Jezu Adalatiza Nsisi Pakupoza Munthu Wa Mapere

Pomwe Jezu pabodzi na anyakupfunza wace anai akhapalizira mu sinagoga ku Galileya, mbiri ya bzinthu bza mphanvu bzomwe adacita idabvekera ku madera yakutali. (Marko 1:39) Mbiri imweyi idafikambo mu mzinda munango momwe mukhana munthu wa mapere. Mwakubverana na Luka omwe akhali Dotolo, iye adalewa kuti munthuyo akhana ‘mapere thupi lace lense.’ (Luka 5:12) Matenda ya mapere yakakhala kuti yakhalisa m’thupi, yambadzonga bziwalo bza munthu omwe ana mapereyo.

Munthu wamapere omwe adagumana na Jezuyo akhapasa nsisi kwene-kwene ndipo akhabvumizidwa lini kukhala pafupi na wanthu. Ndipo munthuyo akhafunika kumbakuwa kuti ‘wakupswipa, wakupswipa!’ Bzimwebzi bzikhacitisa kuti wanthu aleke kumufenderera kugopera kuti angatengembo matendayo. (Mwambo 13:45, 46) Kodi munthuyo adacita ciyani pomwe adawona Jezu? Adamufenderera ndipo adagodama acimukumbira kuti: ‘Mbuya penu mun’funa, mungandicenese.’—Mateu 8:2.

Munthuyo adalatiza kuti akhakhulupira kwene-kwene Jezu. Ndipo bzinkuwoneka kuti iye akhapasa nsisi kwene-kwene na matenda yaceyo. Kodi Jezu adacita ciyani? Kodi imwepo mungadacita tani mungadakhala kuti mukhalipombo kumweko? Jezu adabva nsisi mwakuti adafuthula boko lace acimuphata. Patsogolo pace adamuuza kuti: ‘Ndin’funa! Khala wakucena.’ (Mateu 8:3) Wanthu winango alibe kukhulupira, pomwe adawona kuti nthawe imweyo munthuyo adalimba ndipo mapere yace yadamala.

Kodi imwepo mungafune lini kukhala na mambo omwe ambabvera nsisi wanthu na kuti ngwakufunisisa kuthandiza winango ninga momwe Jezu akhacitira? Bzomwe Jezu adacita na munthu wamapere ule, bzimbalatiza kuti iye akadzakhala Mambo wa dziko lense, polofesiya ya m’Bibliyayi in’dzakwanisika. Polofesiyayo imbati: ‘Iye an’dzabvera nsisi munthu wakubzicepswa na munthu wakusauka, ndipo an’dzapulumusa moyo wa anyakusauka.’ (Psalymo 72:13) Pa nthawe imweyo, Jezu an’dzakwanirisa cakulinga cace cakufuna kuthandiza wanthu wense omwe ankubonera.

Kumbukirani kuti pomwe Jezu akhanati kupoza munthu wa mapere ule, wanthu akhakomedwa kale na utumiki bwace. Ndipo bzinkuwoneka kuti wanthu azinji adabva pomwe bza nkhani yakudekeza yakuti iye adapoza munthu wamapere. Tsono Jezu akhafuna lini kuti wanthu ambamukhulupire kokha na bzomwe iwo akhabva. Jezuyo akhadziwa bza polofesiya yomwe idaleweratu kuti ‘mafala yace yan’dzabvedwa lini mu mseu’ na cakulinga cakuti apumpswe wanthu. (Zaiya 42:1, 2) Mwa kubverana na bzimwebzi Jezu adauza munthu omwe adamupozayo kuti: ‘Leka kuuza ali-wense bza nkhaniyi, koma ndoko kawonekere kwa wansembe, ndipo ukapereke mphaso yomwe Mozeji adalewa.’—Mateu 8:4.

Ndokumbukirani, momwe munthuyo adakhalira wakukondwa kwene-kwene pomwe adapozedwa mapereyo, mpaka adatazira kuteweza bzomwe Jezu adamuuza mwakuti akhandouza munthu ali-wense bzomwe bzidamucitikirabzo. Bzimwebzi bzidacitisa wanthu azinji kufuna kudziwa bzinthu bzizinji pakulewa bza Jezu. Thangwe ra bzimwebzi, Jezu akhapita mwakabise-bise m’mzindamo, mpaka adakhala kwa yekha mwa kanthawe. Napo bzikhali tenepo, wanthu wakucokera m’madera yakusiyana-siyana akhabwera basi kuti adzapfunzisidwe na kupozedwa.