PFUNZIRO 14

Kubvekesa Nfundo Zikulu-zikulu

Wahebereu 8:1

BZOMWE MUNGACITE: Thandizani abveseri wanu kuti ambakutewereni pomwe munkufotokoza nkhani yanu, ndipo athandizeni kuwona momwe nfundo iri-yense inkubverana na msolo wa nkhaniyo pabodzi na cakulinga cace.

MOMWE MUNGACITIRE:

Khalani na cakulinga. Onani penu cakulinga ca nkhani yanuyo ni kundodziwisa cinthu, kulimbisa ayai kuwathandiza kucinja makumbukidwe yawo. Patsogolo pace, fotokozani nkhaniyo mwakubverana na cakulingaco. Tsimikizirani kuti nfundo ikulu iri-yense inkuthandiza kuti mukwanise cakulingaco.

Bzibvunzeni kuti: ‘Kodi ni mibvunzo iponi yomwe abveseri wangu angakakhale nayo pa nkhaniyi? Kodi n’ciyani comwe iwo angakabvunze pakuyamba?’ Patsogolo pace, ndandalisani nfundo zanuzo mwakubverana na momwe iwo angakabvunziremo kuti bzireke kukawanesa kubvesesa.
Tsindikani msolo wa nkhani yanu. Mbabwerezerani msolo wa nkhani yanuyo mwa kumbalewa mafala ya msoloyo ayai mafala manango yakundendemerana nayo.
Bvekesani nfundo zikulu-zikulu mu njira yakusaya kunesa. Sankhulani nfundo zokha zomwe zinkubverana na msolo wa nkhaniyo, zomwe mungakazifotokozembo mkati mwa nthawe yomwe mwapasidwayo. Lekani kukhala na nfundo zikulu-zikulu zizinji, ndipo fotokozani nfundo ikulu iri-yense mwakubveka bwino, mucimbaima pang’ono pomwe mukanati kuyamba kufotokoza nfundo inango.

Mungafotokoze nfundo zikulu-zikulu kumayambiriro kwa nkhani yanu kuti muthandize abveseri wanu kukutewerani pomwe munkuzifotokozapo, ayai mungazibwerezere kuphampha kwa nkhani yanu kuti muwathandize kuzikumbukira.