KUKHALA NA MOYO WACIKRISTAU

Bzinthu Bzipsa pa Mitsonkhano Yathu ya Pakati pa Mdzinga

Kuyambira mu Janeiro, 2018, mitsonkhano yathu ya pakati pa mdzinga in’dzakhalambo na mareferensiya, ndipo m’mareferensiyamo mun’dzagumanika nfundo zakuthumizira pabodzi na mavidiyo na bzithunzi-thunzi bzakucokera mu Bibliya lakupfunza la pa interneti la Baibulo la Dziko Latsopano la Malemba Opatulika (nwtsty), napo penu mulibe Bibliyalo m’cirewedwe canu. Imwepo mun’dzakhala na bzinthu bzizinji kuti mufufudze pakukonzekera mitsonkhano. Bzimwebzi bzin’dzakuthandizani kukhala wakufendererana na Baba wathu wa lufoyi, Yahova!

NFUNDO ZAKUTHUMIZIRA

Mbali imweyi in’dzafotokoza bza cikhalidwe ca wanthu, mbuto, na kufotokoza mafala yakusiyana-siyana ya mavesi ya m’Bibliya.

Mateu 12:20

Mbvuniko omwe unkufukutira: M’nyumba zizinji zakale-kale mukhambakhala na mibvuniko ya dongo yomwe ikhaikhidwa mafuta ya mioliva. Cingwe cikhapfuwa mafutayo mpaka padzulu, bzomwe bzikhacitisa kuti cirambirambi cipitirize kugaka. Mu Cigirego mafala yakuti ‘mbvuniko omwe unkufukutira’ yangathandauze kacingwe komwe kankufukutira ndipo kasala pang’ono kuthima. Polofesiya ya pa Zaiya 42:3 ikhadaleweratu bza nsisi za Jezu. Iye angadadzathimisa lini cidikhiro ca wanthu wakubonera na wakuponderezedwa.

Mateu 26:13

Cadidi: Mu Cigirego fala lakuti a·menʹ, na Cihebereu lakuti ʼa·menʹ, limbathandauza kuti “ni cadidi” ayai “bzikhale tenepoyo.” Jezu akhambalewa falali kawiri-kawiri pakufuna kuyamba kufotokoza bzinthu ninga cakucitika, piciro ayai polofesiya, na cakulinga cakufuna kubvekesa kuti mafalayo njacadidi ndipo njakutsimikizika. Bzinkuwoneka kuti mu Bibliya, ni Jezu yekha omwe adaphatisa basa fala lakuti ‘cadidi’ ayai amen mwa njira imweyi. Fala lomwe Jezu akhambalewa mwakubwerezera lakuti a·menʹ a·menʹ, ninga momwe bziriri m’ bukhu la Juwau, limbasanduliziridwa kuti ‘n’cadidiletu ndinkukuuzani’.—Ju 1:51.

MAVIDIYO NA BZITHUNZI-THUNZI

Bzithunzi-thunzi, mavidiyo yakusaya mafala na yakulatiza bzinthu bzakusiyana-siyana bzakulewedwa m’Bibliya.

Betefaji, Phiri la Mioliva na Jeruzalemu

Vidiyoyi inkulatiza njira ya ku Jeruzalemu kucokera kumabvadzuwa kwa kamzinda ka et-Tur kupita na ku Betefaji omwe ambalewedwa m’Bibliya mpaka ku mbali inango ya Phiri la Mioliva. Betanya akhali kumabvadzuwa kwa Betefagi, na Phiri la Mioliva. Pomwe akhambayenda ku Jeruzalemu, Jezu na apostolo wace akhambakagona ku Betanya. Nsiku zino, mzindayu umbacemeredwa el-ʽAzariyeh (El ʽEizariya ), ndipo dzinali m’Ciarabe limbathandauza kuti “Mui wa Lazaro.” Mwakusaya kupenukira Jezu akhambakagona kumui kwa Marta, Mariya na Lazaro. (Mat 21:17; Mar 11:11; Lu 21:37; Ju 11:1) Pomwe akhambacita ulendo bwakuyenda ku Jeruzalemu, Jezu pinango akhambayenda na njira yomwe yalatizidwa mu vidiyomu. Pa Nisani 9 mu 33 EC, pomwe Jezu adapakira bulu pafupi na Phiri la Mioliva mpaka ku Jeruzalemu, pinango iye adacita bzimwebzo kucokera ku Betefaji aciyenda ku Jeruzalemuko.

Mseu wakucokera ku Betanya mpaka ku Betefaje
Betefaje
Phiri la Mioliva
Cigwa ca Kidironi
Mbuto ya Tempwlo

Perego pa pfupa la katende

Cithunzi-thunzici cinkulatiza pfupa la katende wa munthu omwe adakhomereredwa perego yakutalimpha macentimetro 11.5. Pfupali lidagumanidwa mu 1968, pomwe akhacera matere ya kumpoto kwa Jeruzalemu, ndipo iro nda m’magole ya utongi bwa Roma. Bzimwebzi bzidapasa wanthu wakufufudza bzinthu bza kale umboni bwakuti perego zikhaphatisidwadi basa pakukhomerera wanthu pa muti. Pinango peregoyi ingandendemere na zomwe acikunda wa Roma adaphatisira basa pakukhomerera Jezu Kristu pa muti. Pfupali lidagumanidwa m’kaxa inango yakale yakukoyera mafupa, momwe akhambaikha mafupa ya munthu wakufa pambuyo pa thupi lace kubvunda. Bzimwebzi bzinkulatiza kuti munthu wakuphedwa mwakucita kukhomereredwa pa muti akhambakamuikhambo m’thenje.—Mat 27:35