KUKHALA NA MOYO WACIKRISTAU
Kodi ni Wanthu Aponi Omwe Mumbacita Nawo Uxamwali pa Interneti?
Bzimbalewedwa kuti xamwali ni “munthu ule omwe timbabverana naye kwene-kwene thangwe rakuti timbamufuna ayai kumulemekeza.” Mwa ciratizo, Jonatani na Davide adakhala pa uxamwali bwa ponda-ndipondembo pambuyo pa Davideyo kupha Goliyati. (1Sam 18:1) Ali-wentse wa iwo adalatiza makhalidwe yomwe yadawacitisa kuti afune kukhala pa uxamwali pa uwiri bwawobo. Kuti mukhale pa uxamwali bwa ponda-ndipondembo mumbafunika kudziwana bwino. Tsono kuti mudziwane bwino-bwino na munthuyo pambatenga nthawe ndipo pambafunika nyongo. Tsono uxamwali bwa pa interneti bulibe kunesa, kundotinya kokha butau la komputadori ayai telefone bumbaphatiratu. Pakuti pa interneti wanthu angakwanise kukumbuka bwino-bwino bzomwe angalewe na kudziwambo bzomwe winango akukumbuka, mpsakupusa kwa iwo kubisa unthu bwawo caibo. Tenepo mpsabwino kuyamba kukumbuka bwino-bwino kuti ni wanthu aponi omwe tin’funika kusankhula kuti akhale axamwali wathu. Tin’funika lini kubvuma kucita uxamwali na wanthu wentse omwe angatikumbire kuti ticite nawo uxamwali pa interneti kugopera kuti tingawakalipise. Thangwe ra ngozi zomwe ziripo, winango ambandolekeratu kuphatisa basa mbuto zakucezera za pa interneti. Tsono penu imwepo mungasankhule kuphatisa basa mbuto zakucezera za pa interneti, kodi mun’funika kukumbukira ciyani?
ONANI VIDIYO YA MSOLO WAKUTI KHALANI WAKUSAMALA POMWE MUNKUPHATISA BASA MBUTO ZAKUCEZERA ZA PA INTERNETI, NDIPO MUKAMALA BVUNZANI ABVESERI KUTI:
Kodi mun’funika kukumbukira ciyani pomwe mukanati kuikha foto ayai kucita comentário pa mbuto zakucezera za pa interneti?
Thangwe ranyi mun’funika kukhala wakucenjera mukakhala mukusankhula axamwali pa mbuto zakucezera za pa interneti?
Thangwe ranyi imwepo mun’funika kubziikhira malire ya nthawe yomwe mun’funika kumala pa mbuto zakucezera za pa interneti?—Aef 5:15, 16