PFUNZIRO 12
N’ciyani Cingakuthandizeni Kupitiriza Kupfunza Bibliya?
Kupfunza Bibliya n’cinthu cabwino kwene-kwene. Tsono nthawe zinango bzimbakhala bzakunesa kucita bzimwebzi. Nthawe zinango, mungawone kuti mungakwanise lini kupitiriza kupfunza Bibliya. Thangwe ranyi mpsakufunika kucita nyongo kuti mupitirize kupfunza Bibliya? N’ciyani comwe cingakuthandizeni kupirira napo mukugumana na mabvuto?
1. Thangwe ranyi kupfunza Bibliya n’kwakufunika?
“Fala la Mulungu ndamoyo na lamphanvu.” (Ahebereu 4:12) Bibliya ndakufunika kwene-kwene thangwe limbatiuza makumbukidwe ya Mulungu na momwe iye ambatiwonera. Bibliyalo limbandokuthandizani lini kukhala na cidziwiso koma limbakuthandizanimbo kukhala na nzeru na cidikhiro. Ndipo cinthu cakufunika kwene-kwene n’cakuti iro lingakuthandizeni kukhala xamwali wa Yahova. Mukambapfunza Bibliya, mumbakhala mukubvuma kuti mphanvu yace iphate basa kwa imwepo.
2. Thangwe ranyi mpsakufunika kuzindikira kufunika kwa cadidi ca m’Bibliya?
Cadidi ca m’Bibliya ni cuma cakufunika kwene-kwene. Ndipopa Bibliya limbatilimbikisa kuti “gula cadidi ndipo leka kucigulisa.” (Mimwani 23:23) Tikambakumbukira kufunika kwa cadidi ca m’Bibliya, tin’dzacita nyongo yakupitiriza kupfunza cadidico napo pomwe tagumana na mabvuto.—Werengani Mimwani 2:4, 5.
3. Kodi Yahova angakuthandizeni tani kuti mupitirize kupfunza Bibliya?
Pakuti Yahova ni Mulengi wa mphanvu-zentse na Xamwali wanu, iye an’funa kukuthandizani kuti mumudziwe. Iye angakupaseni “mphanvu na cikhumbo kuti mucite bzomwe iye akufuna.” (Werengani Afilipi 2:13.) Tenepo, penu nthawe zinango mungafunikire kulimbikisidwa kuti mupitirize kupfunza ayai muphatise basa bzomwe mukupfunza, Yahova angakuthandizeni. Ndipo penu mukufunikira mphanvu kuti mupirire mabvuto ayai mayezo iye angakupaseni. Nthawe zentse mbakumbirani Yahova mu mpembo kuti akuthandizeni kupitiriza kupfunza Bibliya.—1 Atesalonika 5:17.
FUFUDZANI BZINANGO
Onani momwe mungapitirizire kupfunza Bibliya napo kuti mumbakhala mudatanganidwa ayai mukuletsedwa na wanthu winango. Patsogolo pace, onani momwe Yahova akukuthandizirani kuti mupirire.
4. Tsimikizirani kuti kupfunza Bibliya n’kwakufunika kwene-kwene kwa imwepo
Nthawe zinango timbakhala wakutanganidwa kwene-kwene mwakuti tingawone kuti tiribe nthawe yakupfunza Bibliya. Kodi n’ciyani cingakuthandizeni? Werengani Afilipi 1:10, ndipo mukamala cezeranani mibvunzo yakutewerayi:
Kodi imwepo mumbawona kuti “mpsiponi bzinthu bzomwe mpsakufunika kwene-kwene” pa moyo wanu?
Kodi mungacite ciyani kuti kupfunza Bibliya kukhale cinthu cakuyamba pa moyo wanu?
Imwepo mucitenga baldi muciikha mataka ndipo muciikhambo minyala, minyalayo ingakwane lini
Imwepo muciyamba kuikha minyala m’baldimo, mungakhale na mbuto yakuikha mataka mazinji. Mwakundendemerana na bzimwebzi, mukaikha bzinthu bzakufunika kwene-kwene pa mbuto yakuyamba pa moyo wanu, mun’dzakwanisa kubzicita ndipo mun’dzakhalambo na nthawe yakucita bzinthu bzinango
Tikambapfunza Bibliya timbakhala tikubzidyesa mwauzimu ndipo timbakhala tikuzindikira kuti tin’funika kudziwa Mulungu na kumunamata. Werengani Mateu 5:3, ndipo mukamala cezeranani mbvunzo wakutewerayu:
Kodi tin’dzagumana phindu liponi tikaikha pa mbuto yakuyamba kupfunza Bibliya?
5. Mumbapirire mukakhala mukugumana na mabvuto
Nthawe zinango, wanthu angakuwofokeseni kuti musiye kupfunza Bibliya. Onani bzomwe bzidacitikira Francesco. Onani VIDIYO, ndipo mukamala cezeranani mibvunzo yakutewerayi.
Mu vidiyoyi, kodi axamwali na adzinza wa Francesco acita ciyani pomwe iye awauza bzomwe ambapfunza?
Kodi iye adasimbidwa tani thangwe ra kupirira?
Werengani 2 Timotio 2:24, 25, ndipo mukamala cezeranani mibvunzo yakutewerayi:
Kodi adzinza na axamwali wanu ambakuwonani tani thangwe ra kupfunza Bibliya?
Mwakubverana na mavesiya, kodi imwepo mungatawire tani munthu omwe akukomedwa lini kukuwonani mukupfunza Bibliya? Thangwe ranyi?
6. Khulupirani kuti Yahova ankuthandizani
Tikakhala pa uxamwali bwakulimba na Yahova, kufuna kwathu kumukondwesa kumbathumizirika. Koma nthawe zinango bzingatinese kucinja bzinthu kuti bzibverane na malamulo yace. Penu mumbabzibva tenepo, lekani kubwerera m’mbuyo. Yahova ankuthandizani. Onani VIDIYO, ndipo mukamala cezeranani mibvunzo yakutewerayi.
Mu vidiyoyi, kodi n’ciyani comwe Jim wacinja kuti akondwese Yahova?
Kodi n’ciyani comwe mwapfunza na ciratizo cace?
Werengani Ahebereu 11:6, ndipo mukamala cezeranani mibvunzo yakutewerayi:
N’ciyani comwe Yahova an’dzacita kwa “wanthu omwe ambamulinga na mtima wentse” ayai wale omwe ambacita nyongo kuti amudziwe na kufuna kumukondwesa?
Kodi imwepo mumbabzibva tani thangwe ra kudziwa kuti Yahova ambawona nyongo yomwe mumbacita kuti mupfunze Bibliya?
WANTHU WINANGO AMBALEWA KUTI: “Thangwe ranyi mukupfunza Bibliya?”
Kodi imwepo mungatawire tani?
KODI MWAPFUNZA CIYANI?
Napo kuti mpsakunesa, kupfunza Bibliya kungakuthandizeni kukhala na moyo wakukondwa mpaka kale-kale. Pitirizani kukhulupira Yahova ndipo iye an’dzakusimbani.
Mibvunzo yakubwerezera
Thangwe ranyi cadidi ca m’Bibliya n’cakufunika kwa imwepo?
Kodi imwepo mumbawona kuti “mpsiponi bzinthu bzomwe mpsakufunika kwene-kwene” pa moyo wanu?
Thangwe ranyi mun’funika kukumbira Yahova kuti akuthandizeni kupitiriza kupfunza Bibliya?
ONANI POMWE IBZI
Onani bzinthu bzinai bzomwe bzidathandiza wanthu azinji kuphatisa basa bwino nthawe yawo.
“Kodi Mungaphatise Tani Basa Bwino Nthawe Yanu?” (Mukani!, Fevereiro 2014)
Onani momwe Yahova adathandizira mkazi munango omwe mwamuna wace akhabvesesa lini thangwe lomwe mkaziyo akhacitira nyongo kuti akondwese Mulungu.
Onani momwe mwamuna munango adagumanira phindu thangwe ra kupirira kwa mkazi wace.
Mboni za Yahova zimbalewedwa kuti zimbapfudza ubale. Kodi bzimwebzi mpsacadidi?
“Kodi Mboni za Yahova Zimbapfudza Mabanja ayai Zimbayamangiridza?” (Nkhani ya pa jw.org)