Mbalewalewani Mwakukhwimika na Mwalufoyi

Kodi n‘Ciyani Comwe Jezu Adacita?

VIDIYO: Jezu Akupereka Malango kwa Tswaka Lakudala

1. Onani VIDIYO, ayai werengani Marko 10:17-22. Patsogolo pace kumbukirani mibvunzo iyi:

1. Kodi ni makhalidwe yaponi yabwino yomwe Jezu adayawona kwa mwamuna wakudala ule?

2. Thangwe ranyi Jezu akhafunika kukhala wakukhwimika na walufoyi kuti apereke malango kwa mwamuna wakudala ule?

Kodi Tikupfunza Ciyani na Bzomwe Jezu Adacita?

2. Ifepano tin’funika kulatiza lufoyi kwa anyakupfunza wathu mwa kuwafotokozera bzinthu bzomwe an’funika kucinja pa moyo wawo kuti apitirize kukhala axamwali wa Yahova.

Tewezerani Jezu

3. Thandizani nyakupfunza wanu kukhala na bzakulinga acibzikwanirisa.

1. Mbaphatisani basa mbali yakuti “Citani Ibzi” pa pfunziro liri-lentse la bukhu lakuti Khalani na Moyo Wakukondwa Mpaka Kale-kale!

2. Thandizani nyakupfunza wanu kudziwa bzinthu bzomwe an’funika kucita kuti akwanirise bzakulinga bzace.

3. Mbatendani nyakupfunza wanu nthawe zentse thangwe ra nyongo yomwe ambacita kuti ayende patsogolo.

4. Mbazindikirani bzinthu bzomwe bzikutazisa nyakupfunza wanu kuyenda patsogolo mwauzimu, ndipo mbamuthandizani kudziwa bzomwe an’funika kucita.

1. Bzibvunzeni kuti:

   • ‘Kodi n’ciyani comwe cikutazisa nyakupfunza wangu kuyenda patsogolo acifika pa kubatizidwa?’

   • ‘Kodi n’ciyani comwe ningacite kuti ndimuthandize?’

2. Mbapembani kwa Yahova kuti mukwanise kufotokozera nyakupfunza wanu mwalufoyi bzinthu bzomwe an’funika kucita kuti ayende patsogolo.

5. Mbaimisani pfunziro lomwe likuyenda lini patsogolo.

1. Mbazindikirani penu nyakupfunza wanu wa Bibliya akuyenda patsogolo ayai ne mwakubzibvunza kuti:

   • ‘Kodi nyakupfunza wangu akuphatisa basa bzomwe akupfunza?’

   • ‘Kodi iye ambagumanika pa mitsonkhano ya gwere ndipo ambauzambo winango bzomwe ambapfunzabzo?’

   • ‘Pambuyo pakupfunza naye nthawe itali, kodi iye akufuna kukhala Mboni ya Yahova?’

2. Penu nyakupfunza wanu akuyenda lini patsogolo mungacite ibzi:

   • Mukumbireni kuti akumbukire bzinthu bzomwe bzikumutazisa kuyenda patsogolo.

   • Mufotokozereni mwaulemu thangwe lomwe mukuimisira pfunzirolo.

   • Mufotokozereni bzomwe an’funika kucita kuti mudzayambe kupfunza naye pomwe.