Kukulisa Luso Lathu mu Utumiki—Kukonzekera Kudzayambisa Ulendo bwa Kubwereza

Thanwe Ranyi Mpsakufunika: Tikagumana munthu womwe ankulatiza kufunisisa kudziwa bzizinji, timbafuna kudzacita ulendo bwakubwereza, pomwe iye an’dzakhala ali pamui kuti tithirizire mbeu yomwe tidabzalayo. (1 Wak. 3:6) Kawiri-kawiri, pomwe tinati kucoka pamui, mpsakufunika kukonzekereratu momwe tingakayambisire ulendo bwakubwereza na nsiku yomwe tin’dzamufikirayo. Kuthumizira bzimwebzi, ni bwino kumusiira mbvunzo womwe tin’dzacezerana pa ulendo bunkutewera. Tenepa timbakhala tinkukhazikisiratu ulendo bwakubwereza kuna mweneciro mui, ndipo penu mbvunzoyo unkutawiridwa mu bukhu lomwe tamusiiralo, iye an’dzakomedwa kwene-kwene kuliwerenga. Kuyambisiratu nkhani yakudzacezerana ulendo bwa patsogolo bzin’dzanesa lini kudzaceza naye pomwe bza nkhani yomwe idasankhulidwayo ndipo mweneciro nyumbayo andzadziwiratu bzomwe ankudikhira. Pomwe tinkugumana pomwe naye, tingamufotokozere kuti tabwera pomwe kuti tidzatawire mbvunzo tidaupereka ulendo udapita ule ticipitiriza na kucezaku.

Momwe Mungacitire:

• Pomwe munkukonzekera upalizi bwa nyumba na nyumba, konzekeranimbo mbvunzo wakuti udzatawiridwe pa ulendo bwakutewera. Ungacokere pa nkhani yomwe munkucezeranayo mu msolo wa m’bukhu lomwe mukugawira nsiku imweyo, ayai ungakhale mbvunzo wakutawiridwa kucokera mu bukhu lathu liri-lense lomwe timbapfunzisira, lomwe mungayambisire ulendo bwakubwereza.

• Pomwe munkumaliza kucezerana na munthu womwe ankufunisisa kudziwa bzizinji, mulekeni adziwe cikhumbo canu cakudzagumana naye pomwe ndipo musiireni mbvunzo womwe mwakonzekerayo. M’madera manango wanthu wambakhala wakutanganika kwene-kwene ndipo bzimbawanesa kubvuma kuti mudzacezerane nawo pomwe. Pa mikhalidwe ninga imweyi, mungalewe kuti: “Kodi ino kawiri-kawiri ndiyo nthawe yabwino kumbakugumanani pamui? [Dikhirani atawire.] Mdzinga wa mangwana, ndikufuna kudzaima pang’ono kuti ndidzatawire mbvunzo uyu . . . Mukadzakhala wakutanganika kwene-kwene mudzandidziwise.”

• Mukauza mweneciro nyumba kuti mun’dzamuzungira pa nthawe yomwe mwapanganayo, mpanganoyo ukhaledi tenepo. (Mat. 5:37) Mukadzacita ulendo bwakubwerezera, pakumalizira pace mudzakhazikise pomwe ulendo bunango.

Yezerani Kucita Bzimwebzi Mkati mwa Mwezi Wathunthu:

• Pakukonzekera upalizi bwanu, konzekeranimbo mbvunzo wa kuti udzatawiridwe ulendo bwa patsogolo pace. Cezeranani na mpalizi womwe munkuphata naye basayo.