Kodi mumbaliwona tani Bibliya?

BIBLIYA LIMBATI

“Bzinembo bzentse bzidafuliziridwa na Mulungu.”​—2 Timotio 3:16.

PHINDU LACE MUKAKHULUPIRA BZIMWEBZI

Mun’dzagumana mitawiro ya mibvunzo mikulu-mikulu ya pa moyo wathu.​—Mimwani 2:1-5.

Mun’dzatsogoledwa mwakukhulupirika pa moyo wanu wa ntsiku-na-ntsiku.—Salimo 119:105.

Mun’dzakhala na cidikhiro cacadidi ca kutsogolo.​—Aroma 15:4.

KODI TINGAKHULUPIREDI BZOMWE BIBLIYA LIMBALEWA?

Inde, pa mathangwe matatu:

• Mbverano Wakudabwisa. Bibliya lidatenga magole yakuposa 1600 kuti linembedwe na wanthu 40 wakusiyana-siyana. Wazinji wa iwo walibe nakundodziwanako. Tsono Bibliya lentse ndakubverana, licikhala na msolo ubodzi wapakati.

• Wanembi Wakulungama. Wanembi wa nkhani za kale-kale, kawiri-kawiri iwo wambabisa bzakuphonya bza mbumba yawo. Mwakusiyana na iwo, wanembi wa Bibliya, mwakulungama iwo wadanemberatu bzakuphonya bzawo na bza wanthu wa mtundu wawo.​—2 Nkhani 36:15, 16; Salimo 51:​1-4.

• Mapolofesiya yakukhulupirika. Bibliya lidaleweratu bza kugwesedwa kwa mzinda wakale-kale wa Babulo, magole 200 pomwe bzikhanati nakundocitikako. (Zaiya 13:17-22) Iro lidaleweratu momwe Babuloyo angadapfudzidwira pabodzi na dzina la munthu wakudzalikundayo!​—Zaiya 45:1-3.

  Mapolofesiya yanango ya m’Bibliya, yadacitikambo ndipo palibe kuphonyeka cinthu nacibodzico. Kodi ndibzo lini bzomwe tingadikhirire mu Fala la Mulungu?​—2 Pedru 1:21.