Tewezerani Ciratizo ca Wapolofeta—Mikeya
1. Kodi ni mbvunzo uponi womwe pinango Mikeya adaucitambo? Tsono thangwe ranyi kupalizira kwace kukhali lini kwapezi?
1 Kodi ni lini pomwe cin’dzabwera cimaliziro ca nkonzedwe wa bzinthu wakudzongekayu? Pinango mpolofeta Mikeya adaucitambo mbvunzo ninga umweyu pomwe akhadziwisa bziyeruzo bza Yahova mu umambo bwa Jirayeri na Juda. Tsono kupalizira kwace kukhali lini kwapezi. Mafala ya Yahova yakulewa bza kupfudzidwa kwa Samariya yadakwanisikadi Mikeya akana moyo mu gole la 740 A.E.C. (Mikeya 1:6, 7) Patsogolo pace Jeruzalemu adadzapfudzidwambo mu gole la 607 A.E.C. (Mikeya 3:12) Kodi tingamutewezere tani Mikeya pomwe tinkudikhira ciyeruzo ca Yahova mu nsiku zathu zino?
2. Kodi tingakulatize tani kupirira kwathu pomwe tinkudikhirira nsiku ya Yahova, ndipo thangwe ranyi?
2 Khalani Wakupirira: Mikeya adanemba kuti: ‘Koma ine ndin’dzadikhirira Yahova. Ndin’dzadikhirira Mulungu wa cipulumuso cangu.’ (Mikeya 7:7) Inde, Mikeya alibe kundodikhirira kubwera kwa cimaliziro. Iye adapitiriza kutumikira ninga mpolofeta wa Yahova. Pomwe tinkudikhirirambo kudza kwa nsiku ya Yahova, bzin’funika tikhale na ‘makhalidwe yakucena, na kumbacita mabasaya yakulatiza kuti ndife wakubzipereka kwa Mulungu.’ (2 Pedru 3:11, 12) Kupirira kwa Yahova kumbasa mpata wanthu kuti wakungule. (2 Pedru 3:9) Tenepo titeweze malango ya m’Bibliya ya kulewa bza kutewezera kupirira kwa wapolofeta.—Tiyago 5:10.
3. Thangwe ranyi tin’funika kumbamukumbira Yahova mzimu wace wakucena?
3 Khulupirani Mphanvu ya Yahova: Napo Mikeya akhana basa lakunesa, iye adalinga Yahova kuti amupase mphanvu yakucita basa lace. (Mikeya 3:8) Ndipopa Bibliya limbatilimbisa kukhulupira mphanvu ya Mulungu. Iye ambapasa mphanvu yace mwakusaya kuumira kuna wakuneta kuti wakwanise udindo bwawo. (Psalymo 84:5, 7; Zaiya 40:28-31) Kodi mudabzibva kale bzimwebzi pa moyo wanu wakutumikira Mulungu? Kodi mumbamukumbira Yahova kuti akuthandizeni na mphanvu yace ya mzimu wakucena?—Luka 11:13.
4. Kodi moyo wa Mikeya umbapereka ciratizo cabwino ciponi kuna ifepano nsiku zino?
4 Kucita kufuna kwa Yahova, cikhali cinthu cakutoma pa moyo wa Mikeya. Iye akhadatsimikiza kukhala wakukhulupirika, napo akhazunguliridwa na wanthu wa makhalidwe yakuipa. Mpsibodzi-bodzimbo na ifepano, cikhulupiro cathu cimbayezedwa nsiku zensene. Tenepo, mbatilimbiseni citsimikizo cathu ca ‘kufamba m’dzina la Yahova, Mulungu wathu, mpaka kale-kale.’—Mikeya 4:5