Phatisani Basa Bukhu Lakuti Khalani na Moyo Wakukondwa Mpaka Kale-kale! Kuti Mulimbise Cikhulupiro kwa Yahova na Jezu

Anyakupfunza wa Bibliya an’funika kukhala na cikhulupiro cakulimba kuti akondwese Mulungu. (Ahe 11:6) Ifepano tingawathandize kucita bzimwebzo, mwakuphatisa basa bukhu lakuti Khalani na Moyo Wakukondwa Mpaka Kale-kale! Bukhuli lina mavesi, nfundo zakubveseseka, mibvunzo yakuthandiza munthu kubvesesa, mavidiyo yakulimbikisa na bzithunzi-thunzi bzakudeka kwene-kwene. Tikathandiza nyakupfunza wathu kukulisa makhalidwe yacikristau na kulimbisa uxamwali bwace na Mulungu, tin’dzakhala tikumanga na bzinthu bzomwe bzimbapsa lini.—1Ak 3:12-15.

Wanthu winango ambawona kuti mpsakunesa kukhala pa uxamwali na Mulungu, thangwe ambamuwona lini. Ndipopa tin’funika kuwathandiza kumudziwa Yahova na kumukhulupira.

ONANI VIDIYO YA MSOLO WAKUTI PHATISANI BASA BUKHU LAKUTI “KHALANI NA MOYO WAKUKONDWA MPAKA KALE-KALE!” KUTI MULIMBISE CIKHULUPIRO KWA YAHOVA, MUKAMALA BVUNZANI ABVESERI KUTI:

• Kodi tikudziwa tani kuti mpfumakaziyi yakonzekera bwino pfunziroli?

• Kodi iye aphatisa tani basa mibvunzo yakucepa kuti athandize nyakupfunza wace kubvesesa cinembo ca Zaiya 41:10, 13?

• Kodi nyakupfunza abva tani pomwe awona vidiyo na kuwerenga mavesi?

Wanthu azinji ambadziwa lini kuti cakulombolera n’ciyani ayai ambawona lini kuti imweyi ni mphaso yakucokera kwa Mulungu. (Aga 2:20) Tsono tin’funika kuwathandiza kukhulupira ntsembe ya cakulombolera ya Jezu.

ONANI VIDIYO YA MSOLO WAKUTI PHATISANI BASA BUKHU LAKUTI “KHALANI NA MOYO WAKUKONDWA MPAKA KALE-KALE!” KUTI MULIMBISE CIKHULUPIRO KWA JEZU, MUKAMALA BVUNZANI ABVESERI KUTI:

• Kodi tikudziwa tani kuti m’baleyu akonzekera bwino pfunziroli?

• Kodi iye aphatisa tani basa nkhani yomwe iri pa mbali yakuti “Onani pomwe ibzi” kuti athandize nyakupfunza?

• Thangwe ranyi mpsakufunika kumbapempherera nyakupfunza wa Bibliya?