Kubvera abereki wanu kuli ninga kubwezera mangawa ku banko. Mukakhala wakukhulupirika ni pomwe iwo ambakukhulupirani
KWA MASWAKA
10 Kukhala Wakukhulupirika
THANDAUZO LACE
Wanthu wakukhulupirika ambabvera mitemo, ambateweza bzomwe ambalewa ndipo ambalewa cadidi nthawe zentse. Ndipopa abereki, axamwali na apatrau wawo ambawakhulupira.
THANGWE RANYI MPSAKUFUNIKA?
Kawiri-kawiri imwepo mukakhala wakukhulupirika, ndipo pomwe mun’dzakhala na ufulu buzinji.
Sarahi adati: “Bzinthu bzabwino bzomwe mungacite kuti abereki wanu ambakukhulupireni ni kumbacita bzinthu ninga munthu mkulu na kumbacita bzinthubzo na mtima wentse, napo iwo palibe.”
NFUNDO YA M’BIBLIYA: ‘Pitirizani kubziyeza.’—2 Wakolinto 13:5.
BZOMWE MUNGACITE
Penu mukufuna kuti abereki wanu ambakukhulupireni ayai kuti ayambe pomwe penu adaleka, bzinthu bzomwe bzikufotokozedwa panyantsipa bzingakuthandizeni.
Mbacitani bzinthu mwakukhulupirika. Wanthu angaleke kukukhulupirani penu mumbawanamiza. Koma mukalewa cadidi mukaphonya cinthu ciri-centse, iwo an’dzakukhulupirani kwene-kwene.
Caiman adati: “Bzimbakhala bzakusaya kunesa kulewa cadidi, penu bzinthu bziri bwino. Tsono mukalewa cadidi napo pomwe mwacita cinthu cakuipa comwe cingadzonge mbiri yanu, bzimbakhala bwino kwene-kwene. Ndipo wanthu an’dzapitiriza kukukhulupirani.”
NFUNDO YA M’BIBLIYA: ‘Tikufuna kucita bzinthu bzentse mwakukhulupirika.’—Wahebereu 13:18.
Khalani wakukhulupirira. Kafukufuku omwe adacitika kwa mapatrau ya ku Estados Unidos, padawoneka kuti pa mapatrau yentse ya m’dzikolo, 78% yadalewa kuti apitise munthu basa cakuyamba ambafunika kudziwa kuti ngwakukhulupirika. Tenepo, mukakhala wakukhulupirika pomwe mukali ng’ono, bzinthu bzin’dzakufambirani bwino mukadzakula.
Sarah adati: “Abereki wangu ambakomedwa nande, thangwe nimbaphata basa la pamui mwakukhulupirika napo iwo palibe. Bzimwebzi bzimbacitisa kuti iwo andikhulupire kwene-kwene.”
NFUNDO YA M’BIBLIYA: ‘Ndikutsimikiza kuti unibvuma kucita bzomwe ndikukumbirabzi, . . . ndikudziwa kuti un’dzacita kuposa bzomwe ndalewabzi.’—Filemoni 21.
Khalani wakupirira. Munthu ali-wentse ambawona mwana akambakula. Koma nthawe zizinji, bzimbanesa kuti wanthu awone kuti mwanayo wayamba kucita bzinthu ninga mkulu ayai mwakukumbuka bwino.
Brandon adati: “Abereki wanu na anzanu angakukhulupireni lini kokha thangwe rakuti imwepo mwacita bzinthu mwakukhulupirika kabodzi basi. Koma iwo angakukhulupireni pang’ono-pang’ono mukapitiriza kumbacita bzinthu mwakukhulupirika.”
NFUNDO YA M’BIBLIYA: ‘Bvalani . . . kupirira.’—Wakoloso 3:12.