Iwo Adathawa Mambo Wakuipa

Zuze adalamusa Mariya, ndipo adamuuza bzipsa mwa kam’fulumize. Anjo wa Yahova akhadamubwerera ku tulo, acimuuza kuti: ‘Lamuka, tenga mwanayu pabodzi na mai wacewa, muthawire ku Edjipito, ndipo mukakhale kumweko mpaka ndidzakuuzeni, thangwe Herode ankunyang’ana mwanayu kuti amuphe.’—Mateu 2:13.

Zuze, Mariya pabodzi na mwana wawo adathawa mwakamfulumize usiku bumweboletu. Iwo adacita bzimwebzo pa nthawe imweyo thangwe mambo Herode adazindikira kuti anyakupfunza nyenyezi wale alibe kucita bzomwe iye akhadawauza. Iye akhadawauza kuti pakubwerera apite acikamudziwisa komwe Jezu akhali. Koma iwo adacoka mu mzindamo ndipo alibe kukamuuza komwe kukhana Jezuko. Herodeyo adakalipa kwene-kwene. Tenepo, pakuyeza kupha Jezuyo, Herode adatonga kuti wana wense wa ku Beremu wa magole mawiri yakubadwa kubwerera m’mbuyo aphedwe. Iye adawerenga magole yamweya mwakubverana na bzomwe anyakupfunza nyenyezi wale adamuuza.

Kuphedwa kwa wana wensewo cikhali cinthu cakuipa kwene-kwene! Tin’dziwa lini kuti ni wana angasi omwe adaphedwa, koma kulira mwa kukuwa na kudandaula kwa azimai omwe adapheredwa wanawo, kudakwanirisa polofesiya ya m’Bibliya yakunembedwa na Jeremiya, mpolofeta wa Mulungu.—Jeremiya 31:15.

Pa nthawe imweyo, Zuze na banja lace akhali ku Edjipito komwe iwo akhadathawira. Patsogolo pace, anjo wa Yahova adawonekera pomwe kwa Zuze ku tulo, acimuuza kuti: ‘Lamuka, tenga mwanayu pabodzi na mayi wacewa, muciyenda m’dziko la Ajirayeri, thangwe wanthu omwe akhafuna moyo wa mwanayu afa.’ (Mateu 2:20) Pa nthawe imweyo Zuze adawona kuti iye na banja lace angadabwerera ku mui kwawo. Bzimwebzi bzidakwanirisa pomwe polofesiya inango ya m’Bibliya, yomwe imbalewa kuti: Mwana wa Mulungu angadacemeredwa kuti acoke ku Edjipito.—Ozeya 11:1.

Bzinkuwoneka kuti Zuze akhafuna kukhala ku Judeya, pinango pafupi na mzinda wa Beremu. Koma akhadziwa kuti omwe akhatonga mu Judeya ni Arikelau mwana wa mambo wakuipa Herode. Pa nsiku inango, Mulungu adacenjeza pomwe Zuze bza ngozi inango kutulo. Tenepo Zuze na banja lace adathawa pomwe, ndipo adakakhala ku mpoto kwa Galileya mu mzinda wa Nazaleti, komwe kukhali kutali na likulu la cipembedzo Cacijuda. Jezu adakulira kumweko ndipo bzimwebzi bzidakwanirisa polofesiya inango pomwe yakuti: ‘Iye an’dzacemeredwa Mnazaleti.’—Mateu 2:23.