe iwepo umbakhala, kule komwe kuna mpando wa umambo wa Sathani; koma umbapitiriza kukhala wakukhulupirika kwa ine,* ndipo ulibe kulamba kuti umbandikhulupira napo mu ntsiku za Antipa, mboni yangu yakukhulupirika, yomwe idaphedwa pa mbali panu, kule komwe Sathani ambakhala.

14 “‘Tsono, pana bzinthu bzinango bzomwe ndiribe kukomedwa nabzo kuna iwepo, ni bzakuti pakati pako pana wanthu omwe ambatewera cipfunziso ca Balamu, omwe adapfunzisa Balaki kuti apumpse wana wa Ajirayeri kuti adye bzinthu bzakuperekedwa ntsembe ku bzifanikiso na kucita upombo ayai uputa.* 15 Mu njira ibodzi-bodziyi, pakati pako alipombo wale omwe ambatewera cipfunziso ca thimu la Nikolau. 16 Tenepo, kungula. Ukasaya kucita bzimwebzi, nin’bwera mwakamfulumize ndipo nin’dzamenya nawo nkhondo na xipada itali yakucokera pamulomo pangu.

17 “‘Ule omwe ana makutu, abve bzomwe mzimu ukulewa m’magwere kuti: Ule omwe an’kunda, Inepano nin’dzamupasa mana yakubisika, ndipo nin’dzamupasambo mwala mcena, ndipo mwalayo un’dzakhala udanemba dzina lipsa lomwe palibe omwe an’lidziwa kupambula ule omwe an’pasidwa.’

18 “Kwa anjo wa ku gwere la Tiyatira nemba kuti: Ibzi ni bzomwe Mwana wa Mulungu akulewa, ule omwe maso yace yali ninga moto omwe ukugaka ndipo minyendo yace iri ninga mkuwa wabwino: 19 ‘Ndikudziwa mabasa yako, lufoyi lako, cikhulupiro cako, utumiki bwako na kupirira kwako, ndipo ndikudziwa kuti mabasa yako ntsiku zino ni mazinji kuposa yakuyamba.

20 “‘Tsono pana cinthu comwe ndiribe kukomedwa naco kwa iwepo. Umbalekerera Jezabeli mkazi omwe ambabziti ni mpolofeta, ndipo iye ambapfunzisa na kusoceresa atumiki wangu kuti acite upombo ayai uputa* na kudya bzinthu bzakuperekedwa ntsembe ku bzifanikiso. 21 Ndipo ndamupasa nthawe yakuti akungule, tsono iye alibe kufuna kusiya uputa* bwacebo. 22 Ona! Ndasala pang’ono kumuduwalisa, ndipo wale omwe akhacita naye upombo nin’dzawaboneresa kwene-kwene akasaya kusiya bzinthu bzakuipa ninga bzomwe akhacita mkaziyu. 23 Inepano nin’dzapha wana wace na matenda yakugopswa kwene-kwene, ndipo magwere yentse yan’dzadziwa kuti ine ndine ule omwe nimbadziwa makumbukidwe* na bzomwe bziri mu mtima, ndipo nin’dzapasa ali-wentse mwakubverana na bzicito bzace.

24 “‘Na tenepo, ndikuuza winango wa imwepo ku Tiyatira, mwentse omwe mulibe kutewera cipfunziso cimweci, mwentse omwe mulibe kufika pakudziwa bzomwe bzimbacemeredwa “bzinthu bzakuzika bza Sathani”: Inepano nin’kusenzesani lini mtolo unango. 25 Koma ndophatisisani mwamphanvu bzire bzomwe munabzo mpaka ndikadzabwera. 26 Ndipo ule omwe an’kunda na kuteweza bzicito bzangu mpaka kuphampha, nin’dzamupasambo mphanvu yakutonga wanthu pa dziko, 27 ndipo iye an’dzatonga* wanthu na mpsimbo ya simbi, tenepo iwo an’dzasweka ninga combo ca dongo ninga momwe ndidapasidwira na Baba wangu. 28 Ndipo nin’dzamupasambo nyenyezi ya ku macibese.* 29 Ule omwe ana makutu abve bzomwe mzimu ukulewa m’magwere.’

3 “Kwa anjo wa ku gwere la ku Sarde nemba kuti: Ibzi ni bzinthu bzomwe walewa ule omwe ana mizimu 7 ya Mulungu na nyenyezi 7: ‘Nimbayadziwa bwino mabasa yako, umbawoneka ninga una moyo koma ndiwe wakufa. 2 Khala tceru ndipo limbikisa wale omwe akhadasala pang’ono kufa, thangwe ndawona kuti mabasa yako yalibe kucitidwa mwakukwanira pamaso pa Mulungu wangu. 3 Na tenepo, pitiriza kumbakumbukira bzomwe udatambira na bzomwe udabva, pitirizambo kubziteweza ndipo kungula. Kulewa cadidi, ukasaya kupenya nin’dzafika kwa iwepo ninga mbava, ndipo un’dzadziwa lini ne na pang’onopo nthawe yomwe nin’dzafika kwa iwepo.

4 “‘Tenepo, unawo wanthu ang’ono-ng’ono mu Sarde omwe alibe kupswipiza bzakubvala bzawo, ndipo iwo an’dzafamba nande adabvala bzakubvala bzicena, thangwe mbakuthemera. 5 Ule omwe an’kunda an’dzabvala bzakubvala bzicena, ndipo cipo ndicidzapfudza dzina lace m’bukhu la moyo, koma nin’dzadziwa dzina lace pamaso pa Baba wangu na pamaso pa anjo wace. 6 Ule omwe ana makutu abve bzomwe mzimu ukulewa m’magwere.’

7 “Kwa anjo wa gwere la ku Filadelfiya nemba kuti: Ibzi ni bzinthu bzomwe akulewa ule omwe ngwakucena, wacadidi, omwe ana xavi ca Davide, omwe akafungula palibe omwe angafunge ndipo akafunga palibe omwe angafungule: 8 ‘Ndikuyadziwa bwino mabasa yako, ndipo ndakufungulira msuwo omwe palibe angaufunge. Ndikudziwa kuti una mphanvu zing’ono-ng’ono ndipo wapitiriza kubvera mafala yangu ucilatiza kuti ndiwe wakukhulupirika kwa ine. 9 Wanthu omwe ambacokera m’nyumba yakunamatira* ya Sathani, omwe ambanama kuti ni Adjuda uko ndiwo lini, nin’dzawacitisa kubwera kwa iwepo acidzagodama m’minyendo mwako, ndipo nin’dzawacitisambo kudziwa kuti nimbakufuna. 10 Thangwe rakuti wabvera bzomwe udabva pakulewa bza kupirira kwangu, inepanombo nin’dzakukhotcerera pa nthawe yakuyezedwa yomwe ikubwera pa dziko lentse la pantsi, kuti wanthu wakukhala pa dziko lentse adzayezedwe. 11 Ndikubwera mwakamfulumize, pitiriza kuphatisisa comwe unaco kuti winango aleke kukutengera mabaibai* yako.

12 “‘Ule omwe an’kunda nin’dzamuikha kukhala mdjirikiro mu templo ya Mulungu wangu ndipo iye an’dzacoka lini m’mwemo. Nin’dzamunemba dzina la Mulungu wangu na mzinda wa Mulungu wanguyo, Jeruzalemu mupsa, wakubuluka kucokera kudzulu kwa Mulungu wangu ndipo nin’dzamunembambo dzina langu lipsa. 13 Ule omwe ana makutu abve bzomwe mzimu ukulewa m’magwere.’

14 “Kwa anjo wa gwere la ku Laudiseya nemba kuti: Ibzi ni bzinthu bzomwe Ameni walewa, mboni yakukhulupirika na yacadidi, wakuyamba kulengedwa na Mulungu: 15 ‘Ndikuyadziwa bwino mabasa yako, kuti ndiwe lini wakudjedjera ne wakupsa, koma ndikhafuna kuti ukhale wakudjedjera ayai wakupsa. 16 Pakuti ndiwe wakuthuma, ndipo ulibe kupsa ne kudjedjera, nin’kusanza. 17 Tsono iwepo ukulewa kuti, “ndidadala, ndagumana cuma cizinji ndipo palibe comwe nimbasaya,” tsono iwepo ukudziwa lini kuti ndiwe wakubonera, wakupasa ntsisi, wakusauka, zimola ndipo uli pezi. 18 Ndikukucenjeza kuti ugule kwa ine oro yakusungunusidwa na moto kuti udale. Gula bzakubvala bzicena kuti ubvale, kugopera kuti wanthu angakuwone uli pezi ucicita manyazi. Ndipo gula mankhwala uciikha m’maso mwako kuti uwone.

19 “‘Wentse omwe nimbawafuna, nimbawatsimula na kuwalanga. Tenepo, khala wakubzipereka ndipo kungula. 20 Ona! Ndidaima pa msuwo ndipo ndikugogodza. Ule omwe anibva fala langu acifungula msuwoyo, nin’dzapita m’nyumba mwace ndipo iye pabodzi na ine tin’dzalalira pabodzi. 21 Ule omwe an’kunda nin’dzamubvumiza kukhala nande pa mpando wangu wa umambo, ninga momwe ine ndakundira ndipo ndakhala pabodzi na Baba wangu pa mpando wace wa umambo. 22 Ule omwe ana makutu abve bzomwe mzimu ukulewa m’magwere.’”

4 Pomwe bzimwebzi bzidamala, ndidawona msuwo wakufunguka kudzulu. Fala lakuyamba lomwe ndidabva likulewalewa nande, likhali ninga cimbututu. Falalo lidati: “Kwira kuno, ndipo nin’dzakulatiza bzinthu bzomwe bziti bzicitike tsapanopa.” 2 Ndipo pa nthawe imweyoletu, mzimu wa Mulungu udayamba kuphata basa mwa inepano. Ndidawona mpando wa umambo kudzulu ndipo munthu akhadakhala pa mpandopo. 3 Ndipo Omwe akhadakhala pa mpando wa umamboyo, mawonekedwe yace yakhali ninga mwala wa jaspe na wa sardiyo,* ndipo mphepete mwa mpandoyo mukhana citaleza* comwe cikhana mawonekedwe ninga mwala wa esmeralda.*

4 Ndipo mpando waumamboyo ukhadazunguliridwa na mipando ya umambo 24 ndipo m’mipandomo mukhadakhala akulu-akulu 24 omwe akhadabvala bzakubvala bzicena, ndipo mu msolo mwawo mukhana korowa za oro. 5 Pa mpando wa umambopo pakhambacoka bziphaliwali, mafala na kugunda. Ndipo pakhana mitsatso minomwe ya moto patsogolo pa mpando wa umamboyo, ndipo mitsatsoyo ikuimira mizimu 7 ya Mulungu. 6 Ndipo kutsogolo kwa mpando wa umamboyo kukhana cinthu cakuwoneka ninga nyanza ya vidru, yakucena kuti mbee, yakuyetima kwene-kwene.

Ndipo pakati pa mpando wa umamboyo na mphepete mwace, mukhana anjo anai omwe akhana maso mazinji, kutsogolo na kumbuyo. 7 Anjo wakuyamba akhali ninga mphondolo, waciwiri akhali ninga mkono wa ng’ombe, wacitatu akhana nkhope ninga ya munthu ndipo wacinai akhali ninga mphungu yomwe ikumbuluka. 8 Ali-wentse wa anjo anaiwo akhana maphaphidwe 6 ndipo maphaphidweyo yakhana maso mazinji kuphatanidzambo kuntsi kwace. Ntsiku zentse usiku na masikati, iwo akhambalewa kuti: “Wakucena, wakucena, wakucena ni Yahova Mulungu Wamphanvu-zentse, omwe akhalipo, omwe alipo na omwe akubwera.”

9 Nthawe zentse pomwe anjowo ambapereka ulemerero na ulemu na kutenda Ule omwe adakhala pa mpando wa umambo, Ule omwe an’pitiriza kukhala mpaka kale-kale, 10 akulu-akulu 24 wale ambagodama pamaso pa Ule omwe adakhala pa mpando wa umambo, acinamata Ule omwe an’pitiriza kukhala na moyo mpaka kale-kale. Ndipo iwo ambathusa korowa zawo, patsogolo pa mpando wa umamboyo acimbalewa kuti: 11 “Ndimwe wakuthemera imwe Yahova Mulungu wathu, kupasidwa ulemerero, ulemu na mphanvu thangwe mudalenga bzinthu bzentse, ndipo thangwe ra kufuna kwanu bziripo ndipo bzidalengedwa.”

5 Ndipo ndidawona tsamba lakufunya lomwe likhadanembedwa mbali zentse ziwiri ku boko lamadidi la Ule omwe adakhala pa mpando wa umambo, ndipo likhadafungidwa bwino na selo zinomwe. 2 Ndipo ndidawona anjo wamphanvu akubvunza mwakukuwa kuti: “Mbani omwe an’themera kufungula tsambali pabodzi na selo zace?” 3 Tsono palibe na m’bodziyo ne kudzulu ne pa dziko la pantsi ne pantsi pa dziko la pantsi omwe angadakwanisa kufungula tsambalo ayai kuwona bzomwe bzikhadanembedwa m’mwemo. 4 Tenepo, inepano ndidayamba kulira kwene-kwene, thangwe palibe kugumanika munthu omwe akhathemera kufungula tsambalo ayai kuwona bzomwe bzikhadanembedwa m’mwemo. 5 Tsono m’bodzi wa akulu-akulu wale adandiuza kuti: “Leka kulira. Ona! Mphondolo ya dzinza la Djuda, muzi wa Davide wakunda, mwakuti ngwakuthemera kukwatula selo zinomwe na kufungula tsambalo.”

6 Patsogolo pace ndidawona Mwana wa bira omwe akhawoneka ninga wakufa, omwe akhadaima kati na kati ya mpando wa umambo, ndipo akhadazunguliridwa na anjo anai pabodzi na akulu-akulu. Mwana wa birayo akhana nyanga 7 na maso 7 ndipo masoyo yambaimira mizimu minomwe ya Mulungu yakutumidwa pa dziko lentse la pantsi. 7 Mwana wa birayo adafendera ndipo adatambira tsamba lakufunya lire lomwe likhali ku boko lamadidi la Ule omwe akhadakhala pa mpando wa umambo. 8 Pomwe iye adatenga tsamba lakufunyalo, anjo anai wale pabodzi na akulu-akulu 24 wale, adagodama pamaso pa Mwana wa Bira, ndipo ali-wentse wa iwo akhana viyola* na tijela ya oro yomwe ikhadadzala na bzakufukiza. (Bzakufukizabzo bzimbaimira mipembo ya anyakucena.) 9 Ndipo iwo adayamba kuimba nyimbo ipsa yakuti: “Imwepo ndimwe wakuthemera kufungula tsamba lakufunyali na selo zace, thangwe mudaphedwa ndipo mudagula wanthu na mulopa wanu kuti atumikire Mulungu. Wanthu wakucokera ku dzinza liri-lentse, cirewedwe ciri-centse, mtundu uli-wentse na dziko liri lentse. 10 Ndipo imwepo mwawacitisa kukhala amambo na antsembe wa Mulungu, ndipo iwo an’dzakhala amambo acidzatonga dziko la pantsi.”

11 Ndipo ndidawona ndicibva mafala ya anjo azinji, omwe akhadazungulira mpando wa umambo ndipo iwo akhali pabodzi na anjo anai pabodzi na akulu-akulu wale, iwo akhali azinji kwene-kwene ndipo mbogo yawo ikhali izinjisa mwakuti ikhalewengeka lini. 12 Ndipo iwo akhalewa mwakukuwa kuti: “Mwana wa Bira omwe adaphedwa ule, ngwakuthemera kupasidwa utongi, cuma, nzeru, mphanvu, ulemu, ulemerero na bzisimbo.”

13 Ndipo ndidabva bzakulengedwa bzentse bzomwe bziri kudzulu, bza pa dziko la pantsi, bza pantsi pa dziko na bza m’nyanza, inde bzinthu bzentse bzomwe bzikhali m’mwemo bzikhalewa kuti: “Ule omwe adakhala pa mpando wa umambo pabodzi na Mwana wa Bira asimbidwe acipasidwa ulemu, ulemerero na mphanvu mpaka kale-kale.” 14 Anjo anai wale akhambalewa kuti: “Ameni!” Ndipo akulu-akulu wale akhambagodama acimbanamata Mulungu.

6 Ndipo ndidawona Mwana wa Bira akufungula ibodzi pa maselo 7, ndipo ndidabva m’bodzi mwa anjo anai wale akulewalewa mwakugunda ninga ciphaliwali kuti: “Bwera!” 2 Ndipo ndidawona kavalo mcena! Omwe akhadapakira pa kavaloyo akhana uta; ndipo adapasidwa korowa kuti ayende kukakunda nyamadulanthaka wace acikunda nkhondoyo.

3 Pomwe adafungula selo yaciwiri, ndidabva fala la anjo waciwiri akulewa kuti: “Bwera!” 4 Padabula kavalo munango mfuira, ndipo omwe akhadapakira pa kavaloyo adapasidwa mphanvu yakucosa mtendere pa dziko la pantsi kuti wanthu aphane, ndipo adapasidwambo xipada ikulu.

5 Pomwe adafungula selo yacitatu, ndidabva fala la anjo wacitatu akulewa kuti: “Bwera!” Ndidawona kavalo mpswipa, ndipo omwe akhadapakira kavaloyo akhana balantsa* m’manja mwace. 6 Ndidabva fala lakucokera pakati pa anjo anai wale, liciti: “Gaba m’bodzi wa tirigu apagalidwi na dinario ibodzi, ndipo magaba matatu ya sevada yapagalidwi na dinario ibodzi; ndipo lekani kudzonga mafuta ya azeite na vinyu.”

7 Pomwe adafungula selo yacinai, ndidabva fala la anjo wacinai lomwe lidati: “Bwera!” 8 Ndidawona kavalo wakupfumbuka ndipo omwe akhadapakira pa kavaloyo dzina lace akhali Infa. Ndipo Thenje* likhamutewera na pafupi kwene-kwene. Ndipo adapasidwa mphanvu yakupha cipande cibodzi pa bzipande bzinai bza pa dziko la pantsi na xipada itali, njala, cisi na bzirombo bza pa dziko la pantsi.

9 Pomwe adafungula selo yacixanu, ndidawona kuntsi kwa guwa la ntsembe, moyo wa wale omwe adafa thangwe ra fala la Mulungu na umboni bomwe iwo adapereka. 10 Iwo adakuwa mwamphanvu kuti: “Nandi Mbuya Mkululetu, wakucena na wacadidi, mun’dzadikhira mpaka lini kuti mutonge wanthu pa dziko la pantsi muciwabwezera cakuipa thangwe ra mulopa wathu?” 11 Ndipo ali-wentse wa iwo adatambira cakubvala citali comwe cikhali cicena, ndipo adauzidwa kuti abakapume pang’ono mpaka ukwane mulewengo wa akapolo anzawo na abale wawo, omwe akhadasala pang’ono kuphedwa ninga momwe iwo adaphedwera.

12 Pomwe adafungula selo yaci 6, kudacitika citeketeke camphanvu; dzuwa lidacita mdima ninga nguwo ipswipa* ndipo mwezi udafuira ninga mulopa. 13 Ndipo nyenyezi zakudzulu zidagwa pantsi ninga kugwa kwa nkhuyu ziwisi zikatekenyesedwa na conzi camphanvu. 14 Ndipo kudzulu kudafunyika ninga tsamba lakufunyiziridwa pa kamuti, ndipo mapiri na ntsuwa bzidacosedwa pa mbuto yace. 15 Patsogolo pace amambo wa pa dziko la pantsi, akulu-akulu wa boma, atsogoleri wa acikunda, anyakudala, anyamphanvu, akapolo wentse na anyaufulu wentse adakabisalika m’mphako na pakati pa minyala ya m’mapiri. 16 Ndipo iwo adapitiriza kumbauza mapiri na minyala kuti: “Tigwereni mucitibisa pamaso pa Ule omwe adakhala pa mpando wa umambo nakuti tibisike ku ukali bwa Mwana wa Bira, 17 thangwe ntsiku ikulu ya ukali bwawo yafika, ndipo mbani angakwanise kuima pamaso pawo?”

7 Pomwe bzimwebzi bzidamala, ndidawona anjo anai omwe akhadaima mu mbali zinai za pa dziko la pantsi. Iwo akhadaphatirira mphepo zinai za dziko la pantsi kuti zileke kumenya dzikolo, nyanza ayai muti uli-wentse. 2 Ndipo ndidawona anjo munango akukwira kudzulu kucokera kumabvadzuwa, ndipo iye akhana cizindikiro ca Mulungu wamoyo; iye adakuwira anjo anai wale omwe akhadapasidwa mphanvu yakupfudza dziko na nyanza, 3 kuti: “Lekani kupfudza dziko la pantsi, nyanza ayai miti, mpaka tikamaliza kuikha cizindikiro pamikuma ya akapolo wa Mulungu wathu.”

4 Ndipo ndidabva mulewengo wa omwe adaikhidwa cizindikiroco. Wanthu wakukwana 144 000 wakucokera m’dzinza liri-lentse la wana wa Jirayeri:

9 Patsogolo pace, ndidawona thimu likulu la wanthu lomwe palibe munthu omwe angadakwanisa kulilewenga. Iwo akhali wakucokera ku mitundu yentse, madzinza yentse, mbumba zentse na bzirewedwe bzentse. Iwo akhadaima pamaso pa mpando wa umambo na pamaso pa Mwana wa Bira, ndipo akhadabvala bzakubvala bzicena. M’manja mwawo akhadatakula nthambi za kanjedza. 10 Iwo adapitiriza kukuwa acimbalewa kuti: “Cipulumuso cathu cacokera kwa Mulungu wathu, omwe adakhala pa mpando wa umambo na kwa Mwana wa Bira.”

11 Pamwepo, anjo wentse, akulu-akulu pabodzi na anjo anai wale, adaima mwakuzungulira mpando wa umambo. Ndipo iwo adagodama acitsulima patsogolo pa mpando wa umamboyo acinamata Mulungu, 12 acimbati: “Ameni! Citumbizo, ulemerero, nzeru, kutenda, ulemu, utongi na mphanvu bziyende kwa Mulungu wathu mpaka kale-kale. Ameni.”

13 Ndipo m’bodzi wa akulu-akulu wale adandibvunza kuti: “Kodi mbani omwe adabvala bzakubvala bzicenawa ndipo akucokera kuponi?” 14 Pa nthawe imweyoletu ndidatawira kuti: “Mbuya wangu, imwepo ndimwe mun’dziwa.” Ndipo iye adandiuza kuti: “Amwewa ni omwe acokera ku citsautso cikulu, iwo afula bzakubvala bzawo bzitali acibzicenesa na mulopa wa Mwana wa Bira. 15 Ndipopa iwo ali pamaso pa mpando wa umambo wa Mulungu, acimbaphata mabasa yakupambulika mu templo mwace usiku na masikati; ndipo Ule omwe adakhala pa mpando wa umambo an’dzakonza tendi kuti awakhotcerere. 16 Iwo an’dzabva lini pomwe njala ne nyota, ndipo an’dzapsa lini pomwe na dzuwa ne kutentha kuli-kwentse, 17 thangwe Mwana wa Bira omwe adakhala pakati pa mpando wa umambo, an’dzawausa aciwatsogolera ku ntsantsa* ya madzi ya moyo. Ndipo Mulungu an’dzapukuta misozi yentse m’maso mwawo.”

8 Pomwe adafungula selo yaci 7, kudzulu kudakhala zii kwa mphindi 30. 2 Ndipo ndidawona anjo 7 omwe akhadaima pamaso pa Mulungu, ndipo iwo adapasidwa bzimbututu 7.

3 Anjo munango omwe akhana combo ca oro cakutenthera bzakufukiza, adafika aciima pafupi na guwa la ntsembe. Iye adapasidwa bzakufukiza bzizinji kuti abzitenthe pa guwa la ntsembe la oro, lomwe likhali pakati pa mpando wa umambo. Pa nthawe ibodzi-bodziyo, anyakucena akhapereka mipembo. 4 Utsi bwa bzakufukizabzo bukhacoka ku boko la anjo, bucikwira kwa Mulungu pabodzi na mipembo ya anyakucena. 5 Tsono pa nthawe imweyoletu, anjoyo adatenga combo ca bzakufukizira acipala moto pa guwa la ntsembe ndipo adauthusa pa dziko la pantsi. Ndipo kudabveka kugunda, mafala, bziphaliwali na kutekenyeka kwa pantsi. 6 Ndipo anjo 7 wale, akhadakonzeka kuti alize bzimbututu 7.

7 Anjo wakuyamba adaliza cimbututu cace. Ndipo padawoneka matalala na moto bzakusanganizikana na mulopa, ndipo adabzithusira pa dziko la pantsi. Ndipo mbali ibodzi pa mbali zitatu za dziko la pantsi idapsa, mbali ibodzi pa mbali zitatu za miti idapsa, ndipo mauswa yentse yakupswipirira yadapsambo.

8 Anjo waciwiri adalizambo cimbututu cace. Ndipo cinthu cinango cakuwoneka ninga phiri likulu lakugaka moto, cidathusidwa mu nyanza. Ndipo mbali ibodzi pa mbali zitatu za mu nyanza idasanduka mulopa; 9 ndipo mbali ibodzi pa mbali zitatu za bzinthu bzamoyo bza m’nyanza bzidafa, ndipo mbali ibodzi pa mbali zitatu za xitima za m’madzi* idadzongeka.

10 Anjo wacitatu adalizambo cimbututu cace. Ndipo nyenyezi ikulu yomwe ikhagaka ninga kandiyero, idagwa kucokera kudzulu. Ndipo iyo idagwera pa mbali ibodzi ya mbali zitatu za mikulo na ntsantsa za madzi.* 11 Dzina la nyenyeziyo ni muti wakuwawa. Tenepo, mbali ibodzi pa mbali zitatu za madzi yadakhala yakuwawa, ndipo wanthu azinji adafa na madziyo thangwe yakhawawa.

12 Anjo wacinai adalizambo cimbututu cace. Ndipo mbali ibodzi pa mbali zitatu za dzuwa idadzongedwa. Ndipo mbali ibodzi pa mbali zitatu za mwezi na mbali ibodzi pa mbali zitatu za nyenyezi, zidacita mdima. Ndipo mbali ibodzi pa mbali zitatu za masikati na usiku, ziribe kuwonesa ceza.

13 Ndipo ndidawona mphungu ikumbuluka m’dzaulu icimbalewa mwakukuwa kuti: “Tsoka, tsoka, tsoka kwa wale omwe akukhala pa dziko la pantsi thangwe ra bzimbututu bzomwe bzasala, bzomwe anjo atatu asala pang’ono kubziliza!”

9 Anjo wacixanu adaliza cimbututu cace, ndipo ndidawona nyenyezi yomwe idagwera pantsi kucokera kudzulu. Nyenyeziyo idapasidwa xavi cakupitira ku ciphompho. 2 Ndipo pomwe iye adafungula ku ciphomphoko, kudacoka utsi bomwe budakwira kudzulu ninga utsi bwa moto uzinji. Ndipo dzuwa na mphepo bzidapswipa thangwe ra utsi bomwe bukhacokera ku ciphomphoko. 3 Mu utsimo, mudacoka mabombo yacibwera pa dziko la pantsi ndipo mabomboyo yadapasidwa mphanvu ninga anyankalize wa pa dziko la pantsi. 4 Mabomboyo yadauzidwa kuti yaleke kudzonga cakumera ciri-centse pa dziko la pantsi, uswa buli-bwentse na muti uli-wentse, kupambula wanthu wale omwe alibe kuikhidwa cizindikiro ca Mulungu pa mikuma yawo.

5 Mabomboyo yalibe kupasidwa mphanvu kuti yawaphe, koma yawabonerese kwa minyezi mixanu, ndipo kuboneresedwako kukhali kwakundendemerana na momwe munthu ambabonerera akapfondedwa na nyankalize. 6 Mu ntsiku zimwezo wanthu an’dzanyang’ana infa, tsono an’dzaiwona lini, ndipo an’dzafuna kufa, tsono infa in’dzawathawa.

7 Mabomboyo yakhana mawonekedwe ninga ya makavalo yakuyenda ku nkhondo ndipo m’misolo mwawo mukhana cinthu comwe cikhawoneka ninga korowa za oro ndipo nkhope za mabomboyo zikhali ninga nkhope za wanthu, 8 tsono yakhana tsisi ninga la mkazi ndipo mano yawo yakhali ninga ya mphondolo, 9 yakhana bzakukhotcerera pa cifuwa bzomwe bzikhali ninga bza simbi ndipo muwira wa matenga yawo ukhali ninga muwira wa ngolo za nkhondo, zomwe zikupfuwidwa na makavalo yomwe yakuthamangira ku nkhondo. 10 Kuthumizira bzimwebzi, iyo yakhana micira yomwe ikhambapfonda ninga nyankalize ndipo micirayo ikhana mphanvu yakuboneresa wanthu kwa minyezi mixanu. 11 Mabomboyo yana mambo,* mambo wawoyo ni anjo wa ku ciphompho. M’Cihebereu dzina lace ni Abadoni,* tsono m’Cigerego ana dzina lakuti Apoliyoni.*

12 Tsoka libodziri lapita, tsono pambuyo pa bzimwebzi yakhabwera matsoka manango mawiri.

13 Anjo waci 6 adalizambo cimbututu cace, ndipo ndidabva fala lakucokera pa manyanga ya pa guwa la ntsembe la oro, lomwe liri pamaso pa Mulungu, 14 lomwe lidauza anjo waci 6 omwe adaliza cimbututu ule kuti: “Tsudzula anjo anai omwe adamangidwa ku mkulo ukulu wa Eufrate.” 15 Anjo anai wale, adatsudzulidwa ndipo akhadakonzekeresedwa kuti ikafika nthawe, ntsiku, mwezi na ngole, adzaphe mbali ibodzi pa mbali zitatu za wanthu.

16 Mulewengo wa acikunda omwe akhadapakira makavalo, ukhali wa 200 000 000; umweyu ni mulewengo omwe inepano ndidaubva. 17 Makavalo yomwe ndidayawona m’masomphenya na wale omwe akhadayapakira akhana mawonekedwe aya: iwo akhadabvala cakubzikhotcerera pa cifuwa comwe cikhali cifuira ninga moto na cakupswipirira ninga jasinto* na ca safalawu ninga enxofre* ndipo misolo ya makavaloyo ikhali ninga ya mphondolo ndipo mkamwa mwawo mukhacoka moto, utsi na enxofre. 18 Mbali ibodzi pa mbali zitatu za wanthu, adaphedwa na bzisi bzitatu ibzi, moto, utsi na enxofre, bzomwe bzikhacoka pa miromo ya makavaloyo. 19 Ndipo mphanvu za makavaloyo ziri pa mulomo na ku mcira. Micirayo iri ninga nyoka ndipo ina misolo, ndipo na misoloyo imbaboneresa wanthu.

20 Tsono wanthu winango omwe alibe kuphedwa na cisi cimweci, alibe kukungula pa mabasa ya manja yawo. Iwo alibe kusiya kunamata madimonyo, bzifanikiso bza oro, bza prata, bza mkuwa, bza minyala na bza miti, bzomwe bzingawone lini, ne kubva ne kufamba. 21 Iwo alibe kukungula ku bzicito bza ukapondo, bza kukhulupira mizimu, bza uputa ayai upombo* ne ku bzicito bzawo bza umbava.

10 Ndipo ndidawona anjo munango wamphanvu akubuluka kucokera kudzulu, iye akhadabvala mtambo ndipo akhana citaleza mu msolo mwace. Nkhope yace ikhali ninga dzuwa ndipo minyendo yace ikhali ninga mbiru* za moto. 2 Ndipo anjoyo akhana tsamba ling’ono lakufunguka m’manja mwace. Ndipo mwendo wace wamadidi ukhadaponda padzaulu pa nyanza ndipo wa madzere ukhadaponda pa mataka. 3 Iye adakuwa mwamphanvu ninga kulira kwa mphondolo. Pomwe iye adakuwa, kugunda 7 kudalewalewa.

4 Pomwe kugundako kudalewalewa, inepano ndikhafuna kunemba, tsono ndidabva fala kucokera kudzulu lomwe lidati: “Koya mwacintsintsi mafala yomwe kugunda 7 kwalewa, ndipo leka kuyanemba.” 5 Ndipo anjo omwe ndidamuwona adaponda padzaulu pa nyanza na padzaulu pa mataka ule, adalamusira kudzulu boko lace lamadidi, 6 ndipo iye adalumbira m’dzina la Ule omwe ana moyo wakusaya kumala, omwe adalenga kudzulu na bzinthu bzomwe bziri kumweko, dziko la pantsi na bzinthu bzomwe bziri m’mwemo na nyanza na bzinthu bzomwe bziri m’mwemo. Iye adalumbira kuti: “Mulungu an’dzacedwa lini pomwe. 7 Tsono pa ntsiku yomwe anjo waci 7 an’dzaliza cimbututu cace, kulewa cadidi, cin’dzakwanisika cintsintsi cakupambulika comwe Mulungu adalewa ninga mafala yabwino kwa akapolo wace, omwe ni apolofeta.”

8 Tenepo, ndidabva pomwe fala lakucokera kudzulu lomwe lidandiuza kuti: “Ndoko, ndipo tenga tsamba lakufungula lomwe liri m’manja mwa anjo omwe adaima padzaulu pa nyanza na padzaulu pa mataka.” 9 Inepano ndidayenda kwa anjoyo ndicikamuuza kuti andipase tsamba ling’onolo. Ndipo iye adandiuza kuti: “Litenge udye. Iro lin’dzacitisa kuti m’mimba mwako muwawe, koma m’kamwa mwako lin’dzatapira ninga uci.” 10 Inepano ndidatengadi tsamba ling’onolo m’manja mwa anjoyo ndicilidya. M’kamwa mwangu likhatapira ninga uci, tsono pomwe ndidamala kulidya, m’mimba mwangu mudayamba kuwawa. 11 Iwo adandiuza kuti: “Iwepo un’funika kulewa pomwe mapolofesiya ya bzomwe bzin’dzacitikira wanthu, mitundu, bzirewedwe na amambo azinji.”

11 Ndipo ndidapasidwa mtete omwe ukhawoneka ninga mpsimbo pomwe ndikhauzidwa mafala yakuti: “Lamuka ndipo ukapime mbuto yakupambulika ya mu templo ya Mulungu, guwa la ntsembe na omwe akunamata m’mwemo. 2 Koma pakulewa bza mbuto yakupambulika yomwe iri kunja kwa templo, leka kuipima thangwe idaperekedwa kwa wanthu wa mitundu ndipo iwo an’dzaponda-ponda mzinda wakupambulika kwa minyezi 42. 3 Nin’dzatumiza mboni zangu ziwiri zomwe zin’dzabvala masakha,* kuti zilewe mapolofesiya kwa ntsiku 1260.” 4 Mbonizo zikuimiridwa na miti miwiri ya olivera na bzakuikhira kandiyero bziwiri ndipo izo zidaima pamaso pa Mbuya wa dziko la pantsi.

5 Penu munthu an’funa kuwacita cakuipa, moto un’dzacoka m’kamwa mwawo, ucinyekesa anyamadulanthaka wawo. Munthu akafuna kucita bzakuipa, an’dzaphedwa mu njira imweyi. 6 Mbonizo zidapasidwa mphanvu yakufunga kudzulu kuti nvula ireke kubvumba mkati mwa ntsiku zentse zomwe zin’dzakhala zikulewa mapolofesiya, ndipo zidapasidwambo mphanvu yakusandusa madzi kukhala mulopa kuti zidzonge dziko la pantsi na matenda yakusiyana-siyana kazinji kentse, ninga momwe izo zikufunira.

7 Izo zikadzamaliza kucitira umboni, cirombo ca m’thengo cin’dzabula ku ciphompho cicidzamenya nkhondo na mbonizo, ndipo ico cin’dzazikunda, cicizipha. 8 Ndipo mitembo ya mbonizo in’dzaikhidwa mu mseu ukulu wa mzinda ukulu omwe ngwakuyezezera, wakucemeredwa Sodoma na Edjipito, komwe Mbuya wawo adakhomereredwa pa muti. 9 Ndipo mbumba, madzinza, bzirewedwe na mitundu in’dzanyang’anisa mitembo yawo kwa ntsiku zitatu na meya, ndipo iwo an’dzabvumiza lini kuti mitemboyo iikhidwe m’thenje. 10 Ndipo wanthu wakukhala pa dziko la pantsi an’dzakondwa acisekerera thangwe ra infa yawo, ndipo iwo an’dzatumizirana mphaso thangwe apolofeta awiriwo adazunza wanthu wakukhala pa dziko la pantsi.

11 Pomwe ntsiku zitatu na meya zidapita, mzimu wamoyo wakucokera kwa Mulungu udapita mwa iwo. Iwo adaima ndipo omwe adawawona adabva mantha kwene-kwene. 12 Ndipo mbonizo zidabva fala likukuwa kucokera kudzulu, licimbalewa kuti: “Kwirani kuno.” Ndipo izo zidakwira kudzulu m’mitambo, ndipo anyamadulanthaka wawo adawawona. 13 Pa nthawe imweyoletu padacitika citeketeke camphanvu ndipo mbali ibodzi mwa mbali 10 za mzindayo idagwa ndipo wanthu 7000 adafa na citeketekeco, ndipo omwe adasala adabva mantha, aciyamba kulemekeza Mulungu wakudzulu.

14 Tsoka laciwiri lapita. Ona! Tsoka lacitatu likubwera mwakamfulumize.

15 Anjo waci 7 adalizambo cimbututu cace. Ndipo padabveka mafala yakukuwa kucokera kudzulu, yacimbati: “Umambo bwa dziko bwakhala Umambo bwa Mbuya wathu na bwa Kristu wace, ndipo iye an’dzatonga ninga mambo* mpaka kale-kale.”

16 Ndipo akulu-akulu 24 wale, omwe akhadakhala m’mipando yawo ya umambo pamaso pa Mulungu adagodama mpaka nkhope zawo kukhuya pantsi, acinamata Mulungu, 17 kuti: “Tikukutendani imwe Yahova Mulungu Wamphanvu-zentse, omwe mulipo na omwe mukhalipo, thangwe mwatenga mphanvu zanu zikulu muciyamba kutonga ninga mambo. 18 Koma mitundu ya wanthu idakalipa ndipo ukali bwanu budafikambo. Ndipo idafikambo nthawe yakuikhidwiratu kuti anyakufa atongedwe kuti mubaire akapolo wanu, apolofeta, anyakucena, anyakugopa dzina lanu, akulu na ang’ono kubodzi na kupfudza wale omwe ambadzonga dziko la pantsi.”

19 Templo ya Mulungu kudzulu idafunguka ndipo ndidawona thungwa la mpangano,* ndipo padabveka bziphaliwali, mafala, kugunda, citeke-teke na matalala makulu-makulu.

12 Patsogolo pace, kudawoneka cizindikiro cikulu kudzulu. Cizindikiroco cikhali ca mkazi omwe akhadabvala dzuwa ndipo akhadaponda mwezi. Mu msolo mwace mukhana korowa yomwe ikhana nyenyezi 12. 2 Mkaziyo akhana pathupi ndipo iye akhalira thangwe ra kubva kuwawa, pakuti akhadasala pang’ono kubereka.

3 Kudawoneka pomwe cizindikiro cinango kudzulu, ndipo ndidawona cinyoka cikulu cifuira ninga moto, comwe cikhana misolo 7 na nyanga 10 ndipo m’misolomo mukhana korowa 7. 4 Mcira wace udakwekweta mbali ibodzi pa mbali zitatu za nyenyezi zakudzulu, cicizigwesera pa dziko la pantsi. Cinyokaco cidapitiriza kuima pomwe pakhana mkazi omwe akhadasala pang’ono kubereka ule, kuti akandobereka, cidyeretu mwanayo.

5 Ndipo mkaziyo adabereka mwana wacimuna, omwe angadadzausa mitundu yentse ya wanthu na mpsimbo ya simbi ndipo mwana waceyo adatengedwa mwakamfulumize, aciyendesedwa kwa Mulungu na ku mpando wace wa umambo. 6 Tsono mkaziyo adathawira ku dambo, ku mbuto yomwe Mulungu akhadamukonzera na komwe angadadyesedwa kwa ntsiku 1260.

7 Ndipo kudacitika nkhondo kudzulu: Migeli* na anjo wace adamenyana na cinyoka ndipo cinyokaco na anjo wacembo cidamenya nkhondo. 8 Tsono cinyokaco na anjo wace adakundidwa ndipo adaluza mbuto zawo kudzulu. 9 Cinyokaco cidathusidwa pantsi, cinyoka cakale-kale cakucemeredwa Dyabu na Sathani, omwe akupumpsa dziko lentse la pantsi. Iye adathusidwa pa dziko la pantsi ndipo anjo wace adathusidwambo naye pabodzi. 10 Ndipo ndidabva fala lakukuwa kudzulu lomwe lidati:

“Tsapano cafika cipulumuso, mphanvu, Umambo bwa Mulungu wathu pabodzi na utongi bwa Kristu wace, thangwe nyakunamizira abale wathu wathusidwa pantsi, iye akhawanamizira usiku na masikati pamaso pa Mulungu wathu. 11 Iwo adamukunda thangwe ra mulopa wa Mwana wa Bira na thangwe ra fala la umboni bwawo ndipo iwo alibe kufuna kwene-kwene moyo* wawo, napo pomwe akhali pa ngozi ya infa. 12 Na thangwe limweri, kondwani imwe wakukhala kudzulu. Tsoka dziko la pantsi na nyanza thangwe Dyabu wapolikira kumweko ndipo adakalipa kwene-kwene, pakudziwa kuti nthawe yamusalira pang’ono.”

13 Pomwe cinyoka cire cidawona kuti cathusidwa pa dziko la pantsi, cidazunza mkazi omwe akhadabereka mwana wacimuna ule. 14 Tsono mkaziyo adapasidwa maphaphidwe mawiri ya mphungu ikulu kuti ambuluke aciyenda ku dambo, ku mbuto yace ire. Kumweko ni komwe an’kadyesedwa kwa nthawe ibodzi na nthawe ziwiri na meya,* kutali na cinyoka cire.

15 Ndipo cinyokaco cidasanza madzi yomwe yakhacoka ninga mkulo m’kamwa mwace. Ico cidasanzira mkazi ule kuti amire mu mkulomo. 16 Tsono dziko la pantsi lidabwera kudzathandiza mkaziyo ndipo lidafungula mulomo wace, licikhudyula mkulo omwe udasanzidwa na cinyoka cikulu cire. 17 Tenepo, cinyokaco cidakalipa kwene-kwene na mkazi ule ndipo cidayenda kukamenya nkhondo na wana* wace wakusala, omwe ambabvera malamulo ya Mulungu ndipo ambaphatambo basa lakucitira umboni bza Jezu.

13 Ndipo cinyoka cire cidaima pa mcenga wa m’nyanza.

Ndipo ndidawona cirombo cikufumphuka m’nyanzamo, comwe cikhana nyanga 10 na misolo 7, ndipo m’nyangazo mukhana korowa 10, ndipo m’misolomo mukhana madzina yakunyoza. 2 Cirombo comwe ndidawonaco cikhali ninga nyalugwe, koma minyendo yace ikhali ninga ya urso, ndipo mulomo wace ukhali ninga wa mphondolo. Cinyokaco cidapasa ciromboco mphanvu, umambo na utongi bukulu.

3 Ndipo ndidawona msolo m’bodzi wa ciromboco ukhana cironda cikulu ndipo cikhawoneka ninga kuti cingadafa na cirondaco, koma cidadzapola, ndipo wanthu wentse wa pa dziko la pantsi akhatewera ciromboco mwakudabwa. 4 Ndipo iwo akhanamata cinyokaco thangwe cidapasa utongi cirombo cire, ndipo iwo akhanamata ciromboco acilewa kuti: “Mbani omwe angandendemerane na ciromboci, ndipo mbani omwe angamenyane naco?” 5 Ndipo adacipasa mulomo wakulewa bzinthu bzakugaya na bzakunyoza Mulungu, ndipo cidapasidwa utongi kuti citonge minyezi kwa 42. 6 Ndipo ico cidayamba kulewalewa mafala yakunyoza Mulungu, dzina lace, mbuto yace yakukhala, napo wale omwe akukhala kudzuluko. 7 Ico cidabvumizidwa kumenya nkhondo na anyakucena ciciwakunda. Ndipo cidapasidwa mphanvu yakutonga dzinza liri-lentse, mbumba, cirewedwe na mtundu uli-wentse wa wanthu. 8 Ndipo wentse wakukhala pa dziko la pantsi an’dzacinamata. Kuyambira pomwe dziko lidalengedwa, palibe ne na m’bodzi wa iwo omwe adanembedwa dzina m’bukhu la moyo la Mwana wa Bira omwe adaphedwa.

9 Ali-wentse omwe ana makutu, abve. 10 Penu munthu an’funika kuyenda ku ukapolo, mbayende ku ukapoloko. Penu munthu anipha na xipada, aphedwembo na xipada. Ndipopa anyakucenawo an’funika kupirira na kukhala na cikhulupiro.

11 Patsogolo pace ndidawona cirombo cinango cikucokera pa dziko la pantsi, ndipo cikhana nyanga ziwiri ninga za mwana wa bira, koma cikhalewalewa ninga cinyoka. 12 Ico cidayamba kutonga na mphanvu zentse ninga cirombo cakuyamba cire, pomwe cirombo cakuyambaci cikuwona. Ndipo cidacitisa kuti dziko la pantsi na wakukhala m’mwemo anamate cirombo cakuyamba cire, comwe cikhana cironda comwe cikhawoneka ninga kuti cingadafa naco, koma cidadzapola. 13 Ndipo cidacita bzakudabwisa* bzikulu-bzikulu, mwakuti cidacitisa moto kugwa pa dziko la pantsi kucokera kudzulu wanthu akuwona.

14 Ciromboco cidasoceresa wanthu wa pa dziko la pantsi thangwe ra bzakudabwisa bzomwe cidabvumizidwa kucita pamaso pa cirombo cakuyamba cire. Ndipo cidauza wanthu wakukhala pa dziko la pantsi kuti akonze cifanikiso ca cirombo comwe cikhana cironda cakucita kutemedwa na xipada, koma cidapulumuka cire. 15 Ndipo ico cidabvumizidwa kupereka mphuwe ya moyo ku cifanikiso ca cirombo cakuyamba cire, kuti cikwanise kulewalewa na kucitisa kuti wentse omwe anilamba kunamata cifanikiso ca ciromboco, aphedwe.

16 Ciromboco cimbakakamiza wanthu wentse, akulu na ang’ono, anyakudala na anyakusauka, anyaufulu na akapolo, kuti an’funika kukhala na cizindikiro ku boko lawo lakumadidi ayai pa mkuma pawo. 17 Ndipo palibe munthu omwe angadagula ayai kugulisa kupambula munthu omwe ana cizindikiro ca dzina la ciromboco ayai mulewengo wa dzina lace. 18 Munthu ule omwe ana nzeru ndiye omwe angazindikire bzimwebzi: Omwe ambazindikira alewenge mulewengo wa ciromboco, pakuti ni mulewengo wa munthu, ndipo mulewengo wace ni 666.

14 Patsogolo pace, ndidawona Mwana wa Bira adaima pa Phiri la Ziyoni, ndipo wa 144 000 akhanaye pabodzi. Iwo akhana dzina lace na dzina la Baba wace lomwe likhadanembedwa pa mikuma yawo. 2 Ndidabva baludya kucokera kudzulu lomwe likhabveka ninga madzi mazinji ndipo likhabvekambo ninga kugunda kwa ciphaliwali; ndipo baludyalo likhabvekambo ninga anyakuimba omwe akhaimba maviyola* yawo. 3 Ndipo iwo akhaimba nyimbo yomwe ikhabveka ninga nyimbo ipsa pamaso pa mpando wa umambo na pamaso pa anjo anai na akulu-akulu, ndipo palibe munthu omwe adakwanisa kuipfunza nyimboyo kupambula wa 144 000 omwe adagulidwa kucokera pa dziko la pantsi. 4 Amwewa mbale omwe alibe kubzipswipiza na akazi; kulewa cadidi iwo mbakucena. Amwewa mbale omwe ambatewera Mwana wa Bira kuli-kwentse komwe ayendeko. Iwo adagulidwa pakati pa wanthu ninga bzisapo bzakuyambirira bzakuperekedwa kwa Mulungu na kwa Mwana wa Bira. 5 Ndipo pamulomo pawo palibe kucoka mafala yakunama; iwo mbakusaya mulandu.

6 Ndipo ndidawona anjo munango akumbuluka m’dzaulu, ndipo iye akhana mafala yabwino yakusaya kumala kuti ayadziwise kwa wale omwe akukhala pa dziko la pantsi, kwa mtundu uli-wentse, dzinza, cirewedwe na mbumba. 7 Iye akhambalewa mwakukuwa kuti: “Gopani Mulungu ndipo mupaseni ulemerero, thangwe yafika nthawe yakuti iye atonge, tenepo namatani Ule omwe adalenga kudzulu, dziko la pantsi, nyanza na ntsantsa za madzi.”

8 Anjo munango waciwiri, adamutewera acimbalewa kuti: “Wagwa! Wagwa Babiloniya Mkulu, omwe akhacitisa mitundu yentse ya wanthu kumwa vinyu ya kalanga ka uputa* bwace.”

9 Anjo munango wacitatu, adawatewera acimbalewambo mwakukuwa kuti: “Munthu akanamata cirombo na cifanikiso cace ndipo acitambira cizindikiro pa mkuma ayai m’manja mwace, 10 an’dzamwambo vinyu ya ukali bwa Mulungu, yomwe idatsanuliridwa mwakusaya kusungunusidwa m’kopo ya ukali Bwace, ndipo an’dzazunzidwa na moto wakugaka* pamaso pa anjo wakucena na pamaso pa Mwana wa Bira. 11 Ndipo utsi bwa kuzunzidwa kwawo bun’dzakwira mpaka kale-kale, ndipo wale omwe ambanamata cirombo cire na cifanikiso cace na omwe atambira cizindikiro ca dzina lace, an’dzapuma lini usiku na masikati. 12 Pamwepa pan’funika kuti anyakucena omwe ambateweza malamulo ya Mulungu, apirire ndipo apitirize kukhala wakukhulupirika kwa Jezu.”

13 Ndipo ndidabva fala kucokera kudzulu lomwe lidati, “Nemba: An’kondwa mbale omwe adafa mwakubverana na Mbuya kuyambira tsapano mpaka kutsogolo. Inde, mzimu wakucena ukulewa kuti, alekeni apume ku mabasa yawo yomwe adayacita na nyongo.”

14 Patsogolo pace, ndidawona mtambo mcena, ndipo mu mtambomo mukhadakhala munthu omwe akhawoneka ninga mwana wa munthu, mu msolo mwace akhadabvala korowa ya oro ndipo m’manja mwace mukhana djeko yakuthwa.

15 Anjo munango adacoka m’mbuto yakupambulika ya mu templo acimbakuwira ule omwe akhadakhala pa mtambo kuti: “Tenga djeko yako, ubvune, pakuti yafika nthawe yakubvuna, thangwe bzinthu bzakufuna kubvunidwa pa dziko la pantsi bzakhuma bwino.” 16 Ndipo ule omwe akhadakhala pa mtambo, adaikha djeko yace pa dziko la pantsi, ndipo dzikolo lidabvunidwa.

17 Ndipo anjo munango adacoka m’mbuto yakupambulika ya mu templo yomwe iri kudzulu, ndipo iyembo akhana djeko yakuthwa.

18 Ndipo anjo munango adacoka pa guwa la ntsembe, ndipo iye adapasidwa mphanvu ya kutonga moto. Iye adakuwira omwe akhana djeko yakuthwa ule acimuuza kuti: “Tenga djeko yako yakuthwa, ubvune uva bwa pa dziko la pantsi, pakuti uvabo bwakhuma.” 19 Anjoyo adatenga djeko yace acibvuna uva bwa pa dziko la pantsi, ndipo adathusa uvabo mu cakupsinyira uva ca ukali bwa Mulungu. 20 Cakupsinyira uvaco cidapondedwa kunja kwa mzinda, ndipo mulopa udacoka mu cakupsinyira uvaco, ucifika mpaka pamulomo pa makavalo, ndipo udayerera mtantho wa makilometro 296.

15 Ndipo ndidawona cizindikiro cikulu na cakudabwisa kudzulu. Ndidawona anjo 7 omwe akhana bzisi 7. Cimweci ni cisi cakumalizira, thangwe kumala kwa cisico kungadacitisa kuti ukali bwa Mulungu bumalembo.

2 Ndipo ndidawona cinthu comwe cikhawoneka ninga nyanza ya vidru yakusanganiza na moto. Ndipo wale omwe adakunda cirombo cire, cifanikiso cace pabodzi na mulewengo wa dzina lace, akhadaima pambali pa nyanza ya vidru na viyola* za Mulungu. 3 Iwo akhaimba nyimbo ya Mozeji kapolo wa Mulungu, na nyimbo ya Mwana wa Bira yakuti:

“Mabasa yanu ni makulu na yakudabwisa imwe Yahova Mulungu Wamphanvu-zentse. Njira zanu n’zakulungama na zacadidi, imwe Mambo* wa nthawe zentse. 4 Kodi mbani omwe an’dzakugopani lini na kulemekeza dzina lanu imwe Yahova? Pakuti imwepo mwekha ndimwe wakukhulupirika. Pakuti wanthu wa mitundu yentse an’dzabwera acidzanamata pamaso panu, thangwe katongedwe kanu kakulungama kawonekera kwa iwo.”

5 Pomwe bzimwebzi bzidamala, ndidawona mbuto yakupambulika ya mu templo* ya mboni, idafungulidwa kudzulu. 6 Ndipo anjo 7 omwe akhana bzisi 7 wale, adacoka pa mbuto yakupambulika adabvala bzakubvala bzakucena na bzakuyetima, ndipo m’cifuwa mwawo mukhana bande la oro. 7 M’bodzi mwa anjo anai wale adapereka kwa anjo 7 wale tijela 7 za oro zakudzala na ukali bwa Mulungu, omwe ana moyo mpaka kale-kale. 8 Ndipo pa mbuto yakupambulikayo padadzala na utsi thangwe ra ulemerero bwa Mulungu na mphanvu zace. Ndipo palibe omwe adakwanisa kupita mbuto yakupambulikayo mpaka bzisi 7 bza anjo 7 wale kumala.

16 Ndipo ndidabva fala lomwe lidakuwa kucokera pa mbuto yakupambulika ire, lomwe lidauza anjo 7 wale kuti: “Ndokoni ndipo thululirani matijela 7 ya ukali bwa Mulungu pa dziko la pantsi.”

2 Anjo wakuyamba adayenda kukathululira tijela yace pa dziko la pantsi. Ndipo wale omwe akhana cizindikiro ca cirombo cire pabodzi na omwe akhanamata cifanikiso cace, adafunthuka bzironda bzakuwawa na bzakunyantsa kwene-kwene.

3 Anjo waciwiri adathululira tijela yace m’nyanza. Ndipo madzi ya m’nyanzamo yadasanduka mulopa, ninga wa munthu omwe wacita kuphedwa ndipo bza moyo bzentse bzidafa, inde, bzinthu bzentse bza m’nyanzamo.

4 Anjo wacitatu adathululira tijela yace m’mikulo na mu ntsantsa za madzi ndipo bzentse bzidasanduka mulopa. 5 Ndidabva anjo omwe akhana mphanvu yakutonga madzi ule akulewa kuti: “Imwe ndimwe Omwe mulipo ndipo mukhalipo, Mulungu wathu wakukhulupirika ndimwe wakulungama pakuti mwatonga tenepo. 6 Thangwe iwo adapha* anyakucena na apolofeta, ndipo imwepo mwawapasa mulopa kuti amwe; ndipo bzimwebzi bzikhali bzakuthemera kwa iwo.” 7 Ndipo ndidabva guwa la ntsembe likulewa kuti: “Inde Yahova Mulungu Wamphanvu-zentse, kutonga kwanu n’kwacadidi na kwakulungama.”

8 Anjo wacinai adathululira tijela yace pa dzuwa, ndipo dzuwalo lidapasidwa mphanvu yakutentha wanthu na moto. 9 Ndipo wanthuwo adapsa na cithuthu camphanvu, tsono iwo adanyoza dzina la Mulungu omwe ana utongi pa bzisi bzimwebzi ndipo iwo alibe kukungula acimupasa ulemerero.

10 Anjo wacixanu adathululira tijela yace pa mpando wa umambo wa cirombo cire. Ndipo umambo bwace budacita mdima, ndipo wanthu adayamba kubziluma malirime yawo thangwe ra kubva kuwawa. 11 Tsono iwo adanyoza Mulungu wakudzulu thangwe ra kuwawa komwe akhabva na bzironda bzomwe akhanabzobzo, ndipo alibe kukungula pa mabasa yawo.

12 Anjo waci 6 adathululira tijela yace mu mkulo ukulu wa Eufrate, ndipo madzi ya mu mkulomo yadauma kuti pakhale na njira ya amambo wakucokera kumabvadzuwa.

13 Ndipo ndidawona mafala* matatu yakunyantsa yomwe yakhawoneka ninga acule. Mafalayo yakhacoka mkamwa mwa cinyoka, mkamwa mwa cirombo cire na mkamwa mwa apolofeta wakunama. 14 Kulewa cadidi mafalayo nja madimonyo ndipo yambacita bzakudabwisa; yambayenda kwa amambo wa pa dziko lentse lakukhalidwa na wanthu, ndipo adatsonkhanisidwa pabodzi ku nkhondo ya ntsiku ikulu ya Mulungu Wamphanvu-zentse.

15 “Bvaya! Ndikubwera ninga mbava. An’kondwa ngule omwe an’pitiriza kukhala adapenya acipitirizambo kukhala adabvala, kuti aleke kufamba pezi wanthu acimuwonera.”

16 Ndipo adatsonkhanisidwa pabodzi pa mbuto yomwe m’Cihebereu imbacemeredwa Armagedo.*

17 Anjo waci 7 adathululira tijela yace pa mphepo. Ndipo pomwe adacita bzimwebzi padabveka mafala yakukuwa pa mbuto yakupambulika, kucokera pa mpando wa umambo, yomwe yadati: “Bzakwanisika!” 18 Ndipo pamwepo padabveka bziphaliwali, mafala na kugunda ndipo padacitika citeketeke camphanvu kwene-kwene. Citeketekeco cikhanati kucitika kale kuyambira pomwe wanthu adalengedwa pa dziko la pantsi. 19 Mzinda ukulu udagawika mbali zitatu, ndipo mizinda ya wanthu wa mitundu idagwa; ndipo Mulungu adakumbukira Babiloniya kuti amupase kopo ya vinyu ya ukali bwace bukulu. 20 Ntsuwa zentse zidathawa ndipo mapiri yadanyembereka. 21 Ndipo matalala makulu-makulu yomwe yakhalemera makilu 20* yadagwera wanthu kucokera kudzulu, ndipo wanthu adanyoza Mulungu thangwe ra cisi ca matalalayo, pakuti cisico cikhali cikulu na cakudzonga kwene-kwene.

17 M’bodzi mwa anjo 7 omwe akhana tijela zinomwe wale, adabwera acidzandiuza kuti: “Bwera ndikuwonese kutongedwa kwa puta mkulu omwe adakhala padzaulu pa madzi mazinji. 2 Amambo wa pa dziko la pantsi adacita naye upombo* ndipo wanthu wakukhala pa dziko la pantsi adaledzera na vinyu ya uputa* bwace.”

3 Mwakuphatisa basa mzimu wakucena, anjoyo adanditenga acindiyendesa ku dambo. Ndipo ndidawona mkazi adakhala pa msana pa cirombo cifuira kwene-kwene, comwe cikhana madzina mazinji yakunyoza Mulungu ndipo cikhana misolo minomwe na nyanga 10. 4 Mkaziyo akhadabvala bzakubvala bzifuira kwene-kwene bzakuumira, ndipo iye akhadabzidekesa na oro, minyala yakufunika na misanga yakuumira. M’manja mwace mukhana kopo ya oro yomwe ikhadadzala na bzinthu bzakunyantsa na bzakupswipa bza uputa* bwace. 5 Pa mkuma pace pakhadanembedwa dzina lakusaya kubveseseka: “Babiloniya Mkulu, mai wa maputa na wa bzinthu bzakunyantsa bza pa dziko la pantsi.” 6 Ndipo ndidawona kuti mkaziyo akhadaledzera na mulopa wa anyakucena pabodzi na mulopa wa mboni za Jezu.

Pomwe ndidawona mkaziyo ndidadabwa kwene-kwene. 7 Tenepo anjoyo adandibvunza kuti: “Thangwe ranyi ukudabwa? Nin’kuuza cintsintsi ca mkaziyu na cirombo comwe adapakiraco, comwe cina misolo 7 na nyanga 10. 8 Cirombo comwe wawonaco cikhalipo, koma tsapano palibe ndipo casala pang’ono kucoka ku ciphompho ndipo patsogolo pace cin’dzapfudzidwa. Wanthu wakukhala pa dziko la pantsi omwe madzina yawo yalibe kunembedwa m’bukhu la moyo kuyambira pomwe dziko lidalengedwa, an’dzadabwa akadzawona cirombo comwe ciripo, koma tsapano palibe, patsogolo pace cin’dzakhala ciripo.

9 “Pan’funika nzeru kuti mubvesese bzimwebzi: Misolo 7 ikuimira mapiri 7 yomwe mkazi ule adakhala padzaulu pace. 10 Ndipo pana amambo 7: Axanu agwa kale, m’bodzi akalipo ndipo munangoyo akubwera koma akanati kufika. Akadzafika, an’dzakhala kwa kanthawe kakucepa. 11 Ndipo cirombo comwe cikhalipo ndipo tsapano palibe, ni mambo* waci 8, tsono ciromboco cidacokera kwa amambo 7 wale, ndipo cikuyenda kukapfudzidwa.

12 “Nyanga 10 zomwe udawona, zikuimira amambo 10 omwe akhanati kutambira umambo, ndipo iwo an’dzatambira mphanvu zakutonga ninga amambo kwa kanthawe* pabodzi na cirombo cire. 13 Amambowo ana nzeru ibodzi, tenepo iwo an’dzapereka mphanvu zawo na utongi bwawo kwa ciromboco. 14 Iwo an’dzakamenya nkhondo na Mwana wa Bira, tsono pakuti Mwana wa Birayo ni Mbuya wa ambuya na Mambo wa amambo, an’dzawakunda. Wale omwe ali pabodzi na iye anyakucemeredwa omwe asankhulidwa na wakukhulupirika, an’dzakundambo.”

15 Iye adandiuza kuti: “Madzi yomwe wawona pomwe akhadakhala puta ule, yakuimira wanthu, mathimu, mitundu na bzirewedwe. 16 Ndipo nyanga 10 zomwe wawona na cirombo cire, bzin’dzawenga putayo, ndipo bzin’dzamutengera bzinthu bzace bzentse bzicimusiya pezi, ndipo bzin’dzadya thupi lace bzicidzamutentha na moto. 17 Thangwe Mulungu an’dzawapasa makumbukidwe yakucita bzomwe iye akufuna. Wentsenewo an’dzakhala na makumbukidwe mabodzi yakuti apereke mphanvu yawo yakutonga kwa cirombo cire, mpaka pa nthawe yomwe mafala ya Mulungu yan’dzakwanisika. 18 Ndipo mkazi omwe wawonayo akuimira mzinda ukulu omwe ukutonga amambo wa pa dziko la pantsi.”

18 Patsogolo pace, ndidawona anjo munango akubuluka kucokera kudzulu. Iye akhana utongi bukulu, ndipo dziko la pantsi lidabvunikiridwa na ulemerero bwace. 2 Ndipo iye adakuwa mwa mphanvu kuti: “Wagwa! Wagwa Babiloniya Mkulu, mzinda umweyu wasanduka mbuto yakukhala madimonyo na yakubisalikira mtundu uli-wentse wa mizimu yakupswipa na mbalame zakupswipa na zakuwengedwa. 3 Pakuti wanthu wa mitundu yentse aledzera na vinyu yakalanga ka uputa bwace, ndipo amambo wa pa dziko la pantsi acita naye upombo. Ndipo anyamalonda wa pa dziko la pantsi adadala na bzinthu bzakuumira bzomwe mkaziyu akhabzigwezekera mwakusaya manyazi.”

4 Ndipo ndidabva fala linango kucokera kudzulu lomwe lidati: “Cokani mwa iye wanthu wangu, penu mun’funa lini kukhala na mulandu wa pikado zace, ndipo penu mun’funambo lini kudzatambira mbali ya cisi comwe cin’dzamugwera. 5 Pakuti pikado zace n’zizinji kwene-kwene ndipo Mulungu an’dzamutonga thangwe ra bzinthu bzakuipa bzomwe iye akhacita. 6 Mubwezereni mwakubverana na bzinthu bzomwe iye adacita, inde mubwezereni kawiri mwakubverana na bzomwe adacita, mu kopo yomwe iye adasanganizira bzakumwa musanganizirenimbo kawiri. 7 Ninga momwe iye adabzipasira ulemerero, acibzigwezekera bzinthu bzizinji bzakuumira mwakusaya manyazi, m’pasenimbo nyathwa mucimusunamisa. Pakuti iye ambalewa mu mtima mwace kuti: ‘Inepano ndine mambo wacikazi,* ndipo ndine lini mamsiwa ndipo cipo ndicidzasunama.’ 8 Ndipopa ntsiku ibodzi bzisi bzin’dzamubwerera. Bzisibzo na infa, kusunama na njala. Ndipo iye an’dzanyekeratu na moto thangwe Yahova Mulungu omwe an’dzamutonga ngwa mphanvu.

9 “Ndipo amambo pa dziko la pantsi omwe adacita naye upombo acikhala naye pabodzi pa bzinthu bzizinji bzakuumira kwene-kwene bzomwe iye adabzigwezekera mwakusaya manyazi, an’dzalira acibzimenya pacifuwa mwakusunama thangwe ra iye, akadzawona utsi bwa kutenthedwa kwace. 10 Iwo an’dzaima patali na mantha pakuwona kuboneresedwa kwace ndipo an’dzati: ‘Yowene, yowene, mzinda mkuluwe, Babiloniya iwe, mzinda wamphanvu, pakuti kwa ora ibodzi kutongedwa kwako kwakufikira!’

11 “Ndipo anyamalonda wa pa dziko la pantsi an’dzalira acisunama thangwe ra iye, pakuti pan’dzakhala palibe pomwe ali-wentse wakugula malonda yawo. 12 Malondayo njaya: Oro, prata, minyala yakufunika kwene-kwene, misanga yakuumira, bzakubvala bzakuumira, bzakubvala bzifuira, bzakubvala bza seda, bzakubvala bzifuira kwene-kwene, bzinthu bzakukonzedwa na matabwa yabwino, bzakukonzedwa na nyanga za nzou, matabwa yakuumira kwene-kwene, bzakukonzedwa na mkuwa, simbi na mwala wa mármore; 13 Ndipo pan’dzakhala palibembo wakuwagulira kanela,* ngwedegero za ku indiya, bzakufukiza, mafuta yakununtcira, ntsonono zakununtcira, vinyu, mafuta ya azeite, ufa bwakunyodoka, tirigu, ng’ombe, mabira, makavalo, ngolo, akapolo pabodzi na wanthu winango.* 14 Inde, bzisapo bzabwino bzomwe ukhafuna, bzakudya bzabwino na bzinthu bzakudeka, bzakumalira, ndipo cipo ucidzabzigumana pomwe.

15 “Anyamalonda wa bzinthu bzimwebzi omwe akhadadala thangwe ra iye, an’dzaima patali na mantha thangwe ra kuboneresedwa kwace, ndipo an’dzalira acisunama, 16 ndipo an’dzati: ‘Yowene, yowene, mzinda ukuluwe, wakubvala bzakubvala bzakuumira bzifuira na bzifuira kwene-kwene, ndipo wakudekesedwa na bzinthu bza oro, minyala yakufunika kwene-kwene na misanga yakuumira, 17 thangwe cuma cako cizinji capfudzidwa mu kanthawe kakucepa!’

“Ndipo akapitawo wentse wa xitima za m’madzi,* anyakucita ulendo bwa m’madzi, amalinyero na wentse omwe ambacita malonda m’nyanza an’dzaima na patali. 18 Ndipo akadzawona utsi bwa kutenthedwa kwace, iwo an’dzakuwa kuti: ‘Ni mzinda uponi omwe ungandendemerane na mzinda ukuluyu?’ 19 Iwo an’dzaikha pfumbi mu msolo mwawo, an’dzakuwa, an’dzalira na kudandaula acimbalewa kuti: ‘Yowene, yowene, mzinda ukuluwe, pakuti wanthu wentse omwe akhana xitima za m’madzi akhadadala thangwe ra iye ndipo mu kanthawe kakucepa iye wapfudzidwa!’

20 “Kondwani thangwe ra iye, imwe omwe mumbakhala kudzulu na imwembo anyakucena, apostolo na apolofeta, thangwe Mulungu wamutonga na kumupasa nyathwa thangwe ra imwepo!”

21 Ndipo anjo wamphanvu adadzusa cimwala cakundendemerana na mwala ukulu wakupeyera aciuthusa m’nyanza, ndipo adati: “Babiloniya mzinda ukulu un’dzathusidwa tenepa mwakamfulumize ndipo cipo ucidzawoneka pomwe. 22 Pamwepo, anyakuimba viyola,* anyakuimba bzitoliro, anyakuimba bzimbututu na anyakuimba winango, an’dzabveka lini pomwe mwa iwepo. Ndipo mwa iwepo mun’dzagumanika lini pomwe misiri wa basa liri-lentse ne baludya la anyakupeya pathumba. 23 Mwa iwepo, mun’dzawoneka lini pomwe ceza ca kandiyero, ndipo mun’dzabveka lini pomwe fala la namwali wacimuna na wacikazi; pakuti anyamalonda wako akhali akulu-akulu wa pa dziko la pantsi ndipo iwepo wapumpsa mitundu yentse ya wanthu na bzicito bzako bza mizimu. 24 Inde, mwa iye mudagumanidwa mulopa wa apolofeta, wa anyakucena na wa wanthu wentse omwe adaphedwa pa dziko la pantsi.”

19 Pomwe bzimwebzi bzidamala, ndidabva mafala yakukuwa kudzulu ninga thimu likulu. Mafalayo yakhati: “Tumbizani Yahova!* Cipulumuso, ulemerero na mphanvu mpsa Mulungu wathu, 2 thangwe katongedwe kace n’kacadidi na kakulungama. Pakuti iye wapasa nyathwa puta mkulu omwe akupumpsa dziko la pantsi na uputa* bwace, ndipo iye an’dzabwezera putayo, thangwe ra mulopa wa akapolo wace. 3 Ndipo pa nthawe imweyoletu, iwo adalewa pomwe kaciwiri kuti: “Tumbizani Yahova!* Ndipo utsi bwa kutenthedwa kwa mkaziyo budapitiriza kukwira mpaka kale-kale.”

4 Ndipo akulu-akulu 24 pabodzi na anjo anai wale, adagodama aciyamba kunamata Mulungu, ule omwe adakhala pa mpando wa umambo, acimbalewa kuti: “Ameni! Tumbizani Yahova!”*

5 Ndipo padabvekambo fala kucokera pa mpando wa umambo lomwe lidati: “Tumbizani Mulungu wathu, imwe akapolo wace mwentse omwe mumbamugopa, akulu na ang’ono kubodzi.”

6 Ndipo ndidabva baludya ninga mafala ya thimu likulu ndipo likhabvekambo ninga baludya la madzi mazinji na kugunda kwa mphanvu. Mafalayo yakhati: “Tumbizani Yahova,* thangwe Yahova Mulungu wathu, Wamphanvu-zentse, wayamba kutonga ninga mambo.* 7 Mbatikondweni ticikomedwa kwene-kwene ndipo timupase ulemerero, thangwe malowozi ya Mwana wa Bira yafika, ndipo mkazi wace wakonzeka kale. 8 Inde, iye wabvumizidwa kubvala bzakubvala bzakuumira, bzakuyetima na bzakucena bwino. Pakuti bzakubvala bzakuumirabzo, bzikuimira mabasa yakulungama ya anyakucena.”

9 Ndipo iye adandiuza kuti: “Nemba: An’kondwa mbale omwe adacemeredwa ku phwando la malowozi ya Mwana wa Bira.” Ndipo iye adandiuza pomwe kuti: “Yamweya ni mafala yacadidi ya Mulungu. 10 Na bzimwebzi, ndidagodama patsogolo pa minyendo yace kuti ndimunamate. Tsono iye adandiuza kuti: “Ne! Leka kucita tenepo! Inepano ndine kapolo ninga iwepo na abale wako omwe akucita basa lakupereka umboni bwa Jezu. Namata Mulungu! Pakuti cakulinga ca mapolofesiya, ni kucitira umboni bza Jezu.”

11 Ndidawona kudzulu kudafunguka ndipo kudacoka kavalo mcena. Omwe akhadapakira kavaloyo, ambacemeredwa Wakukhulupirika na Wacadidi. Ndipo iye ambatonga acimenya nkhondo mwacirungamo. 12 Maso yace yali ninga cirambi-rambi ca moto, ndipo mu msolo mwace muna korowa zizinji. Iye ana dzina lakunembedwa lomwe palibe omwe ambalidziwa, koma iye yekha. 13 Iye adabvala cakubvala cakuwaziridwa mulopa, ndipo akhacemeredwa na dzina lakuti Fala la Mulungu. 14 Ndipo acikunda wakudzulu akhamutewera na makavalo macena. Ndipo iwo akhadabvala bzakubvala bzakuumira, bzakuyetima na bzicena. 15 Ndipo mkamwa mwace mudacoka xipada itali yakuthwa kuti aphere nayo wanthu wa mitundu. Ndipo iye an’dzawausa na mpsimbo ya simbi. Kuthumizira bzimwebzi, iye an’dzaponda cakupsinyira vinyu ca ukali bwa Mulungu Wamphanvu-zentse. 16 Pa cakubvala cace cakunja, inde, pa ntcafu yace padanembedwa dzina lakuti, Mambo wa amambo na Mbuya wa ambuya.

17 Ndidawona pomwe anjo adaima pa dzuwa. Iye adacemera mwakukuwa mbalame zentse zakumbuluka m’dzaulu, aciti: “Bwerani kuno, tsonkhanani pabodzi kuti mubwere ku phwando likulu la Mulungu, 18 kuti mudzadye nyama za amambo, za atsogoleri wa acikunda, za amuna wamphanvu, za makavalo na anyakupakira wace, nyama za wentse, wanthu waufulu, akapolo, ang’ono na akulu kubodzi.”

19 Ndipo ndidawona cirombo cire, amambo wa pa dziko la pantsi na acikunda wace, adatsonkhana pabodzi kuti amenyane na ule omwe adapakira pa kavalo pabodzi na acikunda wace. 20 Ndipo ciromboco cidaphatidwa pabodzi na mpolofeta wakunama, omwe akhacita bzakudabwisa, bzomwe bzikhapumpsa wale omwe adatambira cizindikiro ca cirombo na omwe akhanamata cifanikiso cace. Bzentse bziwiri bzikhana moyo pomwe bzidathusidwa mu thawale la moto wakugaka mwamphanvu. 21 Koma winangowo adaphedwa na xipada itali, yomwe ikhacokera pa mulomo pa ule omwe akhadapakira pa kavalo. Ndipo mbalame zidakhuta na nyama za wanthu amwewo.

20 Ndipo ndidawona anjo akubuluka kucokera kudzulu, iye akhana xavi ca ku ciphompho ndipo akhana korenti ikulu m’manja mwace. 2 Iye adaphata cinyoka, cinyoka cakale-kale cire, cakucemeredwa Dyabu na Sathani, ndipo adacimanga kwa magole 1000. 3 Iye adacithusa ku ciphomphoko acicifungira kumweko. Ndipo padzaulu pa ciphomphoco adaikha cizindikiro kuti cileke kupumpsa pomwe wanthu kwa magole 1000. Patsogolo pace cin’dzatsudzulidwa kwa kanthawe kakucepa.

4 Ndidawona mipando ya umambo, ndipo omwe akhadakhala m’mipandoyo adapasidwa mphanvu ya kutonga. Inde, ndidawonambo moyo wa wanthu omwe adaphedwa thangwe ra kupereka umboni bwa Jezu na kulewa bza Mulungu na wale omwe alibe kunamata cirombo cire ayai cifanikiso cace, ndipo alibe kutambira cizindikiro m’mikuma na m’manja mwawo. Iwo adakhala na moyo acitonga ninga amambo pabodzi na Kristu kwa magole 1000. 5 (Anyakufa winangowo alibe kukhala pomwe na moyo mpaka magole 1000 kumala.) Kumweku n’kulamusidwa kwakuyamba kwa anyakufa. 6 Wanthu wakukondwa na wakucena mbale wentse omwe an’dzamuka pakuyamba. Kwa iwo, infa yaciwiri iribe mphanvu, koma iwo an’dzakhala antsembe wa Mulungu na wa Jezu Kristu. Ndipo iwo an’dzatonga ninga amambo na Jezuyo kwa magole 1000.

7 Yakadzandomala magole 1000, Sathani an’dzatsudzulidwa m’kawokomo, 8 ndipo iye an’dzacoka kuti apumpse mitundu ya wanthu wa mbali zinai za dziko la pantsi. Mitundu ya wanthuyo ni Gogi na Magogi ndipo an’dzatsonkhanisidwa pabodzi kuti amenye nkhondo. Kuwanda kwawo kuli ninga mcenga wa m’nyanza. 9 Iwo an’dzamwazika pa dziko lentse la pantsi, acidzazungulira misasa ya anyakucena na mzinda omwe Mulungu ambaufuna. Tsono moto un’dzabuluka kucokera kudzulu uciwanyekesa. 10 Dyabu omwe akhawapumpsa an’dzathusidwa mu thawale la moto wakugaka lomwe cirombo na mpolofeta ule akhalimbo kale m’mwemo; ndipo iwo an’dzaboneresedwa usiku na masikati mpaka kale-kale.

11 Ndipo ndidawona mpando wa umambo ukulu mcena na Omwe akhadakhala pa mpandopo. Ndipo dziko la pantsi na kudzulu bzidathawa pamaso pace ndipo palibe kugumanika pomwe mbuto yawo. 12 Ndipo ndidawona anyakufa, akulu na ang’ono kubodzi, akhadaima patsogolo pa mpando wa umambo, ndipo pamwepo mabukhu yadafungulidwa. Tsono padafungulidwa bukhu linango, limweri likhali bukhu la moyo. Anyakufa akhatongedwa mwakuphatisa basa bzomwe bzikhadanembedwa m’mabukhumo mwakubverana na bzicito bzawo. 13 Ndipo nyanza idapereka anyakufa omwe akhali m’mwemo, infa na Thenje* bzidaperekambo anyakufa omwe akhali m’mwemo ndipo iwo adatongedwa ali-wentse payekha mwakubverana na bzomwe adacita. 14 Infa na Thenje* bzidathusidwa mu thawale la moto. Thawale la motolo, likuimira infa yaciwiri. 15 Kuthumizira bzimwebzi, ali-wentse omwe dzina lace liribe kugumanika mu bukhu la moyo, adathusidwambo mu thawale la moto.

21 Ndipo ndidawona kudzulu kupsa na dziko la pantsi lipsa; pakuti kudzulu kwa kale na dziko la pantsi lakale bzikhadacoka, ndipo kukhalibe pomwe nyanza. 2 Ndipo ndidawonambo mzinda wakucena, Jeruzalemu mupsa, ukubuluka kucokera kudzulu kwa Mulungu. Ndipo ukhadakonzekeredwa ninga namwali omwe wabvala bwino kuti atambire mwamuna wace. 3 Na bzimwebzi, ndidabva fala lakukuwa kucokera ku mpando wa umambo lomwe lidati: “Onani! Tendi la Mulungu, liri pakati pa wanthu. Iye an’dzakhala pakati pawo, ndipo iwo an’dzakhala wanthu wace. Ndipo Mulungu caiyeyo an’dzakhala nawo. 4 Iye an’dzapukuta misozi yentse m’maso mwawo, ndipo infa in’dzawoneka lini pomwe. Pan’dzawoneka lini pomwe kusunama, kulira ne kuwawidwa. Pakuti bzinthu bzakale bzapita.”

5 Ndipo Ule omwe akhadakhala pa mpando wa umambo, adati: “Ona! Ndikukonza papsa bzinthu bzentse.” Ndipo adalewa pomwe kuti: “Nemba, pakuti mafala yamweya njakukhulupirika na yacadidi.” 6 Ndipo iye adandiuza kuti: “Bzakwanisika! Inepano ndine Alfa na Omega,* wakuyamba na wakumalizira. Ali-wentse omwe anibva nyota, nin’dzamupasa fovolo madzi yakucokera mu ntsantsa ya madzi ya moyo. 7 Ali-wentse omwe an’kunda, an’dzatambira utaka bumwebu. Ine nin’dzakhala Mulungu wace ndipo iye an’dzakhala mwanangu. 8 Tsono wanthu wamantha, wakusaya cikhulupiro, wakupswipa omwe ambacita bzinthu bzakunyantsa, wakupha anzawo, wakucita upombo ayai uputa,* omwe ambakhulupira bzamizimu, omwe ambanamata bzifanikiso na wentse omwe ambanama, an’dzathusidwa mu thawale la moto wakugaka. Imweyi ikuimira infa yaciwiri.”

9 M’bodzi wa anjo 7 omwe akhana matijela 7 yakudzala na bzisi 7 wale, adabwera acindiuza kuti: “Bwera, inepano nin’dzakulatiza namwali wacikazi omwe ni mkazi wa Mwana wa Bira. 10 Tenepo, mwakuphatisa basa mzimu wakucena, iye adanditenga acindiyendesa pa phiri likulu na litali kwene-kwene. Ndipo iye adandilatiza mzinda wakucena omwe ni Jeruzalemu ukubuluka kucokera kudzulu kwa Mulungu, 11 ndipo ukhana ulemerero bwa Mulunguyo. Ndipo ukhayetima ninga mwala wakufunika, ninga mwala wa jaspe wakungwerewera ninga vidru. 12 Mzindayo ukhana mpanda ukulu na utali, ndipo ukhana misuwo 12 na anjo 12 m’misuwomo. Ndipo m’misuwomo mukhadanemba madzina ya madzinza 12 ya wana wa Jirayeri. 13 Kumabvadzuwa kukhana misuwo mitatu, ku norte* misuwo mitatu, ku suli* misuwo mitatu ndipo kumadokero misuwo mitatu. 14 Mpanda wa mzindayo ukhadamangidwa padzulu pa aliserse yakumangidwa na minyala 12. Pa minyala imweyo, pakhadanembedwa madzina 12 ya apostolo 12 wa Mwana wa Bira.

15 Tsapano omwe akhalewalewa nandeyo akhana mtete wakupimira wa oro, kuti apime mzindayo, misuwo yace na mpanda wace. 16 Mzindayo ukhali wa makhona manai. Mtali mwace na mfupi mwace, mukhali mwakundendemerana. Ndipo iye adapima mzindayo na mtete ndipo ukhali wa makilometro 2 220.* Mfupi mwace, mtali mwace na kutalimpha kwace, mukhadandendemerana. 17 Iye adapimambo mpanda wa mzindayo, ndipo ukhana mametro 64 mwakubverana na mphimo ya munthu yomwe ikhadandendemeranambo na mphimo ya anjo. 18 Mpandayo ukhadamangidwa na mwala wa jaspe, ndipo mzindayo ukhadamangidwa na oro yabwino kwene-kwene yakungwerewera ninga vidru. 19 Ma aliserse ya mpanda wa mzindayo, yakhadakonzedwa na mtundu uli-wentse wa minyala yakufunika. Aliserse yakuyamba ikhadakonzedwa na mwala wa jaspe, yaciwiri na mwala wa safira, yacitatu na mwala wa kalsedoniya, yacinai na mwala wa esmeralda, 20 yacixanu na mwala wa sardonika, yaci 6 na mwala wa sardiyo, yaci 7 na mwala wa krizolito, yaci 8 na mwala wa berilo, yaci 9 na mwala wa topaziyo, yaci 10 na mwala wa krizoprazo, yaci 11 na mwala wa jasintu, ndipo yaci 12 na mwala wa ametista. 21 Ndipo misuwo 12 ire, ikhadakonzedwa na minyala yakufunika 12. Msuwo uli-wentse ukhana mwala m’bodzi, ndipo mseu ukulu wa mzindayo ukhadakonzedwa na oro yabwino kwene-kwene ninga vidru yakungwerewera.

22 Ndiribe kuwona templo mwemo, thangwe Yahova, Mulungu Wamphanvu-zentse pabodzi na Mwana wa Bira, ndiwo templo ya mzindayo. 23 Ndipo mzindayo ukhafunika lini kubvunikiridwa na dzuwa ayai mwezi, pakuti ulemerero bwa Mulungu bukhabvunika kale, ndipo kandiyero yace ikhali Mwana wa Bira. 24 Mitundu ya wanthu in’dzafamba mu ceza ca mzindayo, ndipo amambo wa pa dziko la pantsi an’dzabweresa ulemerero bwawo m’mwemo. 25 Misuwo yace, cipo icidzafungidwa thangwe kun’dzakhala na masikati yokha-yokha ndipo kun’dzakhala kulibe usiku. 26 Ndipo iwo an’dzabweresa ulemerero na ulemu kwa mitundu ya wanthu mu mzindamo. 27 Tsono cinthu ciri-centse cakupswipa, ali-wentse wakucita bzinthu bzakunyatsa na anyakunama, an’dzapita lini mu mzindamo. Omwe an’dzapita ni wale okha omwe adanembedwa mu bukhu la moyo la Mwana wa Bira.

22 Ndipo iye adandilatiza mkulo wa madzi ya moyo, madziyo yakhadacena mbee ninga vidru ndipo yakhayerera kucokera pa mpando wa umambo wa Mulungu, na wa Mwana wa Bira. 2 Mkuloyo ukhapita na pakati pa mseu ukulu wa mu mzindamo ndipo ng’ambu zentse za mkuloyo zikhana miti ya moyo yomwe ikhambabala bzisapo maulendo 12 pa gole liri-lentse. Bzomwe bzikuthandauza kuti ikhabala bzisapo mwezi uli-wentse. Ndipo masamba ya mitiyo yakhali yakupozera mitundu ya wanthu.

3 Ndipo mu mzindamo mun’dzatembereredwa lini pomwe. Koma mpando wa umambo wa Mulungu na wa Mwana wa Bira, un’dzakhala m’mwemo ndipo akapolo wa Mulunguyo an’dzamuphatira basa lakupambulika. 4 Iwo an’dzawona nkhope yace ndipo dzina lace lin’dzakhala lanembedwa pa mikuma yawo. 5 Pan’dzawoneka lini pomwe usiku ndipo iwo an’dzafunikira lini pomwe kandiyero ayai ceza ca dzuwa, pakuti Yahova Mulungu an’dzawabvunikira ndipo iwo an’dzakhala amambo mpaka kale-kale.

6 Iye adandiuza kuti: “Mafalaya njakukhulupirika ndipo njacadidi, inde, Yahova Mulungu, omwe ambalewalewa mwakuphatisa basa apolofeta wace, adatuma anjo wace kuti adzalatize akapolo wace, bzinthu bzomwe bzin’dzacitika mwakusaya kucedwa. 7 Bvaya! Inepano ndikubwera mwakamfulumize. An’kondwa ni ali-wentse omwe ambabvera mafala ya m’bukhu la polofesiyali.”

8 Ine Juwau, ndine m’bodzi omwe ndidabva na kuwona bzinthu bzimwebzi. Pomwe ndidabva na kuwona bzimwebzi, ndidagodama kuti ndinamate anjo omwe adandiwonesa bzinthu bzimwebzi. 9 Tsono iye adandiuza kuti: “Ne! Leka kucita tenepo! Inepano ndine kapolo ninga iwepo na abale wako omwe ni apolofeta pabodzi na wale omwe akubvera mafala ya m’bukhuli. Namata Mulungu.”

10 Iye adandiuza pomwe kuti: “Leka kubisa mafala ya m’bukhu la polofesiyali, pakuti nthawe yace yasala pang’ono kufika. 11 Wakusaya kulungama apitirize kucita bzakusaya kulungamabzo, wakucita bzakunyantsa apitirize kucita bzinthu bzakunyantsabzo; tsono wakulungama apitirize kucita bzakulungamabzo ndipo wakucena apitirize kukhala wakucena.

12 “‘Bvaya! Inepano ndikubwera mwakamfulumize ndipo mabaibai yomwe nin’funa kudzapereka, yana inepano kuti ndidzapase ali-wentse mwakubverana na mabasa yace. 13 Ine ndine Alfa na Omega,* wakuyamba na wakumalizira, ciyambi na cimaliziro. 14 An’kondwa ni wale omwe an’fula bzakubvala bzawo, iwo an’dzakhala na ufulu bwakudya bza m’muti wamoyo na kubvumizidwa kupita mu mzinda na pa misuwo. 15 Kunja kuna mbwaya,* omwe ambakhulupira bzamizimu, omwe ambacita upombo ayai uputa,* anyakupha anzawo, anyakunamata bzifanikiso na wentse omwe ambafuna kunama na kucita bzacinyengo.’

16 “‘Ine Jezu, ndatumiza anjo wangu kuti acitire umboni bwa bzinthu bzimwebzi ku magwere. Ine ndine muzi na mwana wa Davide ndipo ndine nyenyezi yakuyetima yakumacibese.’”

17 Mzimu wakucena pabodzi na namwali wacikazi akupitiriza kulewa kuti: “Bwera!” ndipo ali-wentse omwe akubva alewe kuti: “Bwera!” ndipo wentse omwe ana nyota abwere ndipo omwe angafune amwe madzi yamoyo fovolo.

18 Inepano ndikucitira umboni kwa wentse omwe akubva mafala ya m’bukhu la polofesiyali kuti: Ali-wentse omwe an’thumizira pa bzimwebzi, Mulungu an’dzamuthumizirambo bzisi bzomwe bzidanembedwa m’bukhu limweri; 19 ndipo munthu ali-wentse akacosa kali-kentse m’mafala ya bukhu la polofesiyali, Mulungu an’dzacosambo mbali yace ninga momwe bzidanembedwera m’bukhuli. Iye an’dzamulekerera lini kudya bzisapo bza miti ya moyo ndipo an’dzamulekererambo lini kupita mu mzinda wakucena.

20 “Omwe akucitira umboni bzinthu bzimwebzi akulewa kuti: ‘Inde, ndikubwera mwakamfulumize.’”

“Ameni! Bwerani Mbuya Jezu.”

21 Kudeka mtima kukulu kwa Mbuya Jezu, kukhale na anyakucenawo.