Cilamuso Cin’dzakwanisika Thangwe ra Cakulombolera

Cikumbuso cimbatipasa mpata wa kukumbukira bzisimbo bza kutsogolo bzomwe bzin’dzakwanisika thangwe ra cakulombolera. Cibodzi mwa bzisimbobzo ni Cilamuso. Yahova akhafuna lini kuti wanthu ambafe. N’thangwe race cibodzi mwa bzinthu bzakuwawa kwene-kwene kwa ifepano ni msunamo omwe umbabwera thangwe ra infa ya wakufunidwa wathu. (1Wak 15:26) Jezu adawawidwa pakuwona anyakupfunza wace ankudandaula thangwe ra infa ya Lazaro. (Ju [Yoh] 11:33-35) Pakuti Jezu ni ciratizo cakulungamiratu ca Baba wace, tingatsimikizire kuti Yahova ambawawidwambo akambawona msunamo wathu pomwe taluza wakufunidwa wathu. (Ju 14:7) Yahova ankudikhira mwakufunisisa nthawe yomwe an’dzalamusa atumiki wace ku infa, ndipo ifepano tin’funikambo kudikhirira.—Djobi 14:14, 15.

Pakuti Yahova ni Mulungu wakulinganizika, tingakhulupire kuti cilamuso cin’dzacitika mu njira yakulungamizidwa bwino. (1Wak 14:33, 40) M’paraizo, m’mbuto mwa kucita misinda ya nkhawa, in’dzakhala nthawe ya kutambira na manja mawiri wanthu omwe an’dzalamusidwa. Kodi mumbakumbukira bza cilamuso, maka-maka pa nthawe yomwe muna msunamo? (2Wak 4:17, 18) Kodi mumbatenda Yahova thangwe ra kupereka mphaso ya cakulombolera na kutizimbulira m’Bzinembo kuti anyakufa an’dzakhala pomwe na moyo?—Wakol 3:15.

• Kodi ni axamwali wanu aponi na wacibale omwe munkufuna kudzawawona pomwe na moyo?

• Kodi ni munthu uponi wa m’Bibliya omwe munkufuna kudzamudziwa mucidzaceza naye?