Adapola Mwa Kundophata Cakubvala Ca Jezu

Wanthu azinji omwe akhakhala kumabvadzuwa kwa nyanza ya Galileya, adabva bzakuti Jezu akhabwera kucokera ku Dekapoli. Bzinkuwoneka kuti wanthuwo adabva kuti Jezu adaimisa cimphepo pabodzi na mabimbi ya mphanvu, ndipo pinango adabva pomwe kuti Jezu adapoza wanthu awiri omwe akhadapoteredwa na madimonyo. Tenepo, ‘thimu likulu la wanthulo’ lidayenda kukamudikhirira m’mphepete mwa nyanza pinango mu dera la Kafarinaumu. (Marko 5:21) Pomwe iye adabuluka m’mwadiya, wanthuwo akhadikhirira kuwona bzinthu bzomwe iye angadacita.

M’bodzi mwa wanthu omwe akhafunisisa kuwona Jezu akhali Jairo, omwe akhali mtsogoleri wa mu sinagoga, pinango sinagoga ya ku Kafarinaumu. Iye adagodamira Jezu, acimukumbira mwakubwereza-bwereza kuti: ‘Mwana wangu wacikazi ankuduwala mwapenu-penu. Ndaphata minyendo tiyendeni mukamuikhe manja yanu kuti alimbe acikhala na moyo.’ (Marko 5:23) Ndipo Jezu adafuna kuthandiza mwana wacikazi wa Jairo, omwe akhana magole 12 yakubadwa ndipo akhafunidwa kwene-kwene na pai wacewo.—Luka 8:42.

Pomwe akhali mu njira pakuyenda ku mui kwa Jairo, padacitika cinthu cinango. Wanthu azinji omwe akhaperekeza Jezu pa ulendobu, akhadikhirira kuwona Jezuyo ankucita cakudabwisa cinango. Koma pa thimulo pakhana mkazi munango omwe akhacita thupo kwene-kwene na matenda yomwe yakhamuboneresa.

Mkaziyu akhali Mjuda ndipo akhabonera na matenda yakutaya mulopa kwa magole 12. Iye akhadanyang’ana kale thandizo kwa madotolo yakusiyana-siyana, ndipo akhadadzonga kobiri zace zense kulipirira mamkhwala pabodzi na bzinthu bzinango bzomwe madotoloyo yakhamuuza. Koma matenda yaceyo yakhamala lini. M’mbuto mwace ‘matendayo yakhandothumizirika-thumizirika.’—Marko 5:26.

Mpsakubveka kuti matenda yaceyo m’mbuto mwa kundomutepesa, yakhali yakunesa kuti ambayalewe ndipo yakhapasa manyazi. Cakutonga ca Mozeji cikhalewa kuti mkazi akakhala kuti ankutaya mulopa akhakhala wakupswipa pa nthawe yense yomwe ankutaya mulopayo. Ndipo munthu aliwense akakhuya mkaziyo ayai cakubvala cace comwe cikhana mulopaco, akhafunika kusamba ndipo akhakhala wakupswipa mpaka usiku.—Mwambo 15:25-27.

Mkaziyo ‘adabva bzizinji pakulewa bza Jezu,’ ndipo adayamba kumunyang’ana. Thangwe rakuti akhali wakupswipa, iye adapita pakati pa thimulo mwakabise-bise kuti wanthuwo aleke kumuzindikira, ndipo iye akhalewa mu mtima mwace kuti: ‘Ndikandokhuya cakubvala cace cakunjaco, ndinilimbiratu.’ Pomwe adaphatadi cakubvala ca Jezuco, mulopa wace udaduma. ‘Ndipo adabzibva m’thupi mwace kuti wacira matenda yace makuluyo.’—Marko 5:27-29.

Patsogolo pace Jezu adati: ‘Mbani wandikhuya?’ Munkukumbuka kuti mkaziyo adabva tani pomwe Jezu adacita mbvunzo umweyu? Pedru adatawira mwakutsimula Jezu kuti: ‘Mpfunzisi, wanthu wensenewa akuzungulirani ndipo akukupsindikizani.’ Tsono kodi thangwe ranyi Jezu adabvunza kuti ‘Mbani wandikhuya?’ Jezuyo adafotokoza kuti: ‘Alipo omwe wandikhuya, thangwe ndabva mphanvu yacoka mwa ine.’ (Luka 8:45, 46) Bzimwebzi bzidalatiza kuti Jezu ana mphanvu yakupoza.

Pomwe adazindikira kuti Jezu adadziwa bzomwe iye adacitabzo, adagodama ndipo akhatetemera na mantha. Patsogolo pace, iye adayamba kufotokoza bza matenda yaceyo pabodzi na bzomwe bzidacitika kuti apole pamaso pa wanthu wense. Jezu adamutsangalaza na mafala yakuti: ‘Mwanawe, cikhulupiro cako cakulimbisa; ndoko mwa mtendere, wapozedwa matenda yako makuluyo.’—Marko 5:34.

Bzimwebzi bzinkulatiziratu kuti, omwe Mulungu adamusangula kuti adzatonge pa dziko lapansi pano, ni munthu walufoyi ndipo ambabvera nsisi wanthu. Ndipo sikuti ambandocita thupo na wanthu, koma anazo mphanvu zakuthandizira wanthuwo.