Mibvunzo Yakucokera kwa Anyakuwerenga

Kodi cizindikiro comwe cimbafotokozedwa pa 2 Atesalonika 3:14 cimbaikhidwa na akulu wa gwere ayai na abale wa m’gwere?

Mpostolo Paulo adanembera Akristau wa ku Atesalonika kuti: “Penu alipo omwe akubvera lini mafala yathu yomwe tayanemba mu tsambali, muikheni cizindikiro munthu umweyo.” (2 Atesalonika 3:14) Pakuyamba tikhakumbuka kuti ni akulu omwe angadaikha cizindikiroco. Akulu akhafunika kufotokoza nkhani ya kucenjeza gwere bzikakhala kuti m’gweremo muna munthu omwe akubvera lini nfundo za m’Bibliya napo kuti apasidwa malango mwakubwereza-bwereza. Patsogolo pace, abale wa m’gweremo akhafunikira lini kucita naye bzinthu munthu umweyo.

Tsono kabvesesedwe kathu kacinja pakulewa bza nkhani imweyi. Tsapano timbabvesesa kuti Paulo akhalewa bza cakusankhula comwe m’bale ali-wentse wa m’gwere akhafunika kucita pa nkhani imweyi. Ndipopa mpsakufunika lini kuti akulu acite kufotokoza nkhani. Thangwe ranyi kabvesesedweka kacinjidwa? Mbatiwoneni bzomwe Paulo akhafuna kulewa pomwe adapereka malango yamweya.

Paulo adakwanisa kuwona kuti abale winango m’gwere ‘akhabvera lini.’ Iye akhadawapasa malamulo yakucokera m’Fala la Mulungu, tsono iwo adalamba kubvera. Pomwe iye adawazungira pakuyamba adawauza kuti: “Penu munthu an’funa lini kuphata basa, alekembo kudya.” Koma napo bziri tenepo, winango akhapitiriza basi kuleka kuphata basa napo angadakwanisa kuphata basalo. Ndipo iwo akhapitirambo nkhani za wene. Kodi abale wa m’gwere akhafunika kucita nawo tani wanthu wakusaya kubvera malamulowo? — 2 Atesalonika 3:6, 10-12.

Mpostolo Paulo adalewa kuti: “Muikheni cizindikiro munthu umweyo.” Mafalaya yakuthandauza kuzindikira kuti munthuyo ana makhalidwe yakuipa yomwe yangatidzonge. Paulo adapereka malango yamweya kwa gwere lentse sikuti kwa akulu okha. (2 Atesalonika 1:1; 3:6) Na tenepo, munthu ali-wentse m’gwere akawona kuti Mkristau mwanzace akubvera lini malango, iye angadasankhula “kuleka kumbacita naye bzinthu” munthu wakusaya kubverayo.

Kodi bzimwebzi bzikuthandauza kuti munthuyo akhafunika kuwonedwa ninga munthu wakucosedwa m’gwere? Ne, ndipopa Paulo adathumizira mwakulewa kuti: “Pitirizani kumupasa malango ninga m’bale.” Na tenepo, Mkristau ali-wentse angadapitiriza kucita naye bzinthu m’bale omwe waikhidwa cizindikiroyo pa mitsonkhano na mu upalizi. Tsono angadasankhula kuleka kumbacita naye bzinthu bzinango, ninga kuyenda naye pabodzi ku phwando ayai kucita naye masenzeka. Thangwe ranyi? Paulo adalewa kuti: “Kuti iye abve manyazi.” Tikasiya kucita bzinthu na m’bale wathu mu njira imweyi, iye angacite manyazi pa bzomwe akucitabzo acicinja makhalidwe yace. — 2 Atesalonika 3:14, 15.

Kodi Akristau ntsiku zino angaphatise tani basa malango yamweya? Cakuyamba, tin’funika kudziwa ticikhala na citsimikizo cakuti bzomwe munthuyo akucitabzo bzikulatiza kuti iye “ambabvera lini” malamulo ninga momwe Paulo adalewera. Iye akhalewa lini bza wanthu omwe pinango angacite bzinthu bzomwe cikumbu-mtima cathu cikubverana lini nabzo koma bzicikhala kuti bzimbapitana lini na mitemo ayai na malango ya m’Bibliya. Ndipo iye akhalewa lini bza wanthu omwe ambafuna bzinthu bzakusiyana. M’mbuto mwace, Paulo akhalewa bza wale omwe pambuyo pa kupasidwa malango yakucokera m’Fala la Mulungu ambapitiriza kusankhula kusaya kuyabvera malangoyo.

Ntsiku zino, ifepano tikawona mpfumakazi ayai m’bale omwe akupitiriza kusaya kubvera malango ya m’Bibliya,a tingacite cakusankhula ca kuleka kumbacita naye bzinthu m’baleyo ninga kuyenda naye ku phwando ayai kucita naye masenzeka. Pakuti cakusankhula cimweci n’ca munthu ali-yentse pa yekha tingauze lini nkhaniyi wanthu winango omwe mba m’banja lini mwathu. Ndipo tin’dzapitiriza kucita naye bzinthu munthuyo ninga kukhala naye pabodzi pa mitsonkhano ya gwere na kuyenda naye mu upalizi. Iye akacinja makhalidwe yace, tin’dzayamba pomwe kucita naye bzinthu bzentse.