Thangwe Ranyi Tin’funika Kulemekeza Utongi?

1, 2. (a) Kodi tin’funika kumbabvera utongi bwa yani? (b) Kodi tin’cezerana mibvunzo iponi mu nkhani ino?

POMWE imwepo mukhali ng’ono, mpsakupenukisa lini kuti nthawe zinango abereki wanu akhakuuzani kuti mucite bzinthu bzomwe mukhafuna lini kucita. Imwepo mukhawafuna abereki wanuwo ndipo mukhadziwa kuti mukhafunikira kuwabvera. Koma napo bzikhali tenepo, ni nthawe lini zentse zomwe mukhafuna kuwabvera.

² Ifepano timbadziwa kuti Yahova Baba wathu ambatifuna kwene-kwene. Iye ambatisamalira ndipo ambawonesesa kuti tinabzo bzentse bzomwe tin’funikira kuti tikhale na moyo wacikondweso. Iye ambatipasa malango yakufunikira kuti tikhale na moyo wabwino. Nthawe zinango iye ambaphatisa basa wanthu winango kuti atipase malangoyo. Ifepano tin’funika kumbabvera na kulemekeza utongi bwa Yahova. (Mimwani 24:21) Tsono thangwe ranyi nthawe zinango bzimbatinesa kubvera malango? Thangwe ranyi Yahova ambatikumbira kuti timbabvere malango? Ndipo tingalatize tani kuti timbabvera malango yace?—Onani Mafala Yakuthumizira 9.

THANGWE RANYI MPSAKUNESA KULEMEKEZA UTONGI?

3, 4. Kodi thangwe ranyi wanthu wentse ambabadwa wakuperewera? Thangwe ranyi nthawe zinango bzimbatinesa kubvera malango yakucokera kwa Yahova na kwa wanthu?

³ Pakuti ndife wanthu wakuperewera, bzimbatinesa kukhala wanthu wakubvera. Bzimwebzi bzidayamba kucitika kuyambira pomwe banja lakuyamba Adamu na Eva adaphonya. Napo kuti iwo akhali wakulungamiratu, koma iwo alibe kubvera utongi bwa Mulungu. Na bzimwebzi, wanthu wentse ambabadwa wakuperewera. Kuperewerako ni thangwe libodzi lomwe limbaticitisa kuti bzitinese kumbabvuma malango yakucokera kwa Yahova na yakucokera kwa wanthu. Thangwe linango ndakuti wanthu omwe Yahova ambawaphatisa basa kuti atipase malangowo, mbakuperewerambo.—Ciyambo 2:15-17; 3:1-7; Psalymo 51:5; Waroma 5:12.

⁴ Nthawe zinango timbakhala wakubzikuza thangwe ndife wakuperewera. Ndipo kubzikuzako kumbaticitisa kuti tileke kumbabvuma malango. Mwa ciratizo, kwa Jirayeri wakale, Yahova adasankhula Mozeji kuti ambatsogolere wanthu wace. Tsono mwamuna munango wakucemeredwa Kora, omwe akhatumikirambo Yahova kwa magole mazinji, adayamba kumbabzikuza acimbanyoza kwene-kwene Mozeji. Napo Mozeji akhana udindo bukulu bwa kutsogolera wanthu wa Mulungu, iye akhabzikuza lini. M’mbuto mwace, Bibliya limbalewa kuti iye akhali munthu wakubzicepswa kwene-kwene kuposa wanthu wentse wa mu nthawe imweyire. Tsono Kora adalamba kubvera malango ya Mozeji. Mpaka iye adapumpsa wanthu azinji kuti aphatane naye pa kuphindukira Mozeji. Tsono n’ciyani comwe cidadzacitikira Kora na anyakupanduka winangowo? Iwo adaphedwa. (Mirewengo 12:3; 16:1-3, 31-35) M’Bibliya mumbagumanika bziratizo bzizinji bzomwe bzimbatipfunzisa bza ngozi ya kubzikuza.—2 Nkhani 26:16-21; onani Mafala Yakuthumizira 10.

5. Kodi wanthu winango adaphatisa tani basa mwakuphonyeka udindo bwawo?

⁵ Pinango imwepo mudawona kale kuti wanthu winango akakhala na udindo ambacinja acikhaliratu wakuipa kwene-kwene. Mbiri ya wanthu azinji iri tenepoyo. (Werengani Mpalizi 8:9.) Mwa ciratizo, Sauli akhali mwamuna wabwino na wakubzicepswa pomwe Yahova adamusankhula kuti akhale mambo wa Jirayeri. Tsono iye adalekerera kuti kubzikuza na ntsanje bzikule mu mtima mwace, ndipo bzimwebzi bzidamucitisa kuti ayambe kumbazunza Davide omwe akhali munthu wabwino. (1 Samuweri 9:20, 21; 10:20-22; 18:7-11) Patsogolo pace, Davide adadzakhala mambo wa Jirayeri ndipo iye akhali m’bodzi wa wamambo wabwino kwene-kwene wa mu Jirayeri. Tsono na kupita kwa nthawe, iye adaphatisa basa utongi bwace mu njira yakuphonyeka. Iye adacita upombo na Bateseba, mkazi wa mwamuna munango omwe akhacemeredwa Uriya, ndipo iye adayeza kubisa pikado yace mwa kucita makonzedwe yakuti Uriya akafe ku nkhondo.—2 Samuweri 11:1-17.

THANGWE RANYI TIMBALEMEKEZA UTONGI BWA YAHOVA?

6, 7. (a)  Kodi lufoyi lathu kwa Yahova limbatilimbisa kucita ciyani? (b) N’ciyani cingatithandize kukhala wakubvera napo pa nthawe yakunesa?

⁶ Ifepano timbalemekeza malango yakucokera kwa Yahova thangwe timbamufuna. Pakuti timbafuna kwene-kwene Yahova kuposa cinthu ciri-centse, timbafunambo kumukondwesa. (Werengani Mimwani 27:11; Marko 12:29, 30.) Kucokera mu nthawe ya Adamu na Eva banja lomwe likhakhala mu zunde la Edeni, Sathani ambafuna kuti wanthu aleke kumbabvera utongi bwa Yahova. Dyabu akufuna kuti ifepano timbakumbuke kuti Yahova alibe ugo bwakutiwuza bzakucita. Koma timbadziwa kuti limweri ni gunkha. Ifepano timbakhulupira mafala yakuti: ‘Ndimwe wakuthemera Yahova, Mulungu wathu, kupasidwa mbiri, ulemu na mphanvu, thangwe ndimwe mudalenga bzinthu bzentse.’—Cibvumbulutso 4:11.

⁷ Pomwe imwepo mukhali ng’ono, mpsakukwanisika kuti mudapfunza kubvera abereki wanu napo pa bzinthu bzomwe mukhafuna lini. Mu njira ibodzi-bodziyi, ninga atumiki wa Yahova, nthawe zinango bzingakhale bzakunesa kubvera Yahovayo. Koma pakuti timbamufuna ndipo timbamulemekeza, tin’dzacita ciri-centse comwe tingakwanise kuti timbamubvere. Jezu adatisiyira ciratizo cabwino. Iye adabvera Yahova napo pa nthawe yomwe kucita bzimwebzo, kukhali kwakunesa. Ndipopa iye adauza Baba wace na mtima wentse kuti: ‘Kucitike kufuna kwanu, sikuti kwangu.’—Luka 22:42; onani Mafala Yakuthumizira 11.

8. Kodi ni njira zinango ziponi zomwe Yahova ambaziphatisa basa kuti atitsogolere? (Onani kwadru yakuti “Bverani Malango.”)

⁸ Ntsiku zino Yahova ambatitsogolera mu njira zakusiyana-siyana. Mwa ciratizo, iye adatipasa Bibliya, ndipo adatipasambo akulu m’gwere. Timbalatiza kuti timbabvera na kulemekeza utongi bwa Yahova mwa kumbalemekeza wale omwe iye adawasankhula kuti ambatitsogolere. Tikalamba thandizo lawo, timbakhala tinkulamba Yahova. Pomwe Ajirayeri adalamba kubvera Mozeji, Yahova bzidamuwawa kwene-kwene. Bzikhali ninga kuti Ajirayeriwo akhalamba kubvera Yahovayo.—Mirewengo 14:26, 27; onani Mafala Yakuthumizira 12.

9. Kodi lufoyi lathu lingatithandize tani kubvera malango?

⁹ Tikambabvera utongi, timbalatiza kuti timbafuna abale na mpfumakazi zathu. Mwa ciratizo, pakacitika matsoka ya cirengedwe, kawiri-kawiri mathimu yakusiyana-siyana yambakaphata basa pabodzi kuti yapulumuse wanthu azinji. Tsono kuti akwanise kupulumusa wanthu azinjiwo, bzimbafunika kuti wentse abvere malango. Tsono n’ciyani cingacitike munthu m’bodzi akasaya kubvera malangoyo mkuyamba kumbacita bzamumsolo mwace? Napo acikhala na makumbukidwe yabwino, koma kusaya kubvera malango kungabwerese mabvuto mazinji. Ndipo pinango bzingapweteke winango pa thimupo. Mu njira ibodzi-bodziyi, tikasaya kubvera malango yakucokera kwa Yahova na yakucokera kwa wanthu omwe iye adawapasa udindo, bzingapwetekembo winango. Tenepo, tikambabvera Yahova, timbalatiza kuti timbafuna abale wathu ndipo timbalemekeza makonzedwe ya Yahovayo.—1 Wakolinto 12:14, 25, 26.

10, 11. Kodi tin’cezerana ciyani tsapano?

¹⁰ Bzentse bzomwe Yahova ambatikumbira kuti ticite, mpsakuthandiza kwa ifepano. Tikambalatiza ulemu kwa omwe ambatsogolera m’banja, m’gwere pabodzi na kulemekeza akulu-akulu wa boma, bzinthu bzimbatifambira bwino.—Bzakutonga 5:16; Waroma 13:4; Wayefezo 6:2, 3; Wahebereu 13:17.

¹¹ Kubvesesa thangwe ranyi Yahova ambafuna kuti timbalemekeze wanthu winango, kungatithandize kucita bzimwebzo. Mbaticezeraneni tsapano momwe tingalatizire ulemu m’banja, m’gwere pabodzi na akulu-akulu wa boma.

MOMWE TINGALATIZIRE ULEMU M’BANJA

12. Kodi mwamuna angalatize tani kuti ambalemekeza utongi bwa Yahova?

¹² Yahova ndiye omwe adayambisa banja ndipo munthu ali-wentse m’banjamo adamupasa mbali yace. Munthu ali-wentse akambadziwa bzomwe Yahova ankudikhirira kuti acite, bzinthu bzimbafamba bwino kwene-kwene m’banjamo. (1 Wakolinto 14:33) Yahova adasankhula mwamuna kuti akhale msolo wa banja. Bzimwebzi bzinkuthandauza kuti Yahova ambadikhirira kuti mwamunayo asamalire banjalo mwa lufoyi na kutsogolera mkazi wace na wana wace. Tenepo mwamuna an’dzatawira kwa Yahova momwe ambasamalirira banja lace. Mwamuna omwe ambatumikira Yahova, ngwakudeka mtima na walufoyi ndipo ambasamalira banja lace mu njira yomwe Jezu ambasamalirira gwere. Pomwe mwamuna an’cita bzimwebzi, ambalatiza kuti ankulemekeza Yahova.—Wayefezo 5:23; onani Mafala Yakuthumizira 13.

13. Kodi mkazi angalatize tani kuti ankulemekeza utongi m’banja?

¹³ Mkazi wacikristau ana mbali yakufunika kwene-kwene m’banja. Iye ambathandiza mwamuna wace kuti akhale msolo wa banja wabwino. Ndipo wentse pabodzi mwamuna na mkazi ambathandizana kupfunzisa wana. Ciratizo cabwino ca mkaziyo, cimbathandiza kuti wana ambalemekeze pai wawo. (Mimwani 1:8) Iye ambalemekeza mwamuna wace ndipo ambathandizira bzakusankhula bzace. Napo acikhala kuti mkaziyo ankubverana lini na cakusankhula cinango, iye ambafotokoza makumbukidwe yace mwa kudeka mtima na mwa ulemu. Pomwe mkazi ali pa banja na mwamuna omwe ni mboni lini ya Yahova, iye ambagumana na mabvuto mazinji. Koma akapitiriza kucita bzinthu na mwamuna wace mwa lufoyi na mwa ulemu, pinango ntsiku inango mwamunayo angadzayambe kunamata Yahova.—Werengani 1 Pedru 3:1.

14. Kodi wana angalatize tani kuti ankulemekeza utongi m’banja?

¹⁴ Wana mbakufunika kwene-kwene kwa Yahova, ndipo iwo ambafunika kukhotcereredwa na kutsogoleredwa. Abereki ambakondwa kwene-kwene wana wawo akambawabvera. Ndipo wanawo akambabvera ambalatizambo ulemu kwa Yahova acimukondwesa. (Mimwani 10:1) Mabanja mazinji, wana ambaleredwa na m’bereki m’bodzi. Bzimwebzi bzimbakhala bzakunesa kwa wentsene, napo kwa m’bereki na kwa wanawo. Tsono akakhala kuti wanawo ambabvera na kuthandiza mai ayai pai wawo, moyo wa m’banjamo umbakhala wakukondwesa. Banja liri-lentse limbagumana na mabvuto. Tsono ali-wentse m’banja akateweza malango ya Yahova, banjalo limbakhala lakukondwa. Bzimwebzi bzimbatumbizisa Yahova, omwe ni Mulengi wa mabanja yentse.—Wayefezo 3:14, 15.

MOMWE TINGALATIZIRE ULEMU M’GWERE

15. Kodi tingalatize tani kuti timbalemekeza utongi m’gwere?

¹⁵ Yahova ambatitsogolera mwa kuphatisa basa gwere la Cikristau, ndipo utongi bwentse adapasa Jezu. (Wakoloso 1:18) Ndipo Jezuyo, adapasambo ‘kapolo wakukhulupirika na wanzeru’ udindo bwakusamalira wanthu wa Mulungu pa dziko la pantsi. (Mateu 24:45-47) Ntsiku zino ‘kapolo wakukhulupirika na wanzeru’ ni Bungwe Lakutonga. Bungwe lakutongali limbatipasa bzomwe tin’funikira pa nthawe yakuthemera kuti atithandize kulimbisa cikhulupiro cathu. Akulu wa m’gwere, atumiki wakuthandiza na anyakunyang’anira dera ambathandiza magwere pa dziko lentse la pantsi ndipo ambatsogoleredwa na Bungwe Lakutonga. Abale wentsenewa ana udindo bwakutisamalira. Ndipo iwo an’dzatawira kwa Yahova momwe ankucitira bzinthu na udindo bwawo. Tenepo tikambalemekeza wanthu amwewa, timbakhala tinkulemekezambo Yahova.—Werengani 1 Watesalonika 5:12; Wahebereu 13:17; onani Mafala Yakuthumizira 14.

16. Thangwe ranyi tingalewe kuti akulu na atumiki wakuthandiza ambasankhulidwa na mzimu wakucena?

¹⁶ Atumiki wakuthandiza na akulu ambathandiza kuti wanthu wa m’gwere akhale wakukhulupirika na wakuphatana. Napo bziri tenepo, iwo ni wanthu wakuperewera ninga ifepano. Tsono, kodi iwo ambasankhulidwa tani? Abale amwewa ambafunika kukwanirisa bzomwe Bibliya limbalewa. (1 Timotio 3:1-7, 12; Tito 1:5-9) Yahova adaphatisa basa mzimu wace wakucena kuti athandize anembi wa Bibliya kufotokoza bza makhalidwe yamweya. Akulu ambapemba kwa Yahova kukumbira mzimu wace wakucena akakhala ankucezerana kuti mbani ankuthemera kusankhulidwa kukhala mkulu ayai mtumiki wakuthandiza. Bzinkuwonekeratu kuti Yahova na Jezu ndiwo ambatsogolera gwere. (Mabasa 20:28) Amuna wakusankhulidwa kuti atithandize na kutisamalirawa ni mphaso zakucokera kwa Mulungu.—Wayefezo 4:8.

17. Kodi nthawe zinango mpfumakazi in’dzafunika kucita ciyani kuti ilatize ulemu?

¹⁷ Nthawe zinango, pangakhale palibe akulu ne atumiki wakuthandiza omwe angatsogolere bzinthu bzinango m’gwere. Abale winango wakubatizidwa angaphatisidwe basa, tsono penu palibe m’bale omwe angacite mbali imweyo, mpfumakazi ingacite mbali yomwe kokha imbafunika kucitidwa na m’bale wakubatizidwa. Bzikakhala tenepoyo, mpfumakaziyo in’funika kubvala cinthu kuti impsinkhe msolo wace, cinthuco cingakhale capeu ayai duku. (1 Wakolinto 11:3-10) Mu njira imweyi, mpfumakaziyo imbakhala inkulatiza kuti imbalemekeza makonzedwe yomwe Yahova adayakhazikisa m’gwere na m’banja.—Onani Mafala Yakuthumizira 15.

MOMWE TINGALATIZIRE ULEMU KWA AKULU-AKULU WA BOMA

18, 19. (a)  Kodi tinkupfunza ciyani kucokera pa Waroma 13:1-7? (b) Kodi tingalatize tani ulemu kwa akulu-akulu wa boma?

¹⁸ Yahova wabvuma kuti akulu–akulu wa boma atonge ndipo ifepano tin’funika kuwalemekeza. Iwo ambalinganiza madziko na midzi ndipo ambapereka kwa wanthu bzomwe mpsakufunikira. Akristau ambabvera malango yakugumanika pa Waroma 13:1-7. (Werengani.) Timbalemekeza ‘atongi akulu-akulu’ ndipo timbabvera malamulo ya dziko na mudzi omwe timbakhala. Malamulo yamweya yambatokonya banja lathu, malonda yathu ayai basa lathu. Mwa ciratizo, timbalipira mtsonkho, ndipo timbawafotokozera bzinthu bzentse bzomwe abomawo ambatikumbira kuti tiwauze. Tsono tani penu boma lingatikumbire kuti ticite bzinthu bzomwe bzinkubverana lini na mitemo ya Mulungu? Mpostolo Pedru adati: ‘Tin’funika kubvera Mulungu ninga mtongi, kuposa wanthu.’—Mabasa 5:28, 29.

¹⁹ Tikambalewalewa na akulu-akulu wa boma, ninga ayeruzi ayai wamphanvu za umangi, tin’funika kumbawalemekeza. Maswaka ya Cikristau yambalemekeza apfunzisi wawo pabodzi na wanthu winango omwe ambaphatambo basa pa xikolapo. Kubasa kwathu, timbalemekeza a patrau wathu, napo penu iwo ambacita lini bzimwebzo. Tikambacita bzimwebzi timbakhala tinkutewezera mpostolo Paulo, omwe akhalemekeza akulu-akulu wa boma napo kuti bzimwebzi bzikhali bzakunesa nthawe zinango. (Mabasa 26:2, 25) Napo penu wanthu ankuticitira bzinthu bzabwino ayai ne, ifepano tin’pitiriza kukhala wanthu wa ulemu.—Werengani Waroma 12:17, 18; 1 Pedru 3:15.

20, 21. Kodi ni bzinthu bzabwino bziponi bzomwe bzingacitike, tikambalemekeza winango?

²⁰ Pa dziko lentse la pantsi wanthu azinji ambalemekezana lini. Koma wanthu wa Yahovafe ndife wakusiyana. Timbalemekeza munthu ali-wentse. Timbateweza malango ya mpostolo Pedru yakuti: ‘Lemekezani wanthu wa mtundu uli-wentse.’ (1 Pedru 2:17) Wanthu ambawona tikambawalemekeza. Jezu adati: ‘onesani ceza canu kuna wanthu, kuti awone mabasa yanu yabwino, acim’pasa mbiri Baba wanu.’—Mateu 5:16.

²¹ Tikambalatiza ulemu m’banja mwathu, m’gwere pabodzi na kulemekeza wanthu winango, ciratizo cathu cabwino cingacitise winango kufuna kupfunza bzizinji bza Yahova. Ndipo tikambalemekeza winango, timbakhala tinkulemekezambo Yahova. Bzimwebzi bzimbakondwesa Yahova ndipo bzimbalatiza kuti timbamufuna.