KUKHALA NA MOYO WACIKRISTAU
Mbabverani Mitemo ya Makhalidwe Yabwino ya Yahova
Yahova adapereka kwa wanthu, mitemo ya makhalidwe yabwino. Ndipo iye ambafuna lini kuti mwamuna na mkazi wakulowolana alambane. (Mat 19:4-6, 9) Iye ambawenga mtundu uli-wense wa unzazi. (1Wak 6:9, 10) Ndipo iye adaperekambo mitemo ya kabvalidwe na ya kubzidekesa yomwe imbacitisa kuti wanthu wace akhale wakusiyana.—Bzak 22:5; 1Tim 2:9, 10.
Lero lino wanthu azinji ambalamba kubvera mitemo ya Yahova. (War 1:18-32) Iwo ambatengera mzimu wa dzikoli pa nkhani ya kabvalidwe, kubzidekesa na makhalidwe yawo. Wanthu azinji ambacita bzinthu bzakuipa mwakubziwonesera ndipo ambanyoza wale omwe ambabvera mitemo ya Mulungu.—1Pe 4:3, 4.
Ifepano ninga Mboni za Yahova, tin’funika kubvera mitemo ya Mulungu ya makhalidwe yabwino. (War 12:9) Mwa njira iponi? Mwakumbafotokozere winango mwakusamala, bza mitemo ya makhalidwe yabwino ya Mulungu. Koma ifepano tin’funikambo kumbabvera mitemoyo. Tenepo, tikambasankhula bzakubvala na momwe timbabzidekesera, tin’funika kumbabzibvunza kuti: ‘Kodi bzakusankhula bzangu bzimbalatiza kuti ndimbabvera mitemo ya Yahova ayai ndimbatewezera dzikoli? Kodi bzakubvala bzangu na momwe ndimbabzidekesera, bzimbalatiza kuti ndine Mkristau wakugopa Mulungu? Ndipo pomwe tinkusankhula programa za TV ayai mafilme, tingabzibvunze kuti: ‘Kodi Yahova angakomedwe na programa zimwezi? Kodi programa zimwezi zimbalimbisa makhalidwe yaponi? Kodi mtundu wa masenzeka yomwe ndimbasankhula ungatepese cikhumbo cangu cakufuna kukhala wakukhulupirika? (Psal 101:3) Kodi yangakhumudwise wanthu wa m’banja mwangu ayai winango?’—1Wak 10:31-33.
Thangwe ranyi mpsakufunika kuti ifepano timbabvere mitemo ya makhalidwe yabwino ya Yahova? Tsapanopapa Jezu an’pfudza wanthu na uipi bwense. (Zakiy 9:4-7) Omwe ambacita kufuna kwa Mulungu ndiwo omwe an’dzapulumuka. (1Ju 2:15-17) Tenepo, timbabvere mitemo ya makhalidwe yabwino ya Yahova kuti wanthu apase mbiri Yahova, pakuwona makhalidwe yathu yabwino.—1Pe 2:11, 12.
Kodi momwe ndimbasankhulira bzakubvala na momwe ndimbabzidekesera bzimbalatiza tani bza mitemo ya makhalidwe yomwe yambanditsogolera?
ONANI VIDIYO YAKUTI KHALA XAMWALI WA YAHOVA—MWAMUNA M’BODZI NA MKAZI M’BODZI, MUKAMALA TAWIRANI MIBVUNZO IYI:
Thangwe ranyi n’kwanzeru kumbabvera mitemo ya Yahova?
Thangwe ranyi abereki an’funika kupfunzisa wana wawo mitemo ya makhalidwe yabwino ya Yahova pomwe iwo akali ang’ono?
Kodi wana pabodzi na acikulire angathandize tani wanthu kugumana phindu na ubwino bomwe Yahova ambalatiza?