Kucita upainiya

Timbaphatisa bwino basa mphanvu zathu tikambacita bzizinji pakutumikira Yahova. (1Ak 9:26) Kukhala na bzakulinga kumbaticitisa kuphatisa bwino basa nthawe yomwe yasalayi pomwe dziko likanati kumala. (Aef 5:15, 16) Pomwe mukucita kunamata kwanu kwa pa banja, mungacezerane bzomwe mun’funa kudzacita mu gole la basa lomwe likubwerali. Kuti bzikupusireni, kabukhu ka mitsonkhano kano kana nkhani zomwe zina bzinthu bzomwe pinango mungakwanise kucita. — Tiy 1:5.

Kodi imwepo mungathandize munthu m’bodzi pamui panu kuti akhale mpainiya wakukhazikika? Penu mukuwona kuti mungadzakwanise lini kupfitsa maora yomwe apainiya ambakumbiridwa, cezani na apainiya omwe moyo wawo ngwakundendemerana na wanu. (Mim 15:22) Pinango mungacemere mpainiya m’bodzi pa kunamata kwanu kwa pa banja kuti adzakuuzeni bzomwe ambacita. Mukamala, nembani ndondomeko. Penu mudacita kale upainiya m’mbuyomu, onani penu tsapano mungakwanise pomwe kucita upainiyabo.

Kodi wanthu winango m’banja mwanu angadzacite upainiya bwakuthandiza mwezi m’bodzi ayai mizinji? Penu imwepo mulibe manungo yabwino, mungacite upainiya bwakuthandiza mwa kumbapalizira pang’ono ntsiku iri-yentse. Penu mulibe nthawe yakupalizira pakati pa sumana thangwe rakuti mumbaphata basa ayai mumbapfunza, pinango mungasankhule kucita upainiya m’mwezi omwe mun’dzakhala feriya ayai m’mwezi omwe un’dzakhala na sumana zixanu. Nembani pa kalendariyo mwezi omwe mun’funa kudzacita upainiya bwakuthandiza ndipo konzani ndondomeko. — Mim 21:5.

ONANI VIDIYO YA MSOLO WAKUTI KHALANI WAKUKHWIMIKA — APAINIYA, MUKAMALA BVUNZANI KUTI:

• Kodi Yahova adathandiza tani mpfumakazi Emma Aamand, ndipo bzimwebzi bzikutipfunzisa ciyani?