NKHANI YA PA TSAMBA LAKUYAMBA | KODI KUPEMBA KUMBATHANDIZADI?

Thangwe Ranyi Wanthu Wambapemba?

“Inepano ndikhabzina kwene-kwene njuga. Ndikhapemba kuti ndiwine kobiri zizinji. Tsono bziribe kucitika.”​—Samuel,a Kenya.

“Ku xikola, ifepano tikhafunikira kumbabwerezera na mu msolo mipembo yomwe tikhadapfunzisidwa.”​—Teresa, Filipinas.

“Ndimbapemba ndikambagumana mabvuto. Ndimbapemba kuti ndirekereredwe pikado zangu, nakuti ndikhale Mkristau wabwino.”​—Madalena, Gana.

Mafala yakulewedwa na Samuel, Teresa na Madalena, yambalatiza kuti wanthu wambapemba pa mathangwe yakusiyana-siyana, ndipo mathangwe manango yambakhala yakufunika kwene-kwene kuposa manango. Wanthu winango wambapemba kucokera pansi pa mtima; ndipo winango wambapemba lini kucokera pansi pa mtima. Tsono, napo wanthu wapembe kuti bziwafambire bwino pa mayezo ya ku xikola, kuti thimu lawo la mpira liwine, kuti Mulungu atsogolere banja lawo, ayai na mathangwe manangombo, iwo wambawona kuti kupemba n’kwakufunika. Kulewa cadidi, kafukufuku kanango kambalatiza kuti napo wanthu womwe walibe cipembedzo, wambapemba kawiri-kawiri.

Kodi imwepo mumbapemba? Penu inde, kodi mumbapembera ciyani? Penu muna cizolowezi cakumbapemba ayai ne, nthawe zinango mungabzibvunze kuti: ‘Kodi kupemba kumbathandizadi? Alipo omwe ambatetekera?’ Munembi munango adalewa kuti mpembo uli ninga “mtundu wa ulapi . . . ayai ninga kulewalewa na cifuwo.” Wanthu wa zaumoyo wambakumbukambo tenepoyo, wacirewa kuti mpembo ni “mtundu munango wakulapira matenda.” Kodi wanthu womwe wambapemba, wambacita bzimwebzo mwakusaya thandauzo, kuti wathandizike pomwe wankubva lini bwino?

Mwakusiyana na wanthu amwewa, Bibliya limbalewa lini bza mpembo ninga njira yakulapira matenda. Iro limbalewa kuti alipo omwe ambatetekera mipembo yomwe imbacitidwa mu njira yakuthemera na mathangwe yabwino. Kodi bzimwebzi n’cadidi? Mbatiwoneni umboni bwace.

[Mafala ya m’nyansi]