DZIKO LOMWE LIRI PA MABVUTO

2 | Phatisani Basa Bwino Kobiri Zanu

THANGWE RANYI BZIMWEBZI MPSAKUFUNIKA?

Wanthu azinji ambafunika kuphata basa ntsiku zentse kuti akwanise kugumana bzinthu bzakufunika pa moyo wawo. Bzakupasa ntsisi mpsakuti mabvuto ya m’dzikoli yambacitisa kuti bzimwebzi bzikhale bzakunesa. Thangwe ranyi?

Ku mbuto komwe mukukhala kukakhala na mabvuto, bzinthu ninga cakudya na nyumba za aluge bzimbaumira kwene-kwene.
Mabvuto yangacitise kuti wanthu acosedwe basa ayai yangacitise kuti wanthu ambaphate basa acimbatambira kobiri yakucepa.
Malengwa ya pantsi yangadzonge malonda ya wanthu, nyumba ayai bzinthu bzinango bzomwe wanthu anabzo. Bzimwebzi bzingacitise kuti wanthu azinji akhale wakusauka.

N’ciyani Comwe Imwepo Mun’funika Kudziwa?

Mukambaphatisa basa bwino kobiri, imwepo mun’dzakhala wakukonzeka kulimbana na mabvuto.
Kumbukirani kuti bzinthu bzomwe munabzo bzingamale.
Pana bzinthu bzomwe kobiri ingagule lini, ninga mpfatso na banja lakuphatana.

Bzomwe Mungacite

Bibliya limbalewa kuti: “Tikakhala na cakudya na bzakubvala, tin’dzakomedwa na bzinthu bzimwebzi.” — 1 Timotio 6:8.

Kukomedwa na bzinthu bzomwe tinabzo kumbathandauza kuleka kumbakumbukira kwene-kwene bza bzakufuna bzathu ticikhala wakukondwa na bzomwe tinabzo. Bzimwebzi bzingakhale bzakufunika kwene-kwene maka-maka bzinthu bzikakhala bzanesa pa moyo wathu.

Kuti mukhale wakukondwa, mun’funika kucinja bzinthu bzinango pa moyo wanu. Penu mumbadzonga kobiri kwene-kwene, bzinthu bzingafikeretu pa kunesa.

MOMWE MUNGABZIKHOTCERERERE—Bzinthu Bzomwe Bzingakuthandizeni

Pa nthawe ya mabvuto, bzinthu bzimwebzi bzingakuthandizeni kuti mumbaphatise basa bwino kobiri

LEKANI KUMBAGULA BZINTHU BZIZINJI

Lekani Kumbagula Bzinthu Bzizinji

Lekani kumbagula bzinthu bzomwe munabzo kale. Bzibvunzeni kuti: ‘Kodi nin’funikadi kugula karo? Kodi ningakhalembo na dimba?’
Pomwe mukanati kugula cinthu, bzibvunzeni kuti: ‘Kodi cinthu cimweci n’cakufunikadi kwa inepano? Kodi ndiciguledi?’
Penu boma likupereka thandizo komwe mumbakhalako, ndokonimbo mukatambire.

“Inepano na banja langu tidawona kuti bzikhali bwino kuwona momwe bzinthu bzikhaliri pa moyo wathu. Tidasiya kucita masenzeka yomwe yakhatidzongera kobiri. Tidayamba kumbagula cakudya cakufewera.” — Gift.

MBANEMBANI BZOMWE MUNGAFUNIKIRE

Mbanembani Bzomwe Mungafunikire

Bibliya limbalewa kuti: “Munthu wa nyongo an’dzagumana phindu pa bzakulinga bzace, koma nyakucita bzinthu na befu an’dzasauka.” (Mimwani 21:5) Kunemba bzomwe mukufunikira kun’dzakuthandizani kuti muleke kudzonga kobiri zizinji.

Cakuyamba, nembani kobiri zomwe mumbatambira mwezi uli-wentse.
Caciwiri, konzani lista ya bzinthu bzomwe mumbagula mwezi uli-wentse, ndipo onani kuti ni kobiri zingasi zomwe mumbadzonga pa kugula bzinthubzo.
Ndipo mukamala, ndendemezerani kobiri zomwe mumbatambira na kobiri zomwe mumbadzonga mwezi uli-wentse. Penu mpsakufunikira, onani bzinthu bzomwe mungaleke kugula kuti bzibverane na kobiri yomwe mumbatambirayo.

“Mwezi uli-wentse timbakonza lista ya kobiri zomwe timbatambira na zomwe timbadzonga. Timbayezera kukoya kobiri kuti tidzaziphatise basa pa bzakucitika bza mwadzidzidzi na bzinthu bzomwe tin’dzafunikira kutsogolo. Tikacita bzimwebzi, timbakhala lini na thupo thangwe timbakhala tikudziwa kale momwe tingaphatisire basa kobiri zathu.” — Carlos.

MBATCENKHANI MANGAWA / MBAKOYANI KOBIRI

Mbatcenkhani Mangawa / Mbakoyani Kobiri

Citani ciri-centse kuti muleke kukhala na mangawa. Penu mpsakukwanisika, yezerani kumbagula bzinthu bzakufunika basi.
Mbakoyani kobiri pang’ono-pang’ono mwezi uli-wentse kuti mudzakwanise kugula bzinthu bzomwe mun’dzafunikira kutsogolo ayai mudzaziphatise basa pa bzakucitika bzakusaya kudikhiririka.

MBAPHATANI BASA MWANYONGO / PITIRIZANI KUKHALA PA BASAPO

Bibliya limbalewa kuti: “Kuphata basa liri-lentse kuna phindu lace.” — Mimwani 14:23.

Mbaphatani Basa mwanyongo / Pitirizani Kukhala Pa Basapo

Mbawonani basa lanu mu njira yakuthemera. Napo kuti basalo ni basa lini lomwe mukhafuna, koma iro limbakupasani kobiri.
Mbaphatani basa mwa nyongo ndipo khalani wakukhulupirika. Bzimwebzi bzin’dzakucitisani kuti mupitirize kukhala pa basapo, ndipo bzin’dzakhalambo bzakupusa kudzagumana basa linango kutsogolo.

“Inepano nimbabvuma basa liri-lentse napo kuti ndikukomedwa lini nalo ayai kobiri yace njing’ono-ng’ono. Nthawe zentse nimbakhala wakukhulupirika ndipo nimbaphata basalo na mtima wangu wentse, ninga kuti ndikubziphatira ndekha.” — Dmitriy.

Bzomwe mungacite pomwe mukunyang’ana basa . . .

Lekani kundokhala tenepo. Mbabvunzani basa m’maempreza napo kuti iyo yakunyang’ana lini wanthu. Uzani axamwali wanu na famidya zanu kuti mukunyang’ana basa.
Khalani wakukonzeka kucinja. Pinango bzingakwanisike lini kugumana basa lomwe imwepo mukufuna.