Pitirizani Kukhala na Cakulinga ca Kuyambisa Mapfunziro ya Bibliya
1. N’ciyani cin’funika kuti wanthu wapulumusidwe?
1 Relatorio ya basa la pagole la 2014 inkulatiza nyongo ya wanthu wa Mulungu ya kupalizira bzipsa bzabwino bza Umambo. (Mat. 24:14) Mwa kucita basa la nyumba na nyumba, kampanya yakupambulika yakugawira tumatsamba na mcemo ndipo na basa lathu la upalizi bwa padeca, tinkufikira wanthu azinji na mafala ya m’Bibliya kuposa magole yense ya m’mbuyomu. Tsono, penu wanthu wan’funika kupulumusidwa, bzin’funika tiwathandize kuti akhale anyakupfunza wa Jezu mwa kupfunza nawo Bibliya.—1 Tim. 2:4.
2. Kodi tingabzibvunze mibvunzo iponi yomwe ingatithandize kuti nthawe zense tiyambise pfunziro la Bibliya?
2 Nthawe zense Khalani Wakukonzeka Kuyambisa Pfunziro la Bibliya: Munthu akafunisisa kudziwa bzizinji, kodi mumbacita nyongo kuti mudziwe komwe ambakhala mucibwerera mwakusaya kucedwa na cakulinga ca kuyambisa pfunziro la Bibliya? Kodi ni nthawe yakumalizira iponi yomwe mudayezera kuyambisa pfunziro la Bibliya pa ulendo bwakuyamba? Ni lini pomwe mudamalizira kuyambisa pfunziro la Bibliya na munthu omwe mumbamupasa marevista mwezi uli-wense? Kodi mumbawonesa mavidiyo yakuti Thangwe Ranyi Tin’funika Kupfunza Bibliya? na Kodi Pfunziro la Bibliya Limbacitidwa Tani? kwa anzanu wakubasa, wakuxikola, womwe mumbakhala nawo pafupi, wacibale wanu na winango womwe mumbadziwana nawo? Mukakhala munkuphatisa basa kangolo kakucita kupfuwa, kodi mumbacita nyongo ya kuuza wanthu womwe wambatenga mabukhu yomwe timbapfunzisira bza pfunziro la Bibliya la fovolo?
3. N’ciyani comwe cimbafunika kuti tigumane phindu pa kupfunzisa cadidi?
3 Thandizo Lakucokera kwa Yahova na Jezu: Mwa kuyamba na fala lakuti ‘ndokoni’ pa lamulo lace la ‘kukhala na anyakupfunza’, Jezu akhafuna kulewa kuti bzimbafunika kuti timbacite nyongo ticikhala wakuyamba kucita bzimwebzo. Tsono, iye alibe kundotisiya tekha koma adapicira kuti an’dzakhala nafe. (Mat. 28:19, 20) Kuthumizira bzimwebzi, Yahova ambatipasa mzimu wace wakucena pabodzi na bzinthu bzakuphatisira basa ndipo na kutipfunzisa bzomwe tingafunikire kuti tikapfunzise wanthu cadidi. (Zak. 4:6; 2 Wak. 4:7) Tingacite mpembo kukumbira “mphanvu na cikhumbo” kuti ticite basa lakufunikali.—Waf. 2:13.
4. Thangwe ranyi tin’funika kukhala na cakulinga ca kuyambisa mapfunziro?
4 Kupalizira bzipsa bzabwino kumbatipasa cikondweso cikulu. Tsono, cikondweso cimbathumizirika tikapfunzisa munthu cadidi na kumuthandiza kuti aphatane nafe pa ‘mseu wakuyendesa ku moyo.’ (Mat. 7:14; 1 Wat. 2:19, 20) Mwa kuikha cakulinga cathu ca kukhala na mapfunziro, cakufunika kwene-kwene n’cakuti timbatumbiza Yahova womwe ‘an’funa lini kuti munthu ali-wense adzapfudzidwe, koma an’funa kuti wense wakungule.’—2 Pe. 3:9.