Bzakufunika Kukumbukira pa Mtsonkhano Wacigawo
◼ Nthawe ya Programa: Misuwo ya nyumba yakutsonkhanira in’dzafungulidwa pa nthawe ya 7:00 yakumacibese. Pa nsiku zense zitatu, nyimbo zakundobva zin’dzayamba pa nthawe ya 8:20 zakumacibese. Pa nthaweyo, tensenefe tin’dzafunika kuyenda kakhala m’mbuto zathu kuti programa iyambe mwa njira yakulemekezeka. Pa Cixanu na Malinkhuma, mtsonkhano un’dzamala pa nthawe ya 15:55 zakumaulo ndipo pa nsiku ya Mdzinga nthawe ya 14:45 zakumasikati.
◼ ‘Tumbizani Yahova na Nyimbo’: Kuyambira nthawe zakale wanthu wa Mulungu akhala akutumbiza Yahova na nyimbo, ndipo nyimbo zikupitiriza kutenga mbali pa kunamata kwacadidi nsiku zino. (Psal. 28:7) Cipande ciri-cense pa mtsonkhano wathu wacigawo cin’dzayamba na nyimbo zakundobva. Zimwezi sikuti ni nyimbo zakundotetekera basi koma zidakonzedwa kuti zitithandize kupfunza bza Yahova na kumunamata. Tenepo, pomwe mtsogoleri wa cipande an’dziwisa kuti nyimbo zakundobva zinkuyamba, ni nthawe yakuti tikakhale mbuto zathu ticitetekera, kulatiza kuti tinkutenda nyimbozo m’mbuto mwa kundoceza. Tikacita tenepo tin’dzalatiza kuti tin’kutenda nyongo yomwe idacitidwa na gulu lakuimba la Watchtower. Kawiri pa gole abale na mpfumakazi amwewa ambadzonga kobiri zawo acicita ulendo kuyenda ku Patterson, Nova York, kuti akakonze nyimbo zabwino zakutikondwesa. Tikadzamala kutetekera nyimbo zakundobva, tense pabodzi tin’dzafunika kutumbiza Yahova mwa kuima ticidzayimba nyimbo zathu za Umambo.
◼ Mbuto Yakuimisira Kanderendere: Pa mtsonkhano uli-wense, pan’dzakhala na mbuto yakubvumizidwa kuimisira kanderendere yomwe in’dzalipiridwa lini. Mbuto yakuimisira makanderendere njakucepa, na tenepo, bzikakwanisika kungakhale bwino azinji kudzayenda na kanderendere ibodzi.
◼ Mbuto Yakukhala: Pomwe misuwo in’dzafungulidwa macibese ali-wense, taphata minyendo, lekani kudzathamangira mbuto yakukhala yakundokomera imwepo, ninga kuti munkupikisana na wabveseri wanzanu. Taphata minyendo citirani bzabwino winango napo kucitira abale wathu bzomwe mukhafuna kuti bzikucitikireni. Mzimu wakubzipereka umbatizindikirisa ninga Wakristau wacadidi ndipo umbacitisa wanthu kutumbiza Mulungu. (Juwau 13:34, 35; 1 Wak. 13:5; 1 Pe. 2:12) Tingadzakoyere mbuto kokha wale womwe timbakhala nawo pamui ayai womwe tabwera nawo m’kanderendere ibodzi ayai womwe timbapfunza nawo Bibliya. Taphata minyendo lekani kuikha bzinthu pa mbuto yomwe munfuna lini kukhala kuti winango wakhalembo. Mukateweza malangoya mun’dzathandiza winango kuzindikira kuti mbutozo zikalibe wanthu. Mbuto yakupambulika in’dzakoyedwera nkhalamba na atenda. Pakuti mbutoyi njakucepa, munthu m’bodzi ayai awiri womwe wankuthandiziratu nkhalamba ayai atenda ndiwo wokha wangakhale nawo pabodzi.
◼ Bzakubvala Bzakuthemera: Pomwe tiri pa mtsonkhano wacigawo bzakubvala bzathu bzin’funika kukhala bzakuthemera na bzakuwoneka bwino, ndipo bzireke kulatiza mawonekedwe ya dzikoli. (1 Tim. 2:9) Napo pa nthawe yakupuma pomwe tikanati kuyamba cipande ciri-cense na pomwe tamaliza, tin’funika kutcenkha kukhala na kawonekedwe kakutairira. Tenepo, tin’dzakhala wakutsudzuka kubvala kraxa yathu ya mtsonkhano ndipo tin’dzacita lini manyazi kupalizira tikadzagumana mpata. Mawonekedwe na makhalidwe yathu yabwino pa mtsonkhano wacigawo un’kubwerayu yan’dzandotokonya lini wanthu wa mitima yabwino kutambira mafala yacadidi ya m’Bibliya yomwe yambapulumusa moyo koma bzin’dzabweresambo cikondweso kwa Yahova.—Sof. 3:17.
◼ Kuphatisa Basa Bwino Mitcini ya Nzeru: Tin’funika kulatiza khalidwe labwino mkati mwa programa mwa kuikha mtedwe wa m’manja ayai mtcini winango wa nzeru mu mkhalidwe wakuti tileke kusokoneza winango. Penu tin’phatisa basa kamera yakucosa bzithunzi-thunzi ayai ya vidiyo, tabuleti, ayai mtcini winango wakundendemera, tin’funika kukumbukira winango kuti tileke kuwasokoneza ayai kuwacitisa kuleka kuwona kutsogolo. Tin’funika kulatiza pomwe khalidwe labwino mwa kuleka kumbatumiza mensagem ayai e-mail mwakusaya kufunikira pomwe programa iri mkati.
◼ Cakudya ca Masikati: Taphata minyendo, mudzabwereseretu cakudya m’mbuto mwakuti pa nthawe yakupuma mudzasiye mbuto ya mtsonkhano kuti mukanyang’ane cakudya ca masikati. Mungaphatisire basa ka kolmani kang’ono kakundokwana pansi pa mpando womwe mun’dzakhalayo. Makolmani makulu ninga ya pa phwando na matijela ya vidru yankubvumizidwa lini kubwera pa mbuto ya mtsonkhano.
◼ Bzakupereka: Tingalatize kutenda kwathu pa makonzedwe ya mtsonkhano mwa kucita mwakubzifunira bzakupereka bzathu pa basa la padziko lense pa mtsonkhanoyo. Xeke iri-yense inganembedwe kuti inkuyenda kwa “Associação das Testemunhas de Jeová de Moçambique.”
◼ Cithandizo ca Mankhwala: Penu mumbamwa mankhwala yakupambulika, taphata minyendo, dzatsimikizeni kubweresa mankhwala yakukwanira pakuti pan’dzakhala lini na mankhwalayo pa mtsonkhanopo.
◼ Nsapato: Bziri bwino kusankhula nsapato zabwino, zomwe zin’kukwanani bwino mucikwanisa kufamba bwino-bwino.
◼ Formulariyo ya Muzungireni Munthuyu (S-43): Formulariyo ya Muzungireni Munthuyu ingaphatisidwe basa pa kunemba bza munthu womwe wafunisisa pakucita upalizi bwakusaya kulinganizidwa mu nsiku za mtsonkhano. Maformulariyo yanganembedwe yaciperekedwa ku Cipinda ca Mabukhu ayai kupereka kuna munembi wa gwere lanu mukabwerera kumui.
◼ Marestaurante: Lemekezani dzina la Yahova mwa khalidwe lanu labwino mu marestaurante. Bvalani mu njira yakuthemera ninga mtumiki Wacikristau. Siyani malango yakuthemera penu bzimbacitika.
◼ Mbuto Yakugona: Inati kufika nsiku ya mtsonkhano, Depatimenti Yakutambira Alendo in’dzayamba basa na cakulinga cakuthandiza wense womwe wangadzakumbire mbuto yakumbadzagona. Makonzedweya yambathumizira kukondwa komwe timbabva tikakhala pabodzi ninga Wakristau. Na tenepo kudziwa kuti ‘bzinthu bzense bzimbacitike mwakuthemera na mwakulongosoka,’ kuphatanidza na kufunira bzabwino wanzathu, nfundo zinango n’zakufunika kuzikumbukira. Kwa womwe an’dzafikira ku nyumba za abale, wadzakondwe na bzomwe wakonzeredwa acidzabverana na bzomwe angadzafune mweneciro nyumba. Mudzambasiye cipinda canu ciri cakucena nsiku iri-yense munati kuyenda ku mtsonkhano ndipo na pomwe mtsonkhanoyo ukadzamala munati kucoka pamuipo. Mukadzatambiridwa ku nyumba ya m’bale bzin’funika lini kupereka udindo bwanu kwa ali-wense pamuipo wakukusamalirani pa cakudya na transporte. Tenepo, mpsakufunika ali-wense kukumbukira mbali imweyi. Kuteweza kwathu na kubvera malangoya kun’dzacitisa kuti nyakutitambirayo, acite mwakucokera mumtima, si kuti kwakungingimiridwa. Mu njira ibodzi-bodziyo, womwe wan’dzakhala pa mbuto ya mtsonkhanoyo wan’dzafunika kubverana na walatizi na cakulinga cakuti nsiku iri-yense mbuto ya mtsonkhanoyo ikhale yakuoneka bwino.—1 Wak. 14:40.
◼ Athandizi Wakubzipereka: Ali-wense omwe angafune kubzipereka, angakadziwise Depatimenti ya Athandizi Wakubzipereka pa mtsonkhano. Wana womwe wanati kukwanisa magole 16 yakubadwa wangacitembo basa labwino mwakutsogoledwa na wabereki, nyakuwanyang’anira, ayai munthu munango mkulu wakubvumizidwa na wabereki.