Pfunzisani Mwakusaya Kunesa

Kodi n’Ciyani Comwe Jezu Adacita?

VIDIYO: Jezu Akulatiza Momwe Baba Wathu Ambatisamalirira

1. Onani VIDIYO, ayai werengani Mateu 6:25-27. Patsogolo pace kumbukirani mibvunzo iyi:

1. Kodi Jezu adalatiza tani momwe Yahova ambatisamalirira?

2. Napo kuti Jezu akhadziwa bzinthu bzizinji pakulewa bza mbalame, kodi iye adalewa bzinthu bziponi bzomwe bzikhali bzakupusa kubvesesa? N’thangwe ranyi imweyi ikhali njira yabwino yakupfunzisira?

Kodi Tikupfunza Ciyani na Bzomwe Jezu Adacita?

2. Tikambapfunzisa wanthu mu njira yakupusa kubvesesa, bzimbacitisa kuti iwo aleke kuyebwa bzomwe tikuwapfunzisabzo ndipo bzimbatokonya mitima yawo.

Tewezerani Jezu

3. Tcenkhani kulewalewa kwene-kwene. M’mbuto mwakulewa bzinthu bzentse bzomwe mumbadziwa pa nkhaniyo, mbafotokozani nfundo zomwe n’zakufunikira. Mukacita mbvunzo, mbadikhirani kuti nyakupfunza wanu atawire. Tsono penu iye akudziwa lini mtawiro wace ayai akalewa cinthu comwe cikubverana lini na bzomwe Bibliya limbalewa, mbacitani mibvunzo yakuthumizira kuti mum’thandize kubvesesa nkhaniyo. Ndipo iye akabvesesa, mungayende pa nfundo inango.

4. Phatisani basa bzinthu bzomwe nyakupfunza wanu ambabzidziwa kuti mumuthandize kubvesesa bzinthu bzipsa. Mwaciratizo, pomwe mukanati kuyamba kupfunza nkhani yakulewa bza kulamusidwa kwa anyakufa, mungacezerane na nyakupfunza wanu kuti mudziwe bzomwe iye ambadziwa kale pakulewa bza nkhaniyo.

5. Mbaphatisani basa bziratizo mwakusamala. Pomwe imwepo mukanati kulewa ciratizo, bzibvunzeni kuti:

1. ‘Kodi ciratizoci n’cakupusa kubvesesa?’

2. ‘Kodi nyakupfunza wangu an’kakwanisa kucibvesesa?’

3. ‘Kodi bzimwebzi bzin’kamuthandiza kukumbukira nfundo yakufunika ayai an’kandokhalira kukumbukira ciratizoci?’