Kugawira Mabukhu mu Gawo la Wanthu wa Bzirewedwe Bzakusiyana-siyana

¹ Mu mbuto zizinji, tsapano gawo limbaphatanidza wanthu wakucokera m’buto zakusiyana-siyana. Wazinji mwa wamwewa wambapfunza mwakamfulumize ndipo wambabvesesa mwakusaya kunesa cirewedwe comwe wadabadwa naco. Kodi ni makonzedwe yaponi yomwe yalipo ya m’mabukhu yakuthandiza kubvesesa Bibliya yomwe yangathandize mu cirewedwe comwe iwo wangabve bwino?

² Mukambagawira Mabukhu: Penu magwere mawiri ayai matatu yambalalewa bzirewedwe bzakusiyana-siyana mu gawo libodzi-bodzilo, bungwe la akulu wa m’magwereyo maka-maka anyakunyang’anira utumiki wan’dzagumana kuti wapangane njira yabwino ya momwe kathimu ka cirewedwe ciri-cense kan’dzapalizirira. Pakupalizira nyumba na nyumba wapalizi wan’dzafunika lini kugawira mabukhu m’cirewedwe ca magwere manango. Na tenepo, pakupalizira mwakusaya kulinganizidwa ayai pakupalizira m’mbuto zapadeca, iwo wangadzagawire m’bzirewedwe bza m’deralo.​—Onani pa kwadru ya mibvunzo mu Utumiki Bwathu bwa Umambo bwa Outubro 1990.

³ Mukambakoya Mabukhu: N’ciyani comwe tingacite penu wanthu wazinji wambalewa-lewa cirewedwe cakunja m’mbuto yomwe kulibe gwere la cirewedweco? Pa cakucitika ninga cimweci, magwere yangakoye pang’ono mabukhu yomwe yalipo m’cirewedweco, ninga matratado na mabroxura. Wapalizi wangagawire mabukhuya pali-pense pomwe wangagumane wanthu womwe wambawerenga cirewedweco.

⁴ Momwe Mungakumbirire mabukhuya: Penu gwere liribe kukoya mabukhuya m’cirewedwe comwe wanthu wangakomedwe kuwerenga, kodi n’mabukhu yaponi m’cirewedweco yomwe mungakhale nayo? Wapalizi wangaonane na mtumiki wa mabukhu kuti wadziwe kuti n’mabukhu yaponi yomwe yalipo m’cirewedweco yomwe wangafunikire kukumbira na gwere pa mkumbiro wa mabukhu wa ulendo unkubwera.

⁵ Penu pankufunikira kucita basali mwakanfulumize, wapalizi wangabvunze m’bodzi wa m’Komiti Yautumiki ya Gwere penu wangacite mkumbiro pomwe gwere linati kucita ndondomeko ya patsogolo pace ya mkumbiro wa mabukhu. Penu bzimwebzi mpsakubvumizika, nyakunyang’anira mabukhu ayai aliwense wakuyikhidwa na iye angacite mkumbiro wace mwa kutumiza e-mail ayai kupfuwira mtedwe ku cipinda ca nthambi. Mabukhu yan’dzatumizidwa ku magwere mwakuphatisira basa endereso yakutumizirira ya nthawe zense ayai ya yakanthawe bzikafunika. Penu kutambiridwa kwa mabukhu yakukumbiridwayo kunkhala usiku ayai kwa nsiku ziwiri, gwere ndiro lin’dzalipira kobiri zakudzongedwazo.

⁶ Tingaphatise bwino basa mabukhu yathu yacikristau mwakuthandiza “wanthu wa mkhalidwe uli-wense,” bziribe basa cirewedwe cawo, “wacifika pakudzakhala na cidziwiso caico ca cadidi” wacidzapulumuka.​—1 Tim. 2:3, 4.