KUKHALA NA MOYO WACIKRISTAU

Makhalidwe Yanu Yabwino na Ulemu Bzingathandize Winango Kufuna Cadidi.

Ciratizo cabwino ca akazi omwe apfunza cadidi ndico cimbathandiza amuna wawo kupfunzambo cadidi. Koma nthawe zizinji bzimbafunika kuti akazi amwewa apirire bzineso kwa magole mazinji. (1Pe 2:21-23; 3:1, 2) Penu imwepo munkugumanambo na bzineso ninga bzimwebzi, pitirizani kukunda cakuipa mwa kucita cabwino. (War. 12:21) Ciratizo canu cabwino cingathandize kwene-kwene kuposa mafala yanu.

Yezerani kumbabvesesa mawonedwe ya bzinthu ya mwamuna wanu (Waf. 2:3, 4) Yezerani kumbabziikha m’mbuto mwace ndipo mbalatizani kudeka mtima. Ninga mkazi, citani nyongo kuti mumbakwanirise udindo bwanu. Mbafulumizani kubva. (Tiy 1:19) Mbapirirani ndipo mbalatizani lufoyi kwa mwamuna wanu. Napo mwamuna wanu aleke kulatizambo makhalidwe mabodzi-bodziyo na ulemu kwa imwepo, khalani na citsimikizo cakuti Yahova ambakomedwa na ciratizo canu cabwinoco.—1Pe 2:19, 20.

ONANI VIDIYO YA MSOLO WAKUTI: YAHOVA AMBATITHANDIZA KULIMBANA NA MABVUTO YATHU, MUKAMALA TAWIRNAI MIBVUNZO YAKUTEWERAYI:

Kodi moyo wa Grace Li ukhali tani pakuyamba kwa banja lace?
Kodi n’ciyani cidamucitisa kuyamba kupfunza cadidi?
Kodi Mpfumakazi Grace idapirira tani mabvuto yomwe ikhagumana nayo pambuyo pakubatizidwa?
Kodi Mpfumakazi Grace idalewa ciyani mu mpembo wace pakulewa bza mwamuna wace?
Kodi Mpfumakazi Grace idakhala na bzisimbo bziponi thangwe ra ulemu na khalidwe lace labwino?

Bzakucitika bza m’vidiyo ya msolo wakuti: ‘Yahova Ambatithandiza Kulimbana na Mabvuto Yathu,’ kupita patsogolo kwa Grace Li. 1. Grace ankulira. 2 Mpfumakazi inkupfunza Bibliya na Grace. 3 Grace na wana wace ankubula mu restaurante yawo ndipo ankuyenda ku mitsonkhano. 4. Grace pabodzi na wanthu wakukwana apfemba wa m’banja lace ali ku Nyumba ya Umambo. — Ulemu pabodzi na khalidwe labwino bzimbathandiza kwene-kwene!