Kucitisa Mapfunziro ya Bibliya Yakuyenda Patsogolo
1. Kodi mpalizi omwe ambacitisa mapfunziro ya Bibliya ana udindo buponi?
1 Palibe na m’bodziyo omwe ankutumikira Mulungu omwe alibe kucita ‘kukwewedwa na Yahova.’ (Ju. 6:44) Napo bziri tenepo, apalizi womwe wambacitisa mapfunziro ya Bibliya wan’funika kucita mbali yawo mwa kuthandiza wanthu kufendererana na Baba wathu wakudzulu. (Tiy. 4:8) Bzimwebzi bzimbafuna kukonzekera. Kundowerenga ndime iri-yense na kubvunza mibvunzo yakudindidwa mpsakukwanira lini kuthandiza anyakupfunza wathu wa Bibliya kubvesesa mafala na kuyenda patsogolo.
2. Kodi Pfunziro la Bibliya lakuyenda patsogolo limbacita ciyani?
2 Kuti wacitise mapfunziro yawo yakuyenda patsogolo, wapalizi wan’funika kuthandiza anyakupfunza Bibliya wawo pa (1) kubvesesa bzomwe Bibliya limbapfunzisa, (2) kubvuma bzomwe Bibliya limbalewa, ndipo (3) kumbabziphatisa basa bzomwe Bibliya limbapfunzisa. (Ju. 3:16; 17:3; Tiy. 2:26) Pangamale minyezi kuti mutsogolere munthu kucita bzimwebzi. Kucita mbali iri-yense ya bzinthu bzimwebzi kumbalatiza kuthumizirika kwa mbverano wace na Yahova bzicimucitisa kubzipereka kwa iye.
3. Thangwe ranyi apfunzisi waluso ambacita mibvunzo yakufuna kudziwa momwe nyakupfunza ankuonera?
3 Kodi N’ciyani comwe Nyakupfunza Bibliyayu Ankukumbuka?: Kuti mukumbukire momwe nyakupfunza Bibliya wathu ankubvesesera na momwe ankubvumira bzomwe iye ankupfunza, tcenkhani imwepo kulewalewa kwene-kwene koma mulimbiseni nyakupfunzayo kuti ambalewelewembo. (Tiy. 1:19) Kodi iye ankubvesesa bzomwe Bibliya limbalewa mu nkhani yomwe tinkucezerana? Kodi iye angakwanise kufotokoza bzimwebzi na mafala yace-yace? Kodi iye ambabva tani na bzomwe adapfunza? Kodi iye ambakhulupira kuti bzomwe ambapfunza mpsacaibzo? (1 Wat. 2:13) Kodi iye ankubvesesa kuti bzomwe ankupfunzabzo bzinkucinja moyo wace? (Wakol. 3:10) Kuti tikwanise kugumana mitawiro ya mibvunzo ninga imweyi, tin’funika kumbacita mibvunzo mwaluso, ndipo timbamutetekere.—Mat. 16:13-16.
4. Kodi tingacitenyi penu nyakupfunza ankuneseka kubvesesa ayai kuphatisa basa bzomwe iye ankupfunza kucokera mu Bibliya?
4 Bzizolowezi na makumbukidwe yakuphonyeka kawiri-kawiri bzimbazikika ndipo pambamala nthawe kuti bzimale. (2 Wak. 10:5) Tsono penu nyakupfunza wathu ankubvuma lini ayai ankuphatisa lini basa bzomwe ankupfunzabzo? Kupirira nkwakufunika kuti papite nthawe yakukwanira yakuti Fala la Mulungu na mzimu wakucena bziphate basa mu mtima mwa nyakupfunzayo. (1 Wak. 3:6, 7; Waheb. 4:12) Penu nyakupfunza ankuneseka kubvesesa ayai kuphatisa basa bzomwe Bibliya limbapfunzisa, m’mbuto mwa kumuumiriza, bzimbakhala bwino kuyenda msolo winango. Pomwe tinkupitiriza kumupfunzisa mwakupirira na mwalufoyi kucokera mu Bibliya, iye na kupita kwa nthawe bzingamuthandize kucinja.