Kodi Mumbazindikira Makhalidwe Yakusaya Kuwoneka ya Mulungu?

Mukambawona maluwa yakudeka, mulenga-lenga wakudzala na nyenyezi ayai madzi yankuyerera kucokera pa phiri, kodi mumbakwanisa kuwona kuti bzinthu bzimwebzi bzidacita kulengedwa? Bzinthu bza m’cirengedwebzi bzimbalatiza padeca makhalidwe yakusaya kuwoneka ya Yahova. (War 1:20) Tikambakumbukira bzinthu bzomwe timbawona na maso yathu, tingakwanise kuzindikira mphanvu za Mulungu, lufoyi, nzeru, cirungamo, pabodzi na kupasa komwe anako.—Psal 104:24.

Kodi mpsiponi bzinthu bzinango bza m’cirengedwe bzomwe imwepo mumbawona nsiku zense? Napo penu mumbakhala mu mzinda, imwepo mumbawona mbalame ayai miti. Kumbanyang’anisa mwatceru bzinthu bza m’cirengedwebzi kungatithandize kucepesa thupo, kuwona mwakuthemera mabvuto yathu, ndipo kungalimbisembo cikhulupiro cathu cakuti Yahova nthawe zense an’dzatisamalira. (Mat 6:25-32) Penu imwepo muna wana, athandizeni kuzindikira makhalidwe ya Yahova. Tikambakulisa kutenda pa bzinthu bza m’cirengedwe, tin’dzakhala pa uxamwali bwakulimba na Mulengi wathu.—Psal 8:3, 4.

ONANI VIDIYO YA MSOLO WAKUTI AS MARAVILHAS DA CRIAÇÃO REVELAM A GLÓRIA DE DEUS — LUZ E CORES, (BZINTHU BZAKUDABWISA BZA M’CIRENGEDWE BZIMBALATIZA UMBIRI BWA MULUNGU—CEZA NA KORE). NDIPO MUKAMALA TAWIRANI MIBVUNZO YAKUTEWERAYI:

• Kodi n’ciyani comwe cimbatithandiza kuwona kore zakusiyana-siyana?

• Kodi n’ciyani comwe cimbacitisa kuti pa cinthu cibodzi pakhale kuyetima kwa kore zakusiyana-siyana?

• Thangwe ranyi timbawona kore zakusiyana-siyana m’mulenga-lenga?

• Kodi ni kore ziponi za m’cirengedwe zomwe imwepo mumbawona komwe mumbakhala?

• Thangwe ranyi tin’funika kukhala na nthawe ya kumbanyang’anisa bzinthu bza m’cirengedwe?