KUKHALA NA MOYO WACIKRISTAU
Kodi Mungacite Ciyani Kuti Mukhulupire Kuti Bibliya ni Fala la Mulungu?
Fala la Mulungu lingacinje moyo wathu. (Ahe 4:12) Tsono, kuti tigumane phindu na malango yace, tin’funika kutsimikizira kuti iro ‘ndakucokeradi kwa Mulungu.’ (1At 2:13) Kodi mungacite ciyani kuti mumbakhulupire Bibliya?
Mbawerengani Bibliya ntsiku zentse. Pomwe mukuwerenga, mbakhalani tceru kuti muwone kuti Yahova ndiye Mwenekaciro Bibliyalo. Kuti mutsimikizire kuti Bibliya ndakucokeradi kwa Mulungu, mungawerenge bukhu la Mimwani ndipo mun’dzawona kuti malango yace ngakuthandiza ntsiku zathu zino. — Mim 13:20; 14:30.
Mbapfunzani Bibliya. Mbanyang’anani umboni bwakulatiza kuti Bibliya ndakucokera kwa Mulungu. Mungacite bzimwebzi mwakuphatisa basa Bukhu Lakufufudzira Nkhani la Mboni za Yahova pa kamsolo kakuti “Bibliya” ndipo mukamala ndokoni pomwe padanemba kuti “Lakucokera kwa Mulungu.” Ndipo kuti mutsimikizire kuti mafala ya m’Bibliya yalibe kucinjidwa, mungawerenge Apêndice A3, mu Bibliya la Dziko Lipsa la Cipwitikizi.
ONANI VIDIYO YA MSOLO WAKUTI THANGWE RANYI TIMBAKHULUPIRA . . . FALA LA MULUNGU?, MUKAMALA BVUNZANI ABVESERI KUTI:
Kodi mafala yomwe yadanembedwa pa parede mu templo ya ku Karnak, mu dziko la Edjipito, yakulatiza tani kuti Fala la Mulungu ndacadidi?
Kodi timbadziwa tani kuti mafala ya m’Bibliya yalibe kucinjidwa?
Kodi kupulumuka kwa Bibliya kukulatiza tani kuti iro ni Fala la Mulungu? — Werengani Zaiya 40:8