Kodi Mun’dzacita Ciyani pa Nthawe ya Cikumbuso?

Gole liri-lentse, wanthu wa Yahova ambadikhirira na mtima wentse kucita Cikumbuso. Pomwe sumana ya Cikumbuso ikanati kufika timbakhala na mwayi wa kutumbiza Yahova na kumutenda thangwe ra cakulombolera. Ndipo timbacitambo bzibodzi-bodzibzi ntsiku ya Cikumbuso ikapita. (Aef 1:3, 7) Pomwe ntsikuyi ikanati kufika timbacita nyongo yakucemerera wanthu ku Cikumbuso. Ndipo winango ambakonzekera kuti adzacite upainiya bwakuthandiza m’minyezi ya Março na Abril acimbapereka maora 30 ayai 50. Kodi mukufuna kudzacitambo upainiya pa nthawe ya Cikumbuso? Kodi n’ciyani cingakuthandizeni kucita bzimwebzi?

Kuti ticite bzizinji, nthawe zinango timbafunika kukonzekera. (Mim 21:5) Nthawe ya Cikumbuso ikufendera, ndipopa mpsabwino kuyambiratu kukonzekera. Kumbukirani bzomwe mun’funa kudzacita pa nthawe imweyi na bzomwe mungacite kuti mudzakwanise kucita bzomwe mukufunabzo. Ndipo kumbirani Yahova kuti asimbe bzomwe mukufuna kucitabzo. — 1Ju 5:14, 15.

Kodi n’ciyani comwe mun’funa kudzacita kuti mudzacite bzizinji mu utumiki pa nthawe ya Cikumbuso?