Kodi Imwepo Mun’dzatewezera Nyongo ya Yahova na ya Jezu Mkati mwa Nyengo Yacikumbuso Inkubwerayi?
1. N’ciyani cimbacitisa kuti Mboni za Yahova zicite nyongo yakupambulika mkati mwa nyengo yacikumbuso?
1 Yahova ambakwanisa cakulinga cace na nyongo. Pakulewa bzinango mwa bzisimbo bza Umambo bwa Mulungu, Zaiya 9:7 ambati: ‘Nyongo ya Yahova wa anyankhondo in’dzacita bzimwebzi.’ Mwakundendemera, mkati mwa utumiki bwace bwa padziko lapansi, Mwana wa Mulungu adalatiza nyongo ikulu pa kunamata kwacadidi. (Juwau 2:13-17; 4:34) Gole liri-lense pa nyengo ya Cikumbuso, apalizi azinjisa kuzungulira dziko lapansi ankucita mphanvu kuti atewezere nyongo ya Yahova na ya Jezu mwa basa lawo likulu mu utumiki. Kodi mun’dzakhalambo m’bodzi wa iwo?
2. Kodi nyongo in’dzatilimbisa kuti tiyambe kucita ciyani pa nsiku 7 ya Março?
2 Kampanya Yacikumbuso: Gole lino kampanya yakudziwisa Cikumbuso in’dzayamba nsiku ya Malinkhuma, pa 7 Março. Citani makonzedwe tsapanopa yakuti mucite utumiki na nyongo. Magwere yan’dzakondwa kwene-kwene pakucita nyongo yakumpsinkha gawo lawo momwe akwanisiremo. Tsimikizani kucita nyongo yakucemera anyakupfunza wanu wa Bibliya, maulendo yakubwereza, womwe timbaphata nawo basa, acibale wathu na anzathu wakuxikola mwa kuwapasa katsamba kabodzi ka mcemo ayai kuwacemera mwa kuphatisa basa jw.org.
3. Kodi mungathumizire tani utumiki bwanu mkati mwa minyezi ya Março na Abril?
3 Upainiya Wakuthandiza: Nyongo in’dzatithandiza kuthumizira utumiki bwathu. Mpsakupenukisa lini kuti azinji an’dzakwanisa kukhala apainiya wakuthandiza mkati mwa mwezi wa Março na Abril, pakuti tina mpata wakusankhula kucita maora 30. Pa kunamata kwanu kwa banja, ayai pa pfunziro lanu la pamwekha onesesani momwe mungadzacitire bzimwebzi? (Mim. 15:22) Kukomedwa kwanu na kampanyayi kungalimbise winango kuti ambacite nyongo pa basali. Penu imwepo mwacinja bzinthu bzinango pa moyo wanu kuti mudzacite bzizinji, mun’dzakhala munkutewezera nyongo ya Jezu.—Marko 6:31-34.
4. Kodi ni bzisimbo bziponi bzomwe bzimbabwera thangwe ra kutewezera nyongo ya Yahova na ya Jezu?
4 Kutewezera kwathu nyongo ya Yahova na ya Jezu mkati mwa nyengo yacikumbuso kun’dzabweresa bzisimbo. Azinji mu gawo la gwere an’dzapaliziridwa. Tin’dzapfatsa na cikondweso comwe cimbabwera thangwe ra kutumikira Yahova na kukhala wa kupasa winango. (Mab. 20:35) Cinthu cakufunika kwene-kwene n’cakuti tin’dzatumbiza Mulungu wathu wa nyongo na Mwana wace.