Agosto Unikhala Mwezi wa Basa Lakusaya Kuyebweka!

Katsamba Katsapano Kan’dzagawidwa pa Dziko Lense

1. Kodi ni kampanya yakupambulika iponi yomwe in’dzacitika padziko lense pomwe tinkufendera magole 100 yakubadwa kwa Umambo bwa Mulungu?

¹ Kwasala pang’ono kuti yakwane Magole dzana ya kubadwa kwa umambo bwa Mulungu. Mpsakufunika kuti titumbize Yahova mwa kucita kampanya yakupambulika! Mu mwezi wa Agosto pa dziko lense tin’dzatenga mbali pa kugawira katsamba katsapano kakuti Tingaigumane Kuponi Mitawiro ya Mibvunzo Yakufunika Kwene-kwene pa Moyo Wathu? Katsambaka kambalimbisa anyakuwerenga kugumana mitawiro yawo m’Bibliya ndipo kambafotokoza momwe Webisaiti ya jw.org ingawathandizire.

2. Kodi tingatengembo tani mbali pa ‘kukuwa mwakutumbiza Yahova’ komwe kun’dzayambika mu mwezi wa Agosto?

² Mafala Yakukuwa Mwacitumbizo: Pakufuna kuthandiza apalizi pa utumiki bwawo, pacitika makonzedwe yakupambulika kwa womwe wankufuna kucita upainiya bwakuthandiza mu mwezi wa Agosto. Mkati mwa mweziyu, wapalizi wakubatizidwa wan’dzabvumizidwa kucita upainiya bwakuthandiza bwa maora 30. Pakuti mwezi wa Agosto una nsiku zixanu za Cixanu, Malinkhuma na Mdzinga, wapalizi wazinji womwe wambaphata mabasa yawo yakunembedwa ayai wana wa pa xikola pa nthawe ya basayi wangadzakwanise kucita upainiya bwakuthandiza. Penu muna pfunziro la Bibliya la kuyenda patsogolo, ayai mwana womwe ankufuna kukhala mpalizi, uzani nyakubveranisa bungwe la akulu mwakusaya kucedwa. Bzingakhale bzakulimbisa kwene-kwene kwa wanthu wamwewa kuphatana nafe, ninga apalizi mkati mwa mwezi wakusaya kuyebwekayu! Napo apainiya wazinji wakukhazikika wangadzakhale pa nthawe yakupuma m’mwezi wa Agosto watamala kukwanisa maora yomwe wambakumbiridwa pa gole, bzingadzakwanisike kukonza pomwe bwino ndondomeko yawo kuti wacitembo kampanya yakupambulikayi mwakukwanira. Tsapano ni nthawe yakuti mabanja yacezerane momwe iwo wangadzatengerembo mbali pa ‘kukuwa mwakutumbiza Yahova’ komwe kun’dzayamba mkati mwa Agosto.​—Ezara 3:11; Mim. 15:22.

3. Kodi tingadikhire ciyani pa kucitika kwa kampanya yakupambulikayi?

³ Napo tidatengambo kale mbali pa kampanya ninga imweyi , tin’dikhira kuti imweyi in’khala yakusaya kuyebweka. Kodi tingathumizire tani nthawe yathu ninga, wapalizi, na apainiya wakuthandiza mu mwezi wa Agosto? Pakuti tamala gole la basa la 2014, Yahova asimbe nyongo ya wanthu wace padziko lense mwa kucitisa mwezi wa Agosto kukhala mwezi wa basa likulu lakupalizira kuposa lomwe lidacitika kale!​—Mat. 24:14.