Kodi Mukhadziwa?
N’ciyani comwe antsembe akhacita na mulopa wa bzifuwo bzomwe bzikhaperekedwa ntsembe?
GOLE liri-lentse, wantsembe wa mu Jirayeri akhambapereka bzifuwo bzizinji ninga ntsembe pa guwa la ntsembe mu templo. Mfotokozi m’Djuda wa nkhani zakale, wakucemeredwa Josephus, wa m’magole dzana yakuyambirira adalewa kuti mabira yakupitirira 250 000 yakhaperekedwa ninga ntsembe pa Paskwa, ndipo bzimwebzi bzikhacitisa kuti pa guwa la ntsembe pakhale pakuyerera mulopa muzinji. (Levitiko 1:10, 11; Numero 28:16, 19) Kodi mulopa wentseneyu ukhayenda kuponi?
Pomwe masiyentista yadacera mphepete mwa templo yomwe Herode adamanga yomwe ikhalipo mu nthawe ya Jezu, iwo adagumana mbuto yomwe mulopa ukhapitira pakuyerera kucokera ku temploko.
Mbatiwoneni bzinthu bziwiri bzomwe bzikhathandiza kuti guwa la ntsembe lipitirize kukhala lakucena:
Mibo yomwe ikhali pantsi pa guwa la ntsembe: Bukhu linango la malamulo na miyambo ya Cidjuda lomwe lidanembedwa pambuyo pa magole 200 limbalewambo bzimwebzi. Bukhulo limbalewa kuti: “M’maponta mwa guwa la ntsembero mukhana mibo miwiri . . . ndipo mulopa wa bzifuwo na madzi yomwe yakhaphatisidwa basa pakucenesa guwa la ntsembero bzikhambayerera na m’mibo imweyi mpaka ku cigwa ca Kidironi.”
Anyakufufudza bzinthu bzakale ambatawiriza kuti mibo ikhaphatisidwa basa kuti icose mulopa. Bukhu linango lakulewa bza nkhani za Adjuda limbalewa kuti anyakufufudza bzinthu bzakale adagumana migero pafupi na templo yomwe bzikuwoneka kuti ikhaphatisidwa basa kuti icose mulopa wa ntsembe zomwe zikhaperekedwa na madzi ya pa guwa la ntsembe.
Madzi mazinji: Kuti guwa la ntsembero na mibo yomwe ikhapitira mulopa ipitirize kukhala yakucena, antsembe akhafunikira madzi mazinji. Ndipopa pamwepo pakhafunikira kukhala na madzi mazinji nthawe zentse. Madzi yomwe yakhaphatisidwa basa pa guwa la ntsembe, yakhambacokera mu mzinda mwakuphatisa basa migero yomwe ikhambabweresa madziyo pa templopo. Patsogolo pace, akhambaphatisa basa matanki kuti akoyere madziyo. Nyakufufudza nkhani munango wakucemeredwa Joseph Patrich adalewa kuti: “Bzikuwoneka kuti pa nthawe imweyire, pakhalibe templo yomwe ikhana njira yabwino kwene-kwene yakubweresera madzi na yakucosera madzi yakupswipa ninga imweyire.”