Momwe Tingaphatisire Basa Matratado Yapsa!
1. Kodi n’bzinthu bziponi bzakuphatisa basa mu utumiki bzomwe bzina mkonzedwe upsa?
1 Pa Mtsonkhano wa Cigawo wa 2013 womwe ukhana msolo wakuti: “Fala la Mulungu ni Cadidi!” padacosedwa matratado maxanu. Kuthumizira bzimwebzi, tratado ya Bzipsa bza Umambo N.° 38 ya msolo wakuti: “Kodi Anyakufa Wangakhaledi Pomwe na Moyo?” idathumiziridwa pa matratadoya. Matratado matanthatuya, yadakonzedwa bwino kwene-kwene. Thangwe ranyi yana mkonzedwe upsayu? Kodi tingayaphatise tani basa bwino na mawonekedwe yaceya, pomwe tinkuyagawira pa nyumba na nyumba?
2. Kodi mkonzedwe wa tsapano wa matratado un’dzatithandiza kucita bzinthu bziponi mu utumiki?
2 Thangwe la Mkonzedwe Upsa: Mafala yakuphata mtima pa kupalizira pa nyumba na nyumba yambafuna kuti ticite bzinthu bzinai: (1) Citani mbvunzo kuti munthuyo apereke nzeru yace kuti muyambise nkhani. (2) Latizani nzeru yakucokera m’Bibliya. (3) Siirani mweneciro nyumba bukhu kuti awerenge. (4) Siyani mbvunzo kuti mudzatawire pa ulendo bwakubwereza, na kucita makonzedwe kuti mudzabwerere pomwe. Mkonzedwe wa tsapano wa matratadoya ngwakuthandiza kucita bzinthu bzinaibzi mwakusaya kunesa.
3. Kodi tin’dzafunika kugawira tani matratado yatsapano mu utumiki?
3 Momwe Tingayaphatisire Basa: (1) Mutamaliza kumusana naye, mulatizeni mitawiro yakusiyana-siyana ya mbvunzo womwe uli kutsogolo kwa tratadoyo, na kum’bvunza nzeru yace. (2) Fungulani tratadoyo, ndipo cezeranani pomwe pankulewa kuti: “Bibliya Limbati.” Penu mkhalidwe un’bvumiza werengani vesiro kucokera m’Bibliya. Mweneciro nyumba akati ana nthawe, fokotozani mbali yakuti: “Phindu Lace Mukakhulupira Bzimwebzi.” (3) M’paseni tratadoyo ndipo mulimbiseni kuti awerenge mbali zasalazo. (4) Mukanati kucoka, mulatizeni mbvunzo omwe uli kumambuyo kwa tratadoyo pansi pa kamsolo kakuti “Kuti Mukumbukire” ndipo citani makonzedwe kuti mudzacezerane mitawiro ya m’Bibliya pa ulendo bunango.
4. Kodi tingaphatise tani basa matratado yapsa pa ulendo bwa kubwereza?
4 Kucitambo ulendo bwakubwereza nkwakunesa lini. Phatisani basa mavesi yakusaya kunembedwa yomwe yali kumambuyo kwa tratadoyo kuti mutawire mbvunzo omwe mudasiya pa ulendo bwanu bwakutoma. Mukanati kucoka, mulatizeni cithunzithunzi ca broxura la Bzipsa Bzabwino, ndipo muwoneseni mweneciro nyumbayo broxuralo na msolo wakulatidwawo omwe una nkhani zakuthumizirika ndipo mukamala musiyireni broxuralo. Penu iye anilibvuma, citani makonzedwe kuti mudzacezerane broxuralo pomwe mun’dzamuzungira pa ulendo bunkubwera. Tenepa mun’dzakhala mwayambisa pfunziro la Bibliya! Ayai, m’mbuto mwa kumugawira broxura, mungamupase tratado linango mucicita makonzedwe ya kudzabwerera kuti mudzacezerane na mweneciro nyumbayo.
5. Kodi matratado ngakufunika tani mu utumiki bwathu?
5 Papita magole 130 ticiphatisa basa matratado mu utumiki bwathu. Napo kukula na mkonzedwe wace wakhala wakusiyana-siyana, matratadoyo yakhala yakuthandiza kwene-kwene mu utumiki. Tenepo tiphatise bwino basa mkonzedwe upsa wa matratadoya pa kumwaza cidziwiso ca m’Bibliya pa dziko lense Lapansi.—Mim. 15:7a.