Tewezerani Ciratizo ca Wapolofeta—Sofoniya
1. Kodi Sofoniya adatumikira ninga mpolofeta pa nthawe iponi, ndipo ni ciratizo cabwino ciponi comwe tingatengerembo nsiku zino?
1 Pakati pa m’magole ya 650 A.E.C wanthu wakhanamata Baala mwa padeca ku Juda. Mambo Wakuipa Amoni akhadaphedwa, ndipo Mambo waciswaka Djosiya ndiye omwe akhatonga. (2 Nkha. 33:21–34:1) Kuyambira nthawe imweyi, Yahova adatuma Sofoniya kuti adziwise mafala Yace yaciyeruzo. Napo Sofoniya akhali m’bodzi wa m’nyumba ya umambo bwa Juda, iye alibe kucita utofu kudziwisa fala la ciyeruzo la Yahova kwa utongi bwa Juda. (Sof. 1:1; 3:1-4) Mwakundendemerana, ifepano timbacita ciri-cense kuti tikhale wakulimba mtima ninga Sofoniya ndipo timbatcenkha kuti wacibale wathu aleke kutiphingiza mu njira yakuphonyeka pa kunamata kwathu Yahova. (Mat. 10:34-37) Kodi ni mafala yaponi yomwe Sofoniya akhadziwisa, ndipo n’ciyani cidadzacitika?
2. N’ciyani comwe tin’funika kucita kuti tidzabisidwe pa nsiku ya ukali bwa Yahova?
2 Mulingeni Yahova: Yahova yekha ndiye omwe angapulumuse wanthu mu nsiku ya ukali bwace. Tenepo, Sofoniya adakumbira wanthu wa ku Juda kuti walinge Yahova, walinge kukhala wakulungama, na walinge kukhala wakupfatsa pomwe nthawe ikanati kumala. (Sof. 2:2, 3) Mpsibodzi-bodzimbo nsiku zathu zino. Mwakundendemerana na Sofoniya, timbalimbisa wanthu winango kumulinga Yahova, tsono ifepano tin’funikambo kupitiriza kumutumikira ndipo titsimikize ‘kutewera Yahova’ mwakusaya kubwerera m’mbuyo. (Sof. 1:6) Natenepo, timulinge Yahova mwa kupfunza bwino-bwino Fala lace ticipemba, kukumbira utsogoleri bwace. Tilinge cirungamo mwa kukhala na moyo wakucena. Tilinge kukhala wakupfatsa mwa kupitiriza kukulisa mzimu wakubzicepsa ndipo tikhale wakukonzeka kutambira malango yakucokera ku gulu la Yahova.
3. Thangwe ranyi tin’funika kukhala na makumbukidwe yabwino tikakhala tiri mu utumiki?
3 Bzakutewera Bzabwino: Mafala ya ciyeruzo ya Sofoniya yadatokonya wanthu winango wa ku Juda ndipo yadatokonya kwene-kwene mulumbwana Djosiya, omwe adayamba kunyang’ana kwa Yahova kuyambira pomwe iye akhali mwana. Djosiya adayamba kampanya ya mphanvu yakucosa kunamata bzifanikiso mu dzikolo. (2 Nkha. 34:2-5) Lerolino, napo mbeu zinango za Umambo zimbagwera m’mbali mwa njira, pa minyala, ayai pa minga ndipo zinango zimbagwera pa mataka yabwino ndipo zimbabala bzisapo. (Mat. 13:18-23) Tina cikhulupiro cense kuti Yahova an’dzapitiriza kutisimba pa nyongo yathu pomwe tin’kupitiriza kumwaza mbeu za Umambo.—Psal. 126:6.
4. Thangwe ranyi tin’funika kupitiriza kudikhirira Yahova?
4 Wajuda winango wakhawona kuti palibe comwe Yahova an’dzacita. Tsono, Yahova adatsimikiza kuti nsiku yace ikulu iri pafupi. (Sof. 1:12, 14) Cipulumuso cin’dzabwera kokha kwa wale omwe an’thawira kwa iye. (Sof. 3:12, 17) Pomwe ‘tinkupitiriza kudikhirira Yahova’ tingakhale wakukondwa pa kutumikira pa bodzi na anzathu mwa ciphatano, Mulungu wathu mkulu!—Sof. 3:8, 9.