Kodi Mumbadziwa NTHAWE?

KODI imwepo mumbacita tani mukafuna kudziwa nthawe? Pinango mumbanyang’anisa lorojo yanu. Pinango mungawone kuti ziri nthawe ibodzi na mphindi 30 za kumaulo. Kodi munthu acikubvunzani kuti, “Ziri nthawe zanyi” mungamuuze tani?

Mtawiro wanu ungathembe komwe mumbakhala. Mwa ciratizo, pinango mungalewe kuti, ni “1:30” ayai “13:30.” Ndipo ku mbuto zinango pinango mungalewe kuti, “zandosala mphindi 30 kuti zikwane nthawe ziwiri za kumaulo.”

Kodi wanthu wa mu nthawe za m’Bibliya akhambalewa tani nthawe? Iwo akhana njira zizinji zakulewera nthawe. Mwa ciratizo, Bzinembo bza Cihebereu bzimbaphatisa basa mafala ninga ‘madandakweca,’ ‘macibese’ ‘masikati’ na ‘usiku.’ (Ciyambo 8:11; 19:27; 43:16; Bzakutonga 28:29; 1 Wamambo 18:26) Koma nthawe zinango Bibliya limbaphatisa basa madzina manango yakufunika.

Mu nthawe imweyire, kawiri-kawiri kukhakhala alindiri, maka-maka usiku. Ajirayeri akhagawa usiku m’bali zitatu, ndipo nthawe imweyi iwo akhaicemera kuti ‘usiku bwa ulindiri.’ (Psalymo 63:6) Pa Wayeruzi 7:19, timbawerenga bza ‘ulindiri bwaciwiri bwa usiku.’ Koma mu nthawe yomwe Jezu adabadwa, Ajuda adagawa usiku m’bali zinai, ndipo bzimwebzi ndibzo bzomwe Agirego na Aroma adacitambo.

Ndipo mabukhu ya Mateu, Marko, Luka na Juwau yambafotokoza bza usiku bwa ulindiri kazinji kense. Mwa ciratizo, ‘pa nthawe ya ulindiri bwacinai bwa usiku,’ Jezu adafamba padzulu pa madzi aciyenda komwe kukhana anyakupfunza wace. (Mateu 14:25) Jezu adafotokoza there lakuti: ‘Bzingadakhala kuti mwenekaciro nyumba angadadziwa kuti mbava in’bwera usiku, angadagona lini ndipo angadabvuma lini kuti nyumba yace itcoledwe.’—Mateu 24:43.

Jezu adafotokoza bza ulindiri bwacinai pomwe adauza anyakupfunza wace kuti akhale wakupenya thangwe iwo ‘akhadziwa lini nsiku yomwe mwenekaciro nyumba an’bwera, penu ni masikati, penu ni ku maulo, penu ni kumadandakweca ayai ku macibese.’ (Marko 13:35) Ulindiri bwakuyamba ‘masikati,’ bukhayambira pa kumira kwa dzuwa mpaka nthawe zipfemba za usiku. Bwaciwiri, ‘maulo,’ bukhayambira pa nthawe zipfemba za usiku mpaka pakati pa usiku. Ulindiri bwacitatu, ‘madandakweca’ ayai ‘congwe akalira,’ bukhayambira pakati pa usiku mpaka nthawe zitatu za ku macibese. Bzinkuwoneka ninga kuti ni nthawe imweyi yomwe congwe adalira usiku bomwe Jezu adaphatidwa. (Marko 14:72) Ulindiri bwacinai, ‘ciyambi ca macibese,’ bukhayambira pa nthawe zitatu za ku macibese mpaka kucoka kwa dzuwa.

Tenepo napo kuti wanthu wakale akhalibe lorojo ninga zomwe tinkuphatisa basa nsiku zino, iwo akhana njira zakulewera nthawe.