Mbafunani Wanthu Winango

Bvuto

Khalidwe la tsankhulo limbamala lini kabodzi na kabodzi. Bziri ninga matenda, kuti yamale pambatenga nthawe. Mpsibodzi-bodzimbo na tsankhulo, pambatenga nthawe kuti limale. Tsono mungacite ciyani kuti mumalise tsankhulo?

Nfundo ya m’Bibliya

Cithunzi-thunzi: 1. Mwamuna wa ku Ásia akufungulira msuwo msenzi omwe adanyamula makopo ya caya. 2. Mwamuna msenzi ule akugawanisa caya anzace wa ku basa, kuphatanidzambo mkazi wa ku Índia omwe afotokozedwa pakuyamba ule.

‘Bvalani lufoyi, pakuti limbaphatanidzisa wanthu mwamphanvu kwene-kwene kuposa cinthu ciri-centse.’—WAKOLOSO 3:14.

Kodi bzimwebzi bzikuthandauza ciyani? Bzicito bzabwino bzimbathandiza wanthu kukhala wakuphatana. Mukambalatiza kuti mumbafuna wanthu, mun’dzakhala lini na tsankhulo. Ndipo mukadzaza mu mtima mwanu na lufoyi, mu mtimamo mun’dzawoneka lini mbuto ya makumbukidwe yakuipa, ninga ukali na ciwengo.

Bzomwe mungacite

Penu imwepo muna makumbukidwe yakuphonyeka yakulewa bza mtundu unango wa wanthu, kumbukirani bzomwe mungacite kuti mulatize lufoyi wanthuwo. Mwa ciratizo, bzinthubzo bzingakhale ibzi:

Mukambacitira wanthu bzinthu mwa lufoyi, mun’dzakhala mulibe tsankhulo

Cithunzi-thunzi: 1. Mkazi wacikulire akuthandizidwa na mkazi wa ku Índia kukwira pa ntsikada na bzinthu bzomwe agula. 2. Mkazi wacikulire akupasa vizinyu wace cakudya, omwe ni mwamuna wa ku Ásia omwe afotokozedwa pakuyamba ule.

Kuwalatiza makhalidwe yabwino mwa kuwafungulira msuwo ayai kuwapasa mbuto yanu mukakhala kuti mwapakira kanderendere yomwe muna wanthu azinji.
Kuyambisa maceza napo kuti iwo ambalewalewa lini bwino cirewedwe canu.
Kugwesa nfuwa akakhala kuti acita cinthu comwe mukucibvesesa lini.
Kuwatetekera bwino na kuleka kuwagwata mafala akakhala kuti akufotokoza mabvuto yawo.

Ciratizo Comwe Cidacitikadi: Nazaré (Guiné-Bissau)

“Inepano ndikhacitira tsankhulo wanthu wakucokera madziko yanango. Ndikhabva wanthu kulewa kuti azinji mwa wanthu wakucokera madzikoyo, akhanamiza boma kuti agumane phindu ndipo winango akhali akapondo. Tenepo inepano ndikhafuna lini kulewalewa nawo. Tsono ndikhadziwa lini kuti ndikuwacitira tsankhulo, thangwe rakuti wanthu azinji akhawawonambo tenepoyo.

“Na kupita kwa nthawe inepano ndidadzabvesesa kuti ndina khalidwe la tsankhulo. Koma nfundo za m’Bibliya zidandithandiza kumalisa khalidweri ndiciyamba kufuna kwene-kwene wanthuwo. Tsapano nimbatcenkha lini wanthu wakucokera m’madziko yanango, koma nimbawamusa na kuceza nawo. Ndipo nimbacita nyongo yakudziwa bwino-bwino ali-wentse wa iwo. Tsapano nimbawawona bwino wanthu wakucokera m’madziko yanango, ndipo nimbakhala nawo wakutsudzuka.”