Tewezerani Ciratizo ca Wapolofeta—Ozeya
1. Kodi nguponi mbvunzo omwe imwepo mudabzibvunza kale?
1 ‘Kodi n’ciani ndingafune kucitira Yahova?’ Pinango imwepo mudabzibvunza kale mbvunzoyu pa kukumbukira kukoma mtima na nsisi zikulu za Yahova. (Psalymo 103:2-4; 116:12) Ozeya adafunisisa kucita bzomwe Yahova akhamuuza, napo bzikhafunika kucita bzinthu bzakunesa. Kodi tingamutewezere tani Ozeya?
2. Kodi tingamutewezere tani Ozeya pa nkhani yakupirira pa basa kupalizira?
2 Kupalizira mu Nthawe Zakunesa: Nkhani ya Ozeya ikhayenda maka-maka kwa umambo bwa madzinza khumi ya Jirayeri, komwe kunamata kwacadidi kukhadasala pang’ono kumala. Mambo Jerobuwamu II adacita bzakuipa pa maso pa Yahova, ndipo adapitiriza na kunamata ka mphulu, komwe kukhadayambisidwa na Jerobuwamu I. (2 Wamambo [Mafumu] 14:23, 24) Wamambo womwe wadadzapita patsogolo pace, wadapitiriza kudzonga mwauzimu umambo bwa madzinza khumiyo, mpaka kupfudzidwa mu gole la 740 A.E.C. Tsono, napo akhali pakati pa kunamata kwapezi, Ozeya mwakukhulupirika adatumikira ninga mpolofeta magole 59. Kodi ndifembo wakufunisisa mwa njira ibodzi-bodziyo kupalizira magole na magole, napo penu wanthu wankutibvera lini ayai wankutitsutsa?—2 Timotio 4:2.
3. Kodi moyo wa Ozeya udawonesa tani nsisi zomwe Yahova akhacitira Wajirayeri?
3 Kupitiriza Kukumbukira Nsisi za Yahova: Yahova adauza Ozeya kuti alowole ‘mkazi omwe adadzacita upombo.’ (Ozeya 1:2) Napo mkazace Gomeri adamuberekera mwana wacimuna, patsogolo pace iye adaberekambo wana awiri wa pa thengo. Ozeya adafunisisa kumukhululukira mkazaceyo. Bzimwebzi bzidawonesa nsisi zikulu zomwe Yahova wakhacitira Wajirayeri wakuipa wale, pomwe iwo wakhakungula. (Ozeya 3:1; Waroma 9:22-26) Kodi ndife wakufunisisadi kuikha bzakufuna bzathu pa mbali kuti tidziwise nsisi za Yahova kwa wanthu wa mtundu uli-wense?—1 Wakolinto 9:19-23.
4. Kodi n’bzinthu bziponi bzomwe tingacite kuti titumikire Yahova?
4 Atumiki winango wa Yahova wadasiya mabasa ya kobiri zizinji kuti waphatise basa nthawe izinji mu utumiki. Winango wadakhala wakusaya kulowola ayai kulowodwa, ayai kubereka wana kuti waikhe patsogolo bzakufuna bza Umambo. Pakukumbukira moyo wa Ozeya, tingalewe kuti ‘Inepano ndingadacita lini bzomwe iye adacita.’ Tsono, tikatenda kwene-kwene nkhombo ya Yahova, ticikhulupira mphanvu yomwe tingapasidwe na mzimu wace wakucena, tingaphatisidwe basa na Yahova mu njira zomwe tikhazikumbukira lini, ninga momwe bzidacitikira Ozeya.—Mateu 19:26; Wafiripo 2:13.