Phatisani Basa Mavidiyo Pakupfunzisa Anyakupfunza Wanu wa Bibliya

Bzithunzi-thunzi na mavidiyo, bzimbacitisa wanthu kukhala tceru ndipo bzimbathandiza wanthuwo kubvesesa na kukumbukira bzomwe apfunza. Mpfunzisi wathu Mkululetu, Yahova, adaphatisa basa bzinthu bzakucita kuwoneka na maso kuti apfunzise na kubvekesa nfundo zakufunika kwene-kwene. (Ciy 15:5; Jer 18:1-6) Jezu, Mpfunzisi Mkulu adacitambo bzibodzi-bodzibzi. (Mat 18:2-6; 22:19-21) M’magole yano, bzinkucita kuwonekeratu padeca kuti mavidiyo yakuthandiza kwene-kwene pakupfunzisa wanthu. Kodi munkuphatisa basa bwino mavidiyo, pomwe munkupfunzisa anyakupfunza wanu wa Bibliya?

Mavidiyo yakukwana 10 yakonzedwa kuti yatithandize pakupfunzisa, mwakuphatisa basa broxura la Bzipsa Bzabwino Bzakucokera kwa Mulungu! Msolo wa vidiyo iri-yense ngwakubveranambo na mbvunzo wa ndime ibodzi ya mu pfunziro liri-lense la m’broxuramo. Mu webisaite ya jw.org, broxurali lina malinki yomwe yambatikumbusa pomwe tingalatize vidiyo iri-yense. Kuthumizira bzimwebzi, yalipo mavidiyo manango yomwe tingayawonesembo pakuphatisa basa mabukhu ya mu Bzinthu Bzomwe Timbapfunzisira.

Kodi nyakupfunza wanu wa Bibliya ankuneseka kubvesesa nkhani inango? Ayai Kodi ankugumana na bzineso? Fufudzani mu jw.org® na mu JW Broadcasting® kuti mugumane mavidiyo yomwe yangamuthandize. Pinango imwepo na nyakupfunza wanuyo mungawone pabodzi vidiyoyo mucicezerana bzomwe mwapfunza.

Mwezi uli-wense pambacosedwa vidiyo zipsa. Mukambakhala munkuziwona, mbakumbukirani momwe mungaziphatisire basa pakupfunzisa winango.