Momwe Tingathandizire Womwe Wambaneseka na Kuwerenga
1. Kodi kupfunzisa Bibliya womwe wambaneseka kuwerenga kuna bzineso bziponi?
1 Weneciro nyumba womwe wambaneseka kuwerenga wangakomedwe na bzinthu bzauzimu, koma iwo wangagope Bibliya na mabukhu manango. Kugawira wanthu ninga wamwewa bukhu lakuti Baibulo Limaphunzitsa Chiyani, pakuyambirira caipo, bzingakhale na phindu lakucepa. Kodi tingawathandize tani mwauzimu? Tidabvunza wapalizi wa m’madziko 20 yakusiyana-siyana bzomwe iwo wambacita. Bzomwe bzinkutewerabzi ndibzo bzomwe iwo wadalewa.
2. Kodi n’ciyani comwe cingakhale cakuthandiza kwa ali-wense womwe ambaneseka kuwerenga?
2 Penu nyakupfunza ankuneseka na kuwerenga ayai an’dziwa lini, mungayambe na broxura ninga, Tetekerani Mulungu ayai Tetekerani Mulungu ndipo Khalani na Moyo Wakusaya Kumala. Mpainiya m’bodzi waku Estados Unidos ambalatiza munthu mabroxura mawiri acimubvunza kuti n’liponi lomwe angalifune. Cipinda ca nthambi ca ku Quénia cidafotokoza kuti njira imweyi njakuthandiza kwene-kwene thangwe ra wanthu wa mu Áfrika ninga mwambo wawo, wambapfunzisidwa mwa nkhani zakundofotokoza m’mbuto mwa mibvunzo na mitawiro. Pomwe munthu wakupfunzisidwa angabvume mwakusaya kunesa kuwerenga nkhani ya mibvunzo na mitawiro, njira imweyi ingacitise munthu wamapfunziro yakucepa kuleka kukomedwa nayo. Penu nyakupfunza ambadziwambo pang’ono kuwerenga, wapalizi wazinji wambafuna kuyamba na broxura la Bzipsa Bzabwino Bzakucokera kwa Mulungu! ayai Mungathe Kukhala Bwenzi la Mulungu! ayai pinango Bukhu Langu la Nkhani za M’Bibliya.
3. Kodi ni kuzindikira ciyani komwe kungatithandize kukhala wakuphata mtima pakupfunzisa womwe wambadziwa lini kuwerenga?
3 Mbatendani: Wale womwe wanati kudziwa kuwerenga wangacite manyazi ayai mantha, ndipo wambabzikhulupira lini. Kawiri-kawiri kuwathandiza kubzibva kukhala wakutsudzuka ni njira yakuyamba yakuwapfunzisira cadidi. Wanthu wazinjisa womwe wambadziwa lini kuwerenga wambabvesesa ndipo mbakukonzeka kupfunza. Walatizeni ulemu bwakufunikira, ndipo citani nawo bzinthu mwakuthemera. (1 Ped. 3:15) Iwo wan’dzabzibva kufuna kupitiriza kupfunza na kuti nyongo yawo inkukhala yakuthandiza wacikula mwauzimu. Na tenepo mbawatendani na mtima wense.
4. Kodi tingalimbise tani wale womwe wambaneseka kuwerenga kuti wambakonzekere pfunziro?
4 Napo penu nyakupfunza ambaneseka kuwerenga, mulimbiseni kuti ambakonzekere pfuzirolo. Wapalizi winango wa ku África do Sul wambalimbisa anyakupfunza wawo kuti pakukonzekera wambakabvunze wapamui pawo ayai azixamwali wawo womwe wambawerenga bwino kuti ambawathandize. Mpalizi winango wa ku Grã-Bretanha, ambalimbisa anyakupfunza wace kukonzekera, mwa kuwapasa bukhu lace pomwe wankucita pfunziro kuti wawone mu ndime zing’ono-ng’ono momwe mpsakupusira kugumana mitawiro, ikakhala ina mizere kunsi kwace. M’bale m’bodzi ku India ambalimbisa anyakupfunza wace kuwona bzithunzi-thunzi pa pfunziro la m’dzinga wakutewera acikakumbukira momwe an’dzacifotokozera.
5. Kodi tingalatize tani kupirira pomwe tinkucitisa pfunziro?
5 Khalani Wakupirira: Bziribe basa mabukhu yomwe mumbayaphatisa basa, mbalungamani pa nfundo yakufunika basi, ndipo mbathandizani nyakupfunza kuibvesesa bwino nkhaniyo. Pakuyamba, bzingakhale bwino kucezerana kwa mphindi 10 ayai 15. Lekani kuyezera kupfunzisa ndime zizinji, koma ndime zing’ono-ngono za mbali iri-yense. Khalani wakupirira penu nyakupfunza ankuwerenga pang’ono-pang’ono. Bzingamupase mphanvu ya kufuna kuthumizira kuwerenga bwino na kukuza kufuna kwace Yahova. Pakufuna kuthandiza nyakupfunza kucita bzimwebzi, kuli bwino kumucemera kumitsonkhano kuyambira pakutoma.
6. Kodi tingathandize tani ali-wense payekha kupfunza kuwerenga?
6 Penu nyakupfunza Bibliya an’pfunza momwe angawerengere, bzingapuse kuti iye akule mwauzimu. (Psal. 1:1-3) Azinji athandiza anyakupfunza Bibliya wawo mwa kuphatisa basa kabukhu kakuti Pfunzani kuwerenga na Kunemba mu nthawe zing’ono-ng’ono pa kumala kwa pfunziro liri-lense. Penu nyakupfunza ankutaya mtima, pinango mungamangirire cikhulupiro cace mwa kulewa bzinthu bzinango bzomwe iye wakwanisa kupfunza na kucita. Mutsimikizeni kuti Yahova andzasimba nyongo yace, ndipo mulimbiseni kuti ambacite mpembo wakukumbira thandizo. (Mim. 16:3; 1 Ju. 5:14, 15) Wapalizi winango Ku Grã-Bretanya ambalimbisa anyakupfunza wawo kuwona njira yakufewa koma yakuthandiza, pinango kuyamba na kupfunza ma alifabeto ndipo pambuyo pace kugumana na kuwerenga bzinembo bzakusankhulidwa, ndipo pakumalizira kuwerenga bukhu lakupusa lakuthandiza kubvesesa Bibliya. Kuthandiza wanthu kupfunza momwe wangawerengere kawiri-kawiri kumbaphatanidza kuwapasa mphanvu yakufuna kucita bzimwebzi, si kokha kundowapfunzisa.
7. Thangwe ranyi tin’funika lini kulekerera kuwapfunzisa cadidi wale womwe bzimbawanesa kuwerenga?
7 Yahova ambanyoza lini wale womwe walibe kupfunza kwene-kwene. (Djobi 34:19) Yahova ambafufudza mtima wa munthu. (1 Nkha. 28:9) Na tenepo mun’funika lini kulekerera wale womwe bzimbawanesa kuwerenga kuti muwadziwise cadidi. Imwepo muna bzinthu bzizinji bzomwe mpsabwino kuyamba kuphatisa basa. Pakumalizira, imwepo mungacinje muciyamba kupfunza naye bukhu la Baibulo Limaphunzitsa Chiyani mucimuthandiza kubvesesa bwino-bwino Bibliya.
[Mafala yakutsindika pa tsamba 4]
Wale womwe walibe kupfunza kuwerenga wangayambe kubva manyazi, ndipo wazinji wambabzikhulupira lini. Kuwathandiza kubzibva kukhala wakufunika, ni mbali yakuyamba yomwe tingacite kuti tiwapfunzise cadidi
[Kwadru pa tsamba 4]
Penu mweneciro nyumba ambadziwa lini kuwerenga, yezani kucita ibzi:
• Yambani kuphatisa basa broxura la Tetekerani Mulungu, Tetekerani Mulungu ndipo Khalani na Moyo Wakusaya Kumala, ayai bukhu linango lakuthemera.
• Khalani naye mwakumulemekeza, ndipo mutendeni na mtima wense.
• Cezeranani mwacigwatho, ndipo lekani kupfunza naye bzinthu bzizinji kwene-kwene.
• Muthandizeni kukuza luso lace la kuwerenga.
Iye akayamba kukomedwa na cadidi acikhala wakufunisisa kupfunza bzizinji, imwepo mungakwanise kuyamba kupfunza naye bukhu la Baibulo Limaphunzitsa Chiyani.
[Tsamba limweri palibe 5, 6]