Kukulisa Luso Lathu mu Utumiki​—Kupalizira mu Mbuto za Malonda

Thangwe Ranyi Mpsakufunika: Pakuti wanthu azinji wambamala nthawe zizinji wankuphata basa, na tenepo njira yabwino ya kuwafikira na bzipsa bza Umambo ndiyo kuwapalizira mu mbuto zawo zakuphatira basa. Kupalizira mu mbuto za malonda kungakhale kwakudekeza na kwaphindu, thangwe mbuto zimwezi timbasaya lini wanthu ndipo anyakuphata basa m’mwemu wambatambira bwino wanthu omwe iwo ankuwawona ninga abwera kudzagula. Kuti bziwafambire bwino, apalizi an’funika kuphatisira basa luso na kukhala ciratizo cabwino ca kabvalidwe na kubzidekesa. (2 Wak. 6:3) Na tenepo, nyakunyang’anira utumiki an’funika kawiri-kawiri kunyang’anira momwe mbuto za malondazi zinkuphatidwira basa na womwe ankuphata basalo.

Momwe Mungacitire:

• Konzekerani upalizi bwacigwatho. Tikamala nthawe ikulu kwene-kwene na anyabasawo, tingadzapasidwe lini mpata wa kudzalewalewa nawo pomwe kutsogolo.

• Sankhulani nthawe yomwe anyamalonda ambakhala alibe kutanganika kwene-kwene, ninga pa nthawe yomwe iwo ambafungula kumacibese.

• Citani nyongo ya kuyamba kulewalewa na nyakunyang’anira wa pamwepo. Khalani munthu wabwino na wakufikirika. Mungalewe kuti: “Tinkuzungira wanthu mwacigwatho m’mbuto zawo zakuphatira basa thangwe mpsakunesa kuwagumana m’miyi mwawo.” Mpalizireni mwacigwatho, ndipo mupaseni katsamba, marevista ayai bukhu liri-lense. Tsono kuti tileke kuwonedwa ninga tinkucitambo malonda, njira yabwino ni kuleka kulewa bza makonzedwe ya cakupereka pokha-pokha tikabvunzidwa momwe basa lathu limbafambira.

• Penu nyakunyang’anira wa pamwepo wakutambirani bwino, mukumbireni penu angabvumize kuti mulewelewe mwacigwatho na anyabasa winango. Mu mbuto zinango za malonda, bzingakhale bwino kukumbira kuti musiye mabukhu manango mu cipinda comwe anyabasa ambadyera ayai kupumira.

• Citani bzinthu mwaluso ndipo khalani munthu wakufulumiza kucinja. Mwaciratizo, penu nyabasa m’bodzi ankuceza na munthu omwe wabwera ayai nyabasayo ankuwoneka kuti adatanganika, dikhirirani mpaka iye akhale wakutsudzuka.

Yezerani Kucita Bzimwebzi Mkati mwa Mwezi Wathunthu:

• Pa kunamata kwanu ninga banja, citani upalizi bwacigwatho bwakuyezezera momwe mungacitire bzimwebzi mukakhala munkupalizira mu mbuto za malonda.