Phatisani Bwino Basa Marevista Yakale-kale

Pakuti marevista yathu yambathandiza lini munthu yakakhala yadagwezekedwa ayai kutayidwa, bzin’funika tiyezere kuyagawira. Revista ibodzi yokha, ingacitise kuti munthu afune kudziwa cadidi, icimulimbisambo kuyamba kucemera dzina la Yahova. (War. 10:13, 14) Nfundo ziri panyansizi zin’dzatithandiza kugawira marevista kuti yaphatisidwe bwino basa.

• Pakupalizira m’magawo yakusaya kuphatidwa basa kawiri-kawiri, mungasiye marevista pa nyumba zomwe mungagumane lini wanthu, koma yacileka kuwonekera padeca.

• Pakupalizira m’mbuto zakugumanika wanthu wazinji, ninga m’mbuto zakupakirira xapa na m’misika, abvunzeni wanthu penu wangafune kulewenga, muciwalatiza nkhani zakusiyana-siyana za m’marevista yakale-kale, ndipo patsogolo pace auzeni asankhule yomwe angafune.

• Pakuzungira nyumba za ulapi ayai nyumba za mapfunziro zomwe ziri m’gawo la gwere lanu, mungasiye marevista m’bzipinda bzakudikirira. Tsono bziri bwino kutoma mwakumbira munthu wakusamalira m’mwemo, akakhala alipo. Bzikakhala kuti marevistayo yalipo kale, lekani kusiya manango.

• Pakukonzekera kucita ulendo bwakubwereza, kumbukirani bzomwe munthu ali-wense omwe munkuyenda kukamuzungirayo ambafuna. Iye ana banja? Ambafuna kucita ulendo kwene-kwene? Ambafuna kwene-kwene kusamalira mui wace? Nyang’anani m’marevista yakale-kale, nkhani zomwe munthuyo angafune kuzilewenga, mucikamulatiza pa ulendo bwakubwereza.

• Mukagumana pomwe na munthu wakufuna kudziwa bzizinji omwe bzikhanesa kumugumana pa mui, mulatizeni marevista yakale-kale yomwe iye akhanati kuyatambira.