Kukulisa Luso Lathu mu Utumiki​—Kuthandiza Anyakupfunza wa Bibliya Kukula Mwauzimu kuti Abzipereke kwa Yahova na Kubatizidwa

Thangwe Ranyi Mpsakufunika: Anyakupfunza wa Bibliya kuti abvumidwe na Yahova, an’funika kubzipereka kwa Yahova acibatizidwa. (1Pe 3:21) Ndipo wale omwe ambakhala na moyo mwakubverana na kubzipereka kwawo ambakhotcereredwa mwauzimu. (Psal 91:1, 2) Mkristau an’funika kubzipereka kwa Yahova yekha, sikuti kwa munthu, basa ayai gulu. Tenepo, anyakupfunza wa Bibliya an’funika kukulisa lufoyi lawo na kutenda kwawo Mulungu.—War 14:7, 8

MOMWE MUNGACITIRE:

• Pa kucita pfunziro la Bibliya, fotokozani bzomwe nkhaniyo inkupfunzisa pakulewa bza Yahova. Mulimbiseni kuti ambawerenge Bibliya nsiku zense na kumbapemba kwa Yahova ‘nthawe zense.’—1Wat 5:17; Tiy 4:8

• Limbisani nyakupfunza wanu kuti akhale na bzakulinga bzauzimu ninga kubzipereka na kubatizidwa. Ndipo muthandizenimbo kuti ambapereke mitawiro pamitsonkhano na kumbacitira umboni anyakufendererana nawo nyumba ayai anzace wakubasa. Kumbukirani kuti Yahova ambakakamiza lini ali-wense kuti amutumikire. Kubzipereka ni cakusankhula comwe munthu ambacita mwakufuna yekha.—Bzak 30:19, 20

• Limbisani nyakupfunza wanu kuti acinje makhalidwe pa moyo wace kuti akondwese Yahova acithemera kubatizidwa. (Mim 27:11) Pakuti bzizolowezi bzinango bzingakhale bzakunesa kubzisiya, tenepo nyakupfunza Bibliya angafunike kuthandizidwa nthawe zense kuti asiye unthu bwace bwakale acibvala unthu bupsa. (Wayef 4:22-24) Muwoneseni nkhani zakuti “Baibulo Limasintha Anthu” zomwe zimbagumanika mu Nsanza ya Mulindiri ya chichewa

• Mufotokozereni bza cikondweso comwe mumbagumana pakutumikira Yahova.—Zai 48:17, 18