Tewezerani Ciratizo ca Wapolofeta—Amosi
1. Thangwe ranyi tingalimbisidwe na ciratizo ca Amosi?
1 Kodi mumbabzibva wakusaya kuthemera kupalizira thangwe ra kaleredwe na mapfunziro yanu yakucepa? Penu bziri tenepoyo, mungalimbisidwe mtima na ciratizo ca Amosi. Iye akhali mulimi na m’busa wa mabira, tsono Yahova adamupasa mphanvu yakupalizira nkhani yakufunika kwene-kwene. (Amosi 1:1; 7:14, 15) Bzibodzi-bodzimbo, lero Yahova ambaphatisambo basa wanthu wakunyozeka. (1 Wakolinto 1:27-29) Kodi tingapfunze pomwe ciani kwa mpolofeta Amosi bza utumiki bwathu?
2. Thangwe ranyi tingakwanise kulimbikira tikambatsutsidwa mu utumiki?
2 Mukambatsutsidwa, Limbikirani Basi: Mu umambo bwa kumpoto bwa madzinza khumi ya Jirayeri, pomwe wansembe Amaziya nyakunamata ka mphulu, adabva polofesiya ya Amosi, iye adamutawira na mafala ninga yakuti: ‘Ndoko ku mui! Tisiye tekha! Tinaco kale cipembedzo cathu!’ (Amosi 7:12, 13) Amaziya adapitanisa mafala ya mpolofetayu kuti Mambo Jerobuwamu aletse basa la Amosi. (Amosi 7:7-11) Tsono Amosi alibe kubvuma kugopsedwa. Lerombo, atsogoleri winango wa bzipembedzo Bzacikristau, wambalinga atsogoleri wa ndale kuti awathandize kuzunza wanthu wa Yahova. Tsono, Yahova ambatitsimikizira kuti palibe cifuzo cakukonzedwera ifepano cin’dzakunda.—Zaiya 54:17.
3. Kodi njiponi mitundu miwiri ya nkhani yomwe timbapalizira lero?
3 Dziwisani Bziyeruzo bza Mulungu na Bzisimbo bza Kutsogolo: Napo Amosi adalewa mapolofesiya ya kuyeruzidwa kwa umambo bwa madzinza khumi ya Jirayeri, m’bukhu la Bibliya lakudziwika na dzina lace, Amosi adamaliza acilewa bza piciro la Yahova lakubwezeresa bzinthu pabodzi na bzisimbo bzizinjisa. (Amosi 9:13-15) Ifembo timbalewa bza kubwera kwa “nsiku ya ciyeruzo” ya Mulungu, tsono imweyi ni mbali ibodzi ya “bzipsa bzabwino bza umambo” bzomwe timbapalizira. (2 Pedru 3:7; Mateu 24:14) Yahova akadzapfudza anyakuipa pa Armagedo, iye an’dzafungula njira kuti dzikoli likhale paraizo.—Psalymo 37:34.
4. Kodi tina citsimikizo ciponi cakuti tingakwanise kuteweza kufuna kwa Yahova?
4 Kupalizira nkhani ya Umambo m’dziko lakuwanda na anyakutsutsa, kumbacitisa kuti kubzipereka kwathu kwa Yahova na kufunisisa kwathu kucita kufuna kwace kuyezedwe. (Juwau 15:19) Tsono na tenepo, ifepano tina citsimikizo cakuti Yahova an’dzapitiriza kutipasa bzakufunika kuti tikwanise kuteweza kufuna kwace, ninga momwe adacitira na Amosi.—2 Wakolinto 3:5.