Kuyamba kwa Gawo 11

Mu gawo lino, tin’pfunza nkhani za m’Bibliya zomwe zimbafotokozedwa m’mabukhu ya Mateu mpaka Cibvumbulutso. Jezu adabadwira m’banja lakusauka lomwe likhakhala mu mzinda ung’ono, ndipo adaphata basa lakupala matabwa pabodzi na pai wace. Jezu ni munthu omwe akhadasankhulidwa na Yahova kuti adzapulumuse wanthu na kudzakhala Mambo mu Umambo bwa Mulungu. Penu ndimwe m’bereki, thandizani mwana wanu kubvesesa momwe Yahova adasankhulira banja labwino kuti Jezu adzabadwire. Mufotokozereni momwe Yahova adakhotcerera Jezu kwa Herode omwe akhafuna kumupha, mucimulatizambo kuti palibe comwe cingatazise Yahova kucita kufuna kwace. Muthandizeni kuwona momwe Yahova adasankhulira Juwau kuti adzakonzekerese wanthu kuti adzatambire Jezu. Bvekesani momwe Jezu adalatizira kuti akhakomedwa kupfunza bza Yahova kuyambira ali mng’ono.