Mbasankhulani Masenzeka Yomwe Yambakondwesa Yahova

Yahova ni “Mulungu wakukondwa.” (1 Timotio 1:11) Iye ambafuna kuti tikondwe na moyo. Ndipo ambakomedwa ifepano tikambapambula nthawe kuti tipume pa basa lathu. Mu pfunziro lino, tiniwona momwe tingaphatisire basa nthawe yakupuma kuti tikhale wakukondwa ticikondwesambo Yahova.

1. Kodi tin’funika kukumbukira ciyani pomwe tikusankhula masenzeka?

Kodi mumbafuna kucita ciyani pa nthawe yakupuma? Wanthu winango ambaphatisa basa nthawe yawo yakupuma kuti awerenge mabukhu, kubvesera nyimbo, kuwona mavidiyo ayai kuwona bzinango pa interneti. Wanthu winango ambafuna kuzunga, kutcula ayai kucita masenzeka manango. Bziribe basa masenzeka yomwe tingasankhule koma tin’funika kutsimikiza kuti masenzekayo ‘ngakubvumizika kwa Mbuya.’ (Aefezo 5:10) Mpsakufunika kucita bzimwebzi thangwe masenzeka mazinji ntsiku zino yambalatiza bzinthu bzomwe Yahova ambabziwenga ninga kumenyana ayai kuphana, kucita malume ya pa mphasa kwakusaya kubvumizika na kukhulupira bza mizimu. (Werengani Salimo 11:5.) Kodi n’ciyani comwe cingatithandize kusankhula masenzeka mwanzeru?

Ifepano tikasankhula axamwali omwe ambafuna Yahova, iwo an’dzatithandiza kufunambo Yahova na kumbasankhula masenzeka mwanzeru. Ninga momwe tidawonera mu pfunziro la m’mbuyomu, munthu “omwe an’famba na wanthu wanzeru, an’dzakhalambo wanzeru.” Tsono tikambacita uxamwali na wanthu omwe ambabvera lini mitemo ya Mulungu, ‘bzin’dzatimalira kuipa.’ — Mimwani 13:20.

2. Thangwe ranyi tin’funika lini kumbadzonga nthawe izinji tikucita masenzeka?

Napo kuti masenzeka yathu yangakhale yabwino, ifepano tin’funika lini kumala nthawe izinji tikucita masenzekayo. Tikasaya kucita bzimwebzi tin’dzakhala tiribe nthawe kuti ticite bzinthu bzakufunika kwene-kwene. Bibliya limbatilimbikisa kuti ‘timbaphatise bwino basa nthawe yathu.’ — Werengani Aefezo 5:15, 16.

FUFUDZANI BZINANGO

Onani momwe mungasankhulire masenzeka yanu mwanzeru.

3. Tcenkhani masenzeka yakuipa

Thangwe ranyi tin’funika kumbasankhula bwino masenzeka yathu? Onani VIDIYO, ndipo mukamala cezeranani mibvunzo ikutewerayi.

VIDIYO: Kodi Ningasankhule Tani Bzinthu Bzakusenzeka Nabzo? (4:39)

• Kodi masenzeka yakumenyana yomwe yakhacitika ku Roma, yakundendemerana tani na ya ntsiku zino?

• Mu vidiyoyi, kodi n’ciyani comwe Danny apfunza pa nkhani ya masenzeka?

Werengani Aroma 12:9, ndipo mukamala cezeranani mbvunzo wakutewerayu:

• Kodi vesiri lingakuthandizeni tani kusankhula bwino masenzeka?

Kodi ni bzinthu bzinango bziponi bzomwe Yahova ambabziwenga? Werengani Mimwani 6:16, 17 na Agalatiya 5:19-21. Mukamala kuwerenga mavesiya, cezeranani mbvunzo wakutewerayu:

• Kodi ni bzinthu bziponi pa bzomwe bzalewedwa m’mavesiya bzimbacita mbali pa masenzeka ya ntsiku zino?

Mibvunzo yomwe ingakuthandizeni kusankhula masenzeka mwanzeru

Bzibvunzeni kuti:

• Kodi masenzeka yomwe ndikucitaya yakuphatanidza bzinthu bzomwe Yahova ambabziwenga?

• Kodi masenzeka yomwe nimbacita yambanditazisa kucita bzinthu bzomwe mpsakufunika kwene-kwene?

• Kodi masenzeka yomwe nimbacita yambandicitisa kubverana na wanthu omwe ambafuna lini Yahova?

Bziri bwino kuthawa ngozi madzi yakali m’mabondo. Bzimwebzi bzikuthandauza kuti tin’funika kutcenkha masenzeka yomwe yakuwoneka kuti njabwino lini kwa ifepano

4. Mbaphatisani basa nthawe yanu mwanzeru

VIDIYO: Kodi n’Ciyani Comwe Cimbatonga Nthawe Yanu? (2:45)

• M’bale omwe walatizidwa mu zidiyoyi akhawona lini bzinthu bzakuipa, tsono adakhala na bvuto liponi?

Werengani Afilipi 1:10, ndipo mukamala cezeranani mbvunzo wakutewerayu:

• Kodi vesiri lingatithandize tani kuti tileke kumbadzonga nthawe izinji tikucita masenzeka?

5. Mbasankhulani masenzeka yabwino

Napo Yahova ambakomedwa lini na masenzeka manango, tsono yalipo masenzeka mazinji yomwe njabwino. Werengani Mpalizi 8:15 na Afilipi 4:8, ndipo mukamala cezeranani mbvunzo wakutewerayu:

• Kodi imwepo mumbacita masenzeka yaponi?

KODI MWAPFUNZA CIYANI?

Yahova ambafuna kuti timbapfatse na masenzeka yabwino.

Mibvunzo yakubwerezera

• Kodi Akristau an’funika kutcenkha masenzeka yaponi?

• Kodi tingacite tani kuti tileke kumbadzonga nthawe izinji na kucita masenzeka?

• Thangwe ranyi imwepo mun’funika kumbasankhula masenzeka yomwe Yahova ambakomedwa nayo?

ONANI POMWE IBZI

Onani kuti mbani omwe ana ugo bwakugatisankhulira masenza yathu.

“Kodi Mboni za Yahova Zimbaletsa Kuwona Mafilme, Kubvesera Nyimbo Ayai Kuwerenga Mabukhu Yanango?” (Nkhani ya pa jw.org)

Onani momwe mungasankhulire masenzeka mwanzeru.

“Kodi Bzomwe Mumbacita pa Masenzeka Yanu Bzimbakhala na Phindu?” (Ntsanza ya Mulindiri ya 15 Outubro, 2011)

Kuti muwone bzomwe bzidacitisa mwamuna munango kucinja masenzeka yomwe akhacita, werengani nkhani ya moyo wangu ya msolo wakuti, “Ndidamalisa Tsankhulo.”

“Bibliya Limbacinja Moyo wa Wanthu” (Ntsanza ya Mulindiri ya 1 Fevereiro, 2010)

Onani momwe mkazi munango wasankhulira masenzeka mwanzeru pa nkhani yakuphatisa basa bza mizimu.

Lekani Kumbacita Masenzeka Yomwe Yambabverana na bza Mizimu (2:02)