NKHANI YA PA TSAMBA LAKUYAMBA | KODI MULUNGU AMBAIWONA TANI NKHONDO?

Momwe Mulungu Ambaiwonera Nkhondo Nsiku Zino

Nsiku zino, wanthu wankuponderezedwa. Azinji kawiri-kawiri wambakumbira thandizo kwa Mulungu, ndipo wambabzibvunza penu thandizolo lin’dzabweradi. Kodi Mulungu ambabva mkumbiro wa thandizo omwe wanthuwa wambacita? Tsono tani bza wanthu wale womwe wambamenya nkhondo kuti wamalise kuponderezedwa kwawo? Kodi Mulungu ambawona nkhondo yomwe wambacitayo ninga njira yakubvumizika yakumalisira mabvuto? Ndipo kodi iye ambawathandiza pa nkhondoyo?

Cakutoma dziwani ibzi: Mulungu ambawona kubonera komwe kulipo pa dzikoli nsiku zino, ndipo iye an’funa kumalisa mabvutoya. (Psalymo 72:13, 14) Mu Fala lace Bibliya, Mulungu ambapicira kuti ‘imwe, womwe munkugumana na mazunzo, mun’dzatambira mpumulo.’ Kodi bzimwebzi bzin’dzacitika lini? Bzin’dzacika ‘Pa nthawe yomwe Mbuya Jezu an’dzawonekera kucokera kudzulu, na wanjo wace wa mphanvu . . . pomwe Mulungu an’dzalanga womwe wambamudziwa lini na wanthu womwe wambafuna lini kubva bzipsa bzabwino pakulewa bza Mbuya wathu Jezu.’ (2 Watesalonika 1:7, 8) Kuwonekera kwa Jezu kumweku, kun’dzacitika kutsogoloku, pa nthawe yomwe Bibliya limbacemera ‘nkhondo ya nsiku ikulu ya Mulungu wamphanvu yense,’ yomwe imbadziwikambo na dzina lakuti Armagedo.​—Cibvumbulutso 16:14, 16.

Tsono pa nkhondo imweyi, Mulungu an’dzaphatisira lini basa wanthu kuti wamenye nkhondoyo, m’mbuto mwace, iye an’dzaphatisa basa Mwana wace Jezu Kristu pabodzi na bzakulengedwa bzinango bzauzimu bza mphanvu, kuti adzamenyane na wanthu wakuipa. Bzakulengedwa bzauzimu bzimwebzi, bzin’dzamalisa mabvuto yense na kuponderezedwa kwa wanthu wense.​—Zaiya 11:4; Cibvumbulutso 19:11-16.

Mpaka lero Mulungu anati kucinja mawonedwe yace pa nkhani ya nkhondo. Iye akadawona nkhondo ninga njira yakubvumizika yakumalisira kuponderezedwa na uipi bwense. Koma ninga momwe bzikhacitikira kale-kale, cadidi n’cakuti kokha Mulungu ndiye omwe ambasankhula nthawe yomwe nkhondoyo in’funika kucitidwa na omwe angatenge mbali pa nkhondoyo. Ninga momwe tawonera, Mulungu wasankhula kale kuti nkhondo yomwe in’dzamalisa uipi na kuponderezedwa kwense, ni nkhondo yomwe in’dzacitidwa kutsogoloku na Mwana wace Jezu Kristu. Bzimwebzi bzinkuthandauza kuti nkhondo zomwe zimbacitidwa lero-lino n’zakubvumizika lini kwa Mulungu, bziribe basa mathangwe yomwe yambacitisa kuti nkhondozo zicitike.

There: Yezezani kuti wana awiri wacimuna ankumenyana pa ubale bwawo pomwe baba wawo wacoka. Nthawe pang’ono iwo ankuleka kumenyanako ndipo ankupfuwira mtedwe baba wawo. M’bodzi mwa wanawo ankuuza babace kuti mwanzace ndiye wayamba kumumenya, tsono winangoyo ankulewa kuti iye wacita bzimwebzo pakuti mwanzaceyo akhamuboneresa. Tsono wensewo wankukumbira thandizo kwa baba wawoyo, ndipo ali-wense ankudikhira kuti babayo an’muthandiza. Tsono pambuyo pakubva mathangwe yomwe yacitisa kuti wamenyane kwa mwana ali-wense, babayo ankuwauza kuti waleke kumenyanako, ndipo amudikhirire babayo mpaka atafika kumui kuti acezerane nkhaniyo. Wanawo wankudikhira kufika kwa babayo. Patapita nthawe ing’ono-ng’ono, awiriwo ankuyamba pomwe kumenyanako. Pomwe babayo ankufika pamuipo, ankuipidwa na bzomwe wanawo ankucita ndipo ankulanga wensewo, thangwe rakuti alibe kumubvera.

Nsiku zino, mitundu yomwe imbacita nkhondo, nthawe zense imbakumbira thandizo kwa Mulungu. Tsono Mulungu ambathandizira lini nkhondo zimwezi. M’mbuto mwace, m’Fala lace Bibliya, iye ambaleweratu padeca kuti: ‘Lekani kubwezera cakuipa na cakuipa.’ (Waroma 12:17, 19) Kuthumizira bzimwedzi, Mulungu adauza wanthu kuti ‘amudikhire na mtima wense’ mpaka itafika nthawe yakuti iye abwezere, ndipo iye an’dzacita bzimwebzi pa nkhondo ya Armagedo. (Psalymo 37:7) Wanthu akambamenya nkhondo m’mbuto mwakudikhira kuti Mulungu adzabwezere cakuipa, iye ambaipidwa ndipo ambawona bzimwebzo ninga mkhalidwe wa ciwembo. Tsono pa Armagedo, Mulungu an’dzalatiza ukali bwace acimalisa nkhondo zomwe zimbacitidwa na wanthu ‘mwakuletsa nkhondo mpaka kumamaliziro ya dziko la pansi.’ (Psalymo 46:9; Zaiya 34:2) Tenepo, Armagedo in’dzakhala nkhondo yomwe in’dzamalisa nkhondo zense.

Kumala kwa nkhondo, ni cibodzi mwa bzisimbo bzizinji bza Umambo bwa Mulungu. Jezu adalewa bza Umambo bumwebu mu mpembo wace wakudziwika bwino uyu: ‘Umambo bwanu bubwere. Kufuna kwanu kucitike pansi pano ninga kudzuluko.’ (Mateu 6:10) Umambo bwa Mulungu bun’dzandomalisa lini nkhondo, koma bun’dzamalisambo bzinthu bzomwe bzimbayambisa nkhondo na uipi bwense.a (Psalymo 37:9, 10, 14, 15) Tenepo, mpsakubveka kuti ateweri wa Jezu wambadikhira bzisimbo bza Umambo bwa Mulungu na mtima wense.​—2 Pedru 3:13.

Tsono kodi tin’dikhira kuti Umambo bwa Mulungu budzamalise kubonera kwense, kuponderezedwa na uipi mpaka lini? Kukwanisika kwa mapolofesiya ya m’Bibliya, kunkulatiza kuti ifepano tinkukhala ‘m’nsiku zakumalizira’ za mkonzedwe uno wa bzinthu. (2 Timotio 3:1-5)b Tsapanopapa, Umambo bwa Mulungu bun’dzafitsa ku phampha nsiku zakumalizirazi pa nkhondo ya Armagedo.

Ninga momwe bzalatizidwira m’mbuyomu, womwe wan’dzaluza moyo wawo pa nkhondo ya Armagedo, an’dzakhala wanthu womwe ambalamba ‘kubva bzipsa bza bwino pakulewa bza Mbuya wathu Jezu.’ (2 Watesalonika 1:8) Koma napo bziri tenepo, kumbukirani kuti Mulungu ambakomedwa lini na infa ya munthu ali-wense, napo akhale munthu wakuipa. (Zakiyeri 33:11) Pakuti iye ‘an’funa lini kuti munthu ali-wense adzapfudzidwe’ pa nkhondo yace yakumaliza, iye ankucitisa kuti bzipsa bzabwino bza Mbuya wathu Jezu ‘bzipaliziridwe pa dziko lense komwe kuna wanthu, ninga umboni kwa mitundu yense,’ cimaliziro cikanati kufika. (2 Pedru 3:8, 9; Mateu 24:14; 1 Timotio 2:3, 4) Inde, thangwe ra basa lakupalizira la Mboni za Yahova lomwe linkucitidwa pa dziko lense lapansi, wanthu lero ana mwayi wakudziwa Mulungu na kubvera bzipsa bzabwino bzakulewa bza Jezu, wacimbadikhira kudzawona nsiku yomwe nkhondo in’dzawoneka lini pomwe.

[Mafala ya m’nyansi]

[Cithunzi-thunzi pa tsamba 6]

Armagedo in’dzakhala nkhondo yomwe in’dzamalisa nkhondo zense